2 TUNUNG RU BANSA' ISRAIL 26 - Tanou Moonsoi Timugon

Raja' Ujia, raja' ru Jiuda

¹ Ngaangai' mamagun ru Jiuda nampalantik ra Raja' Ujia, anak ungkuyon ru Raja' Amajia nasauk ra raja'. Paat raginio Raja' Ujia makaumur mopor am onom ngambilor. (

² Kopongo pinatayan ru Raja' Amajia, Raja' Ujia nampagaau saguli' ra Ilot am nambaal poyo ra bandar no.)

³ Raja' Ujia nasauk ra raja' paat io makaumur mopor am onom ngambilor am namarinta io giu' ra Jirusalim buoi limo ngoopor am ruo ngambilor. Ina' nano i Jikolia intor ra Jirusalim.

⁴ Raja' Ujia timinilu ra ama' nali am nambaal io ra atan ondo' iniou ru Tuhan.

⁵ Buoi ri Jakaria lakat poyo naayag, Raja' Ujia sumambayang ra Tuhan ra totopot, am i Aki Kapuuno' pana nambarakat riso. Nangila' i Jakaria riso maa' raginio malaa' ri Aki Kapuuno'.

⁶ Nangayou Raja' Ujia ra ulun ru Palistin. Ginaba' no timbok ru bandar Gat, Jabni am Asdod, am nambaal ra bandar-bandar mokoondo' ra kubu mamaar ra Asdod am giu' ra intok ru ulun ru Palistin.

⁷ Nangindangan i Aki Kapuuno' ra Raja' Ujia nangala ra ulun ru Palistin, ulun ru Arab ondo' minayan giu' ra Gur-Baal am ulun ru Miunim.

⁸ Nambayar ulun ru Amon ra cukai ra Raja' Ujia, am nasauk io ra makakuasa' kaga' saboi inggalan nano nauligan kaga' saboi ra Misir.

⁹ Binaal ru Raja' Ujia kukula' manara giu' ra Kulobon Garabang Pisuk, Kulobon Garabang Limayak, am pisuk ru timbok koson mamiot ra kubu ru Jirusalim.

¹⁰ Binaal no niayuk manara-manara mokoondo' ra kubu giu' ra tana' malimparang am nangkali ra tulubong-tulubong, sabap ra mokoondo' io ra masuang bibiag tinambiag giu' lonson toojo ru bulur tampilon ra kalasaan am giu' ra tana' marata'. Raja' Ujia masaga' ra pagitanaman; ginio ra nagangat ra mamagun maa' raginio manangumo ra anggur giu' ra tampilon kabuluran am magitanom ra tana' ondo' malabung.

¹¹ Mokoondo' Raja' Ujia ra saujor maayo ondo' magail makatampos koson mangayou. Ilo no intor ra pulalai-pulalai ondo' suang no tinulisan ru ruo ngaulun mamatik, iono i Jiyil am i Maasiya, ragana' ru naningganayan ri Gananya, sangulun intor ra pagawai ru raja'.

¹² Ngaangai' ru pulalai mangayou no tiningganai ru 2,600 ngaulun pagawai.

¹³ Ragana' ru naningganayan ru pagawai-pagawai no mokoondo' 307,500 ngaulun saujor ondo' mangapanggol, makatampos koson mangayou am mangindangan ra raja' gumula' ra pantula'.

¹⁴ Inukapan ru Raja' Ujia pulalai mangayou no ra perisai, tutura', tupi' basi', bayang basi', busur am panah, am niayuk batu-batu koson pomomobol.

¹⁵ Giu' ra Jirusalim, ulun mapandai toojo ra kinandoi mangayou nambaal ra kuliamos ondo' makapapalabus ra anak panah am mombobol ra batu maayo intor ra rasawat ru manara am pisuk ru timbok ru bandar. Raja' Ujia nasauk ra nauligan kaga' giu' ra ngaangai' intok, am nasauk io ra makakuasa' toojo sabap ra nokoowot ra indangan intor ri Aki Kapuuno'.

Raja' Ujia inukum sabap ra limbau nano

¹⁶ Kopongo Raja' Ujia nasauk ra maikang, nasauk io ra malilimbau; limbau nano nangkinibit ra naratuan nano. Inanggal ru Raja' Ujia susuban ru Tuhan, i Aki Kapuuno' nano sabap ra sinolob no kaminyan giu' ra rasawat ru altar kaminyan giu' ra Baloi ru Tuhan.

¹⁷ Imam Ajaria, nabaya' ra balu' ngaulun imam ondo' maikang am baani,

¹⁸ kuminam manginggalar riso. Konilo, “Raja' Ujia, kolondo' kuasa' mu monolob ra kaminyan koson ra Tuhan. Imam-imam ayuk ondo' papag ri Arun ondo' patimpokon noyo koson ra kandoi raginio. Iruani' intok ondo' matulai ti. Makasala kou noyo ra Tuhan i Aki Kapuuno' am kalo boo barakaton No.”

¹⁹ Tatanga' Raja' Ujia migor giu' ra sapapa' ru altar kaminyan giu' ra Baloi ru Tuhan, liliwa' nampaguut ra panalaban ra kaminyan. Sumangit io ra imam-imam no, pulali' boo ru rondo' salinut ru maruol ru kungkung ra maaja' minujak ra rabas nano.

²⁰ I Ajaria am imam-imam ra bokon nagilong ra raja' am nakakito ra maruol ru kungkung ra maaja' ra rabas nano. Jajali' nilo raja' mangiruan ra Baloi ru Tuhan ra mataki'. Ingkual raja' ra naringkaagou, sabap ra nangukum noyo Tuhan riso.

²¹ Buoi ru bayag nano, kalo napali' Raja' Ujia intor ra maruol no. Pinasuai io giu' ra rondo' baloi am kalo noyo boo iniou sumubol ra Baloi ru Tuhan. Pinalabus Raja' Ujia intor ra ngaangai' kandoi nano, anak ungkuyon nano boo i Jotam mamarinta ra pamarintaan koson ra suali nano.

²² Nabi Jisaya anak ri Amos nanulis ra ngaangai' binaal ru Raja' Ujia paat ra pamarintaan nano.

²³ Raja' Ujia minatoi am linobong giu' ra tana' kalabangan ru kinamatuaan nano, kaa' sabap ra maruol nano kalo linobong io giu' ra kalabangan ru raja'. Kopongo raginio anak ungkuyon nano i Jotam minalit riso koson ra raja'.