2 TUNUNG RU BANSA' ISRAIL 19 - Tanou Moonsoi Timugon

Sangulun nabi nansawai ra Raja' Josapat

¹ Raja' Josapat minuli' ra naayag giu' ra istana nano ra Jirusalim.

² Sangulun nabi ininggalanan ri Jigu anak ri Ganani, minongoi uma' ra raja' am indagu riso, “Musiti' kou kia mangindangan ra ulun malaat am magibaya' ra ulun ondo' manggal ra Tuhan? Binaal muno mangkinibit ra Tuhan sumangit rirun.

³ Kabalu' pana raginio, mokoondo' niayuk binaal ra moonsoi muno. Namatir kou ra tatandu'-tatandu' ru Dewi Asyira ondo' sambaan ru mamagun, am minirot kou nambaal ra kasagaan ri Aki Kapuuno'.”

Nambaal Raja' Josapat ra panalimbaguan

⁴ Kabalu' pana Raja' Josapat minayan giu' ra Jirusalim, magail io mongoi pagilong ra mamagun nano giu' ra titikop pagun, intor ra Birsyiba giu' ra rabugus saboi ra balitan ru kabuluran Ipraim giu' ra ralayo, koson maningganai ra mamagun sumaguli' ra Tuhan, i Aki Kapuuno' ru kinamatuaan nilai.

⁵ Raja' Josapat nampalantik ra akim-akim giu' ra moonong bandar ondo' mokoondo' ra kubu giu' ra Jiuda.

⁶ Nangani' io ra susuban ragitio risilo, “Ilalain min paat ra akau mangakim ra ulun, sabap ra akau mambaal sala' ka ralalom inggalan ru ulun, kaa' ralalom inggalan ru Tuhan. Magalung Io ramuyun paat ra akau mangani' ra kapatasan.

⁷ Kalaa' kano ra Tuhan, am ilalain ra mampaguang, sabap ra Tuhan, i Aki Kapuuno' takau masisang ra ulun ondo' sumiang, kapoam ondo' kalo matimpok, kapoam ondo' mangapu ra pangngambi'.”

⁸ Giu' ra Jirusalim, Raja' Josapat nampalantik ra ulun ru Liwi, imam-imam, am kukula' ngaulun tingganai ru mamagun koson ra akim, koson manalingapu ra baal-baal ondo' makakulawit ra manggal ra Ukum ru Tuhan am manggal ra kaulayan ru mamagun ru bandar no.

⁹ Raja' Josapat nangani' ra susuban ragitio ra akim-akim, “Paugaro' kandoi min ra malaa' ra Tuhan. Musiti' kau gumagaya' ayuk Riso ralalom ru ngaangai' baalon min.

¹⁰ Paat ra ulun sabansa' min intor ra bandar ra bokon mapabala' ra baal pampatayan, manggal ra Ukum, kapoam manggal ra kaulayan, musiti' kau mangani' ra panuluan maa' raginio ilo kolondo' tula ra Tuhan. Amon ru kalo, akau, am bansa' min matiu' ra sangit ru Tuhan. Kaa' amon ru paugaron min kandoi pinalansan ramuyun no, kolondo' sala min.

¹¹ Tingganai Maayo Imam Amarya makakuasa' toojo ra ngaangai' baal ru ugama, am i Jibaja anak ri Ismail, gabenor ru Jiuda, makakuasa' toojo ra ngaangai' baal ru kasuangan. Ulun ru Liwi pinalansan ra kasugutan ra kapatasan ru makama. Baalo' min ra matanda' am suguto' panuluan-panuluan ragitio. Gama' ru Tuhan mabaya' ra ulun ondo' mambaal ra matimpok!”