2 TUNUNG RU BANSA' ISRAIL 24 - Tanou Moonsoi Timugon

Raja' Joas, raja' ru Jiuda

¹ Raja' Joas nasauk ra raja' ru Jiuda paat ra io makaumur tulu' ngambilor, am namarinta io giu' ra Jirusalim buoi apat ngoopor ngambilor. Ina' nano i Jibya, ondo' intor ra bandar Birsyiba.

² Nambaal Raja' Joas ra baal-baal ondo' mapabansuk ra guang ru Tuhan buoi ru Imam Joyada lakat poyo naayag.

³ Nanambili' i Joyada ruo ngaulun andu' ri Joas, am intor risilo no Raja' Joas nokoowot ra anak ungkuyon am ruandu'.

⁴ Kopongo Raja' Joas namarinta ra kukula' buoi, namatas io koson mamuna' ra Baloi ru Tuhan.

⁵ Nanusub io ra imam-imam am ulun-ulun ru Liwi mongoi ra bandar-bandar giu' ra Jiuda maa' raginio manimung ra ruit intor ra ngaangai' mamagun saboi maukop koson mamuna' ra Baloi ru Tuhan ra moonong bilor. Nanusub io risilo maa' raginio mataki' mambaal, kaa' ulun ru Liwi liliwaan ayuk.

⁶ Ginio ra pampiau Raja' Joas ri Joyada, tingganai nilo am pangkuot, “Kua rirun kalo nanusub ra ulun ru Liwi mongoi ra mamagun ru Jiuda am Jirusalim koson manimung ra cukai ondo' pinaugar ri Musa, ulipon ru Tuhan no ra tayar ru Kim ru Tuhan?”

⁷ Paat raginio ulun-ulun maamaya' ri Atalya, ruandu' malaat no, nampalunsai ra Baloi ru Tuhan am masuang kuliamos ondo' binaal timpokon ri Aki Kapuuno' pinakai nilo koson sumamba ra Baal.

⁸ Nanusub raja' ra ulun ru Liwi mambaal rondo' kaban, am pambantaan ginio giu' ra saang ru kulobon garabang ra Baloi ru Tuhan.

⁹ Nampatanou ilo giu' ra titikop ru Jirusalim am Jiuda, ra moonong ulun musiti' magibit ra cukai tayar ru Tuhan, koson ondo' kinitaak ri Musa, ulipon ru Tuhan i, giu' ra tana' kaagisan ragili.

¹⁰ Mamagun am tingganai-tingganai nilo masaga' ra inatangan no, am nagibit ra ruit cukai nilo am namanu' ra kaban no.

¹¹ Moonong orou ibiton ru ulun ru Liwi kaban no ra pagawai ru raja' koson ilain toojo. Paat ra kaban no mapanu', mamamatik ru raja' am ulun mangindangan ra Tingganai Maayo Imam mangingkual ra ruit no am kaban no pasagulion giu' ra intok no. Koon raginio noyo ilo mangumung ra ruit ondo' masuang kaga'.

¹² Raja' am i Joyada nampataak ra ruit no ra pagawai-pagawai ondo' manalingapu ra pamunaan ra Baloi ru Tuhan. Pagawai-pagawai raginio nampagaji' ra ulun manukang ra batu, ulun manukang ra tataun, ulun manukang ra basi', koson mambaal ra kandoi pamunaan no.

¹³ Ngaangai' ulun manukang no miningkotog nangandoi, am pinuna' nilo Baloi ru Tuhan saboi mapiot am moonsoi koson ragili.

¹⁴ Kopongo boo ngaangai' kandoi no, suwo ru mas am pirok no pinataak ra raja' am i Joyada. Mas am pirok no pinakai koson mambaal ra kuliamos-kuliamos ra Baloi ru Tuhan: kuliamos-kuliamos koson upacara sambayang am koson ra taak simbalui koson mapabansuk ra guang ru Tuhan, am niayuk mangkuk-mangkuk, am niayuk kuliamos-kuliamos ra bokon. Buoi ri Joyada naayag, taak simbalui koson mapabansuk ra guang ru Tuhan masalok pataakon giu' ra Baloi ru Tuhan.

Pangilaan ru Imam Joyada ondo' kalo binaya'

¹⁵ I Joyada nokopolos ra umur ondo' matutuo noyo kaga' am minatoi paat ra io makaumur 130 ngambilor.

¹⁶ Linobong io giu' ra kalabangan ru raja' giu' ra Bandar Daut, koson mangkara' ra binaal moonsoi nano ri Aki Kapuuno', Baloi ru Tuhan am ulun ru Israil.

¹⁷ Kaa' kalupus pinatayan ri Joyada, tingganai-tingganai ru Jiuda nanusuk ra Raja' Joas maa' raginio rumongog ra pinson nilo.

¹⁸ Ginio ra mamagun kalo boo sumambayang giu' ra Baloi ru Tuhan, i Aki Kapuuno' ru kinamatuaan nilo. Tumalimpuun ilo boo sumamba ra sinungkalalaing am sinungkalalaing ru Dewi Asyira. Tula nilono nangkinibit ra Tuhan siminangit ra Jiuda am Jirusalim.

¹⁹ Nanusub Tuhan ra nabi-nabi koson mampakara' risilo maa' raginio sumaguli' mangandoi ayuk Riso, kaa' kalo riminongog ilo.

²⁰ Kopongo raginio Ambiluo ri Aki Kapuuno' nanguasa' ri Jakaria anak ri Joyada, imam no. Bigor i Jakaria giu' ra intok ondo' makito ru ulun masuang, am golok, “Tuhan i Aki Kapuuno' mindagu, ‘Kua ramuyun kalo giminagaya' ra susuban Kuno saboi namparatong ra karaat ra inan min galama'? Iniruanan min Aku; ginio ra Aku niayuk mangiruan ramuyun.!’ ”

²¹ Minaya' Raja' Joas naguguum ra mamagun koson manggal ri Jakaria, am ra ragu ru raja', mamagun nomobol ri Jakaria giu' ra liliut Baloi ru Tuhan.

²² Nalilianan ru Raja' Joas binaal moonsoi am gagaya' ri Joyada, ama' ri Jakaria riso. Kopongo raginio nanusub io maa' raginio potoyon i Jakaria. Paat ra patayan nano, golok i Jakaria, “Gama' ru makakito Tuhan ra binaal min ti am mangukum ramuyun!”

Pupus ra pamarintaan ru Raja' Joas

²³ Bulintok ru tumutu' raun bilor raginio, saujor ru Siria namulunsar ra Jiuda am Jirusalim. Pinatoi nilo ngaangai' tingganai am nagibit ra masuang kuliamos ginaau inibit ra Damsyik.

²⁴ Saujor ru Siria kalo maayo, kaa' nompoloso Tuhan risilo nangala ra saujor ru Jiuda ondo' maayo poyo, sabap ra mamagun ru Jiuda nangiruan noyo ra Tuhan, i Aki Kapuuno' ru kinamatuaan nilai. Ginio noyo ralan Raja' Joas ukumin.

²⁵ Raja' Joas napilat ra masaran. Paat pulalai ru pantula' liminugut, ruo ngaulun pagawai ru Raja' Joas nakimaguum mamparuung riso. Pinatoi nilo Raja' Joas giu' ra nambalangan nano koson mansuli' ra pinatayan ru anak ungkuyon ri Joyada, imam no. Linobong Raja' Joas giu' ra Bandar Daut, kaa' sala' ka giu' ra kalabangan ru raja'. (

²⁶ Ulun ondo' nakimaguum mamparuung ra Raja' Joas iono i Jabad am i Jojabad. Ina' ri Jabad iono i Simiat intor ra Amon, am ina' ri Jojabad iono i Simrit intor ra Moab.)

²⁷ Tunung intor ra anak-anak ungkuyon ru Raja' Joas am inala'-inala' ondo' kalo moonsoi intor ra inan nano, am niayuk tunung intor ra ralan nano namuna' ra Baloi ru Tuhan tinulisan ra ralalom ru kitab Tapsiran Kitab Raja'-Raja'. Raja' Amajia, anak ungkuyon ru Raja' Joas, nasauk ra raja' minalit ra ama' nano.