2 TUNUNG RU BANSA' ISRAIL 30 - Tanou Moonsoi Timugon

Tumampos koson pangiantakan Paska

^1-3 Mamagun kalo poyo makapangiantak ra Paska paat ra ondo' inaru' noyo, iono paat ra sila' kasaa', sabap ra kalo naukapan ilo ra imam ondo' namasau noyo ra inan; am poyo kalo poyo masuang ulun ondo' timinimung giu' ra Jirusalim. Ginio ra Raja' Gijkia, pagawai-pagawai nano, am mamagun ru Jirusalim nangiou mangiantak ra Paska ra sila' karuo. Nangator raja' ra tanou ra ngaangai' mamagun ru Israil am Jiuda, am poyo ra bansa' ru Ipraim am Manasi, koson mampiau risilo matong ra Baloi ru Tuhan giu' ra Jirusalim maa' raginio mangiantak ra Paska koson mangurumat ra Tuhan, i Aki Kapuuno' ru Israil.

⁴ Iniou ru Raja' am mamagun inatangan raginio.

⁵ Nampiau ilo ra ngaangai' ulun ru Israil, intor ra Dan giu' ra ralayo saboi ra Birsyiba giu' ra rabugus, maa' raginio tumimung giu' ra Jirusalim koson mangiantak ra Paska sumugut ra inaru' giu' ra ralalom ru Ukum ri Musa. Masaga' ilo mangiantak ra Paska ra maayo.

⁶ Ulun-ulun sinusub inataran ru raja' am pagawai-pagawai nano ra titikop ru Jiuda am Israil nabaya' ra piau ondo' bolos koson ragitio, “Mamagun kau ru Israil, naayag kau intor ra kinuasa' ru ulun ru Asyur. Raino saguli' kano ra Tuhan, i Aki Kapuuno' ri Abragam, Isak am Jakub, am Tuhan pana sumaguli' ramuyun.

⁷ Pai' tilu koson ra kinamatuaan mini am ulun pogondo' ra bansa' min Israil ondo' kalo giminagaya' ra Tuhan, i Aki Kapuuno' nilo. Koson ra napandayan min noyo, nangukum Io risilo ra maagat.

⁸ Pai' bambalingatan koson risilo. Gagaya' no ra Tuhan. Ratong no ra Baloi ru Tuhan giu' ra Jirusalim, ondo' paluntukon ayuk ra Tuhan, i Aki Kapuuno' min koson ra sabubuoi no. Sambayang no Riso maa' raginio Kalo boo sumangit Io ramuyun.

⁹ Amon ru sumaguli' kau ra Tuhan, ulun ondo' namparakop ra pabukat mino makaasi' risilo, am mangiou risilo muli'. Tuhan, i Aki Kapuuno' mino moonsoi am makaasi'; amon ru sumaguli' kau Riso, apuon No akau.”

¹⁰ Ulun-ulun sinusub no minongoi ra moonong bandar giu' ra wilayah Ipraim am Manasi, am giu' ra ralayo saboi ra wilayah ru bansa' ru Jibulon. Ulun makakurit am manauyu' risilo,

¹¹ kaa' mokoondo' niayuk intor ra bansa' ru Asyir, Manasi am Jibulon ondo' masaga' matong ra Jirusalim.

¹² Giu' ra Jiuda, i Aki Kapuuno' pana miningkuor am noporondo' ra guang ru mamagun maa' raginio totopot gumagaya' ra kasagaan Nano, saboi ilo masaga' gumagaya' ra susuban ru raja' am pagawai-pagawai nano.

Pangiantakan Paska

¹³ Paat ra sila' karuo, masuang ulun timinimung giu' ra Jirusalim koson mangiantak ra Pangiantakan Ruti' Kalo Linatakan ra Ragi.

¹⁴ Linunsai nilo ngaangai' altar giu' ra Jirusalim ondo' pinakai koson mampataak ra taak simbalui am monolob ra kaminyan ra dewa-dewa am pinatiran boo ngaangai' no ra ralalom ru Limayak Kidron.

¹⁵ Paat ra orou koopor am apat ra sila' raginio, nanimbalui ilo ra anak-anak domba tayar ru taak simbalui Pangiantakan Paska. Imam-imam am ulun-ulun ru Liwi ondo' kalo poyo namasau ra inan nauyu' kaga' saboi ilo pana namasau ra inan maa' raginio makapampataak ra taak simbalui koson mapabansuk ra guang ru Tuhan giu' ra Baloi ru Tuhan.

¹⁶ Minigor ilo ra intok ru sigagama' giu' ra Baloi ru Tuhan sumugut ra aturan ra ralalom ru Ukum ri Musa, ulipon ri Aki Kapuuno'. Nangani' ulun ru Liwi ra raraa' ru bibiag ra imam-imam koson patakison ra rasawat ru altar.

¹⁷ Sabap ra masuang ulun ondo' kalo poyo namasau ra inan, kalo makapanimbalui ilo ra anak domba Paska. Ginio ra ulun ru Liwi nambaal raginio ra tayar nilo am nampataak ra anak domba ondo' sinimbalui no ra Tuhan.

¹⁸ Suai raginio, masuang niayuk ulun intor ra bansa' ru Ipraim, Manasi, Isakar am Jibulon ondo' kalo poyo namasau ra inan. Ginio sabap ra ilo nangiantak ra Paska ra kalo nabaya' ngai' ondo' inaru'. Kopongo raginio pakiasi' Raja' Gijkia ra tayar nilo,

¹⁹ “Iou Tuhan, i Aki Kapuuno' ru kinamatuaan mai, sabap ru kinoonsoi Muno, ampuno' noyo ilo ondo' sumamba Rirun ra sotopot ru guang, kabalu' pana ilo kalo poyo namasau ra inan.”

²⁰ Iniou ru Tuhan pakiasian ru Raja' Gijkia am nangampun ra ngaangai' ulun no am kalo nangukum risilo.

²¹ Buoi tulu' ngoorou ulun ondo' timinimung giu' ra Jirusalim nangiantak ra Pangiantakan Ruti' Kalo Linatakan ra Ragi nabaya' ra kaansukan. Moonong orou ulun-ulun ru Liwi am imam-imam mongompor ra Tuhan ra ngaangai' ru ikang nilo.

²² Nongompor Raja' Gijkia ra ulun ru Liwi ra katasikan nilo maningganai ra sambayang ra Tuhan. Kopongo tulu' ngoorou ilo nakasia' ra akanon ru pangiantakan am niayuk nampataak ra taak simbalui koson maringkuanang ra Tuhan, i Aki Kapuuno' nilo,

Pangiantakan karuo

²³ ilo ngaangai' namatas koson mamparayus ra pangiantakan no tulu' ngoorou poyo. Nangiantak ilo ra pangiantakan ra naansukan.

²⁴ Nanaak Raja' Gijkia ra 1,000 ngainan sapi' gawayan am 7,000 ngainan domba koson sinimbalui am inakan ru mamagun. Pagawai-pagawai nanaak 1,000 ngainan sapi' gawayan am 10,000 ngainan domba. Paat raginio masuang kaga' imam namasau ra inan.

²⁵ Ngaangai' ulun naansukan, ra mamagun ru Jiuda, imam-imam, ulun ru Liwi am poyo ulun ondo' minatong intor ra ralayo, am bansa' ondo' namagun giu' ra Israil am Jiuda.

²⁶ Titikop ru bandar Jirusalim naansukan, sabap ra intor ra pamarintaan ru Raja' Salomo anak ungkuyon ru Raja' Daut, kalo poyo igondo' baal koson ragitio nasauk.

²⁷ Imam-imam am ulun-ulun ru Liwi nakibarakat ra Tuhan ra tayar ru mamagun. Intor ra intok inayanan Nano giu' ra suruga', nokorongog Tuhan am niayuk nangapu ra pakiasian nilo.