2 TUNUNG RU BANSA' ISRAIL 17 - Tanou Moonsoi Timugon

Raja' Josapat nasauk ra raja'

¹ Raja' Josapat namalit ra ama' nano Raja' Asa koson ra raja', am nangikang ra intok nano koson manggal ra Israil.

² Raja' Josapat noposoroi ra saujor giu' ra bandar-bandar ondo' mokoondo' ra kubu giu' ra Jiuda, giu' ra kampung ru Jiuda, am giu' ra bandar-bandar ondo' ginaau ru Raja' Asa giu' ra wilayah Ipraim.

³ Tuhan nambarakat ra Raja' Josapat sabap ra kalo timinilu io ra ama' nali paat ra ama' nali lakat poyo mamulok; Raja' Josapat kalo siminamba ra Baal.

⁴ Nangandoi io ayuk ri Aki Kapuuno' ru ama' nano, giminagaya' ra susuban ri Aki Kapuuno', am kalo naayag koson ra raja'-raja' ru Israil.

⁵ Inikang ru Tuhan pamarintaan nano giu' ra Jiuda, am ngaangai' ulun nangani' riso ra tangguang saboi nasauk io ra langkaya' am urumaton kaga'.

⁶ Minikang guang ru Raja' Josapat sabap ra nangandoi ayuk ra Tuhan; pinuso no ngaangai' intok sambaan ra sinungkalalaing am tatandu'-tatandu' ru Dewi Asyira giu' ra Jiuda.

⁷ Paat ra bilor katalu ru pamarintaan nano, nangator io ra pagawai-pagawai nano koson mangila' giu' ra bandar-bandar ru Jiuda. Ilo iono i Binail, Obaja, Jakaria, Nitaniil am Mika.

⁸ Binaya' ilo ru siam ngaulun Liwi am ruo ngaulun imam. Ulun-ulun ru Liwi no iono i Simaya, Nitania, Jibaja, Asail, Simiramot, Jonatan, Adonia, Tobia am Tob-Adonia; imam-imam no iono i Ilisama am Joram.

⁹ Inibit nilo kitab Ukum ru Tuhan, am nariput ra ngaangai' bandar ru Jiuda am nangila' ra mamagun ra giu' no.

Kuasa' ru Raja' Josapat

¹⁰ Tuhan nambaal ra ngaangai' pamarintaan giu' ra liliut ru Jiuda malaa' mangayou ra Raja' Josapat.

¹¹ Santayaran ra ulun ru Palistin nangani' ra Raja' Josapat ra masuang pirok am taak ra bokon. Mokoondo' poyo ulun ru Arab ondo' nangani' riso ra 7,700 ngainan domba am 7,700 ngainan kambing.

¹² Koon raginio noyo Raja' Josapat nasauk ra makakuasa' ra giminaai-gaai. Giu' ra titikop ru Jiuda nambaal io ra kubu-kubu am bandar-bandar.

¹³ Nambuli io ra inula' ondo' masuang giu' ra bandar-bandar. Giu' ra Jirusalim pinosoroi no ulun-ulun tutumula' ondo' mangapanggol

¹⁴ sumugut ra bansa' ru sigagama'. I Adna nasauk ra panglima maatang ru bansa'-bansa' ru Jiuda, am naningganai io ra 300,000 ngaulun saujor.

¹⁵ Panglima karuo no i Joganan; naningganai io ra 280,000 ngaulun saujor.

¹⁶ Panglima katalu no i Amasia anak ri Jikri; naningganai io ra 200,000 ngaulun saujor. (I Amasia nangandoi ayuk ra Tuhan ra kasagaan nano.)

¹⁷ I Ilyada nasauk ra panglima maatang ru bansa'-bansa' ru Binjamin, am naningganai io ra 200,000 ngaulun saujor ondo' nananggal ra perisai am panah.

¹⁸ Panglima karuo no i Josabad; naningganai io ra 180,000 ngaulun saujor makakinandoi mangayou.

¹⁹ Ilo no ondo' nangandoi ra raja' giu' ra Jirusalim. Suai raginio, Raja' Josapat niayuk noposoroi ra saujor ra bokon giu' ra bandar-bandar mokoondo' ra kubu giu' ra wilayah Jiuda.