1 SAMUIL 18 - Tanou Moonsoi Timugon

¹ Nopongo noyo Raja' Saul am i Daut nagindagu. Kopongo raginio, anak ungkuyon ru Raja' Saul ondo' makainggalan ri Jonatan maansayan kaga' ri Daut, am tumalimpuun motogom riso koson ra io motogom ra inan nano galama'.

² Intor ra orou raginio, nanusub Raja' Saul no ri Daut mayan simpung riso, am kalo mataak no io muli' ra baloi ru ama' nali.

³ Nagibot i Jonatan koson rumangan ri Daut ra mantilayun, sabap ra motogom io kaga' ri Daut.

⁴ Inalus ri Jonatan sukub nano am pabayango' no ri Daut. Tinaakan no niayuk bayang mangayou nano, ilang nano, panah nano am abot nano ri Daut.

⁵ Binaal ri Daut ra matanda' ngaangai' kandoi ondo' nanusuban ru Raja' Saul. Raja' Saul pana nampili' boo riso nasauk ra pagawai saujor. Baal raginio napakaansuk ra guang ru ngaangai' pagawai saujor am ulun ru Raja' Saul.

Nangusolon Raja' Saul ri Daut

⁶ Pakasaguli' i Daut, kalupus nangala ri Goliat ulun ru Palistin no, am baris saujor-saujor minumpos ra ralalom ru bandar, bala ru ruandu' miningkual intor ra ngaangai' bandar giu' ra Israil koson manguma' ra Raja' Saul. Naririmbai ilo ra rimbai kaansukan liliwa' nansasayau am nangkuli ra tamburing am jitor.

⁷ Liliwa' nansasayau ruandu'-ruandu' narimbai koson ragitio, “Raja' Saul namatoi ra riribu ngaulun pantula', kaa' i Daut namatoi ra opor-opor ngaribu ngaulun pantula'.”

⁸ Kalo naansayan Raja' Saul nangkirongog ra rimbai no, am sangit io boo. Indagu Raja' Saul, “I Daut no kinara' namatoi ra opor-opor ngaribu ngaulun pantula', am aku ti kinara' ayuk namatoi ra riribu ngaulun pantula'. Kalo boo mabuoi saukon nilo io ra raja'!”

⁹ Intor ra orou raginio nangusolon Raja' Saul ri Daut.

¹⁰ Suabon no, soroi Raja' Saul giu' ra ralalom baloi am tatanga' nampaguut ra tutura'. Pulali' ru Raja' Saul no sinubol ru ambiluo malaat ondo' sinusub ri Aki Kapuuno', saboi giminabu' io koson ra ulun mantuyang. Paat raginio tatanga' i Daut mangkuli ra jitor koson ra kaindalaman.

¹¹ Nangkara' Raja' Saul, “Potonsokon ku io ra timbok no.” Pinapatir no tutura' no ri Daut saboi induo, kaa' nailiwan ri Daut ginio.

¹² Nalaa' Raja' Saul ri Daut sabap ra Tuhan mabaya' ri Daut, kaa' Tuhan no nangiruan noyo ra Raja' Saul.

¹³ Raja' Saul pana napabanding boo ri Daut intor ra ralalom ru istana am pinili' no nasauk ra tingganai ru pulalai ra saribu ngaulun saujor. Naningganai i Daut ra pulalai nano ralalom pangayawan,

¹⁴ am nakasugut io nambaal ra ngaangai' kandoi nano sabap ra Tuhan mabaya' riso.

¹⁵ Inimansaan ru Raja' Saul nasugutan ri Daut, am baal raginio naparuang poyo ra laa' nano ri Daut.

¹⁶ Kaa' ngaangai' mamagun ru Israil am Jiuda motogom ri Daut, sabap ra io sangulun tingganai ondo' masuang indangan nano. Naguot i Daut ra anak ruandu' ru Raja' Saul

¹⁷ Nangatang Raja' Saul maa' raginio potoyon i Daut no ru ulun ru Palistin ralalom ru pangayawan maa' raginio sala' ka Raja' Saul galama' ondo' mamatoi riso. Ginio ra, sangarawan raginio indagu Raja' Saul ri Daut, “I Mirab, anak ruandu' ra katuaan kuno, pawatin ku rirun, ginio ayuk ra mangandoi kou raki' masauk ra saujor ondo' baani am gumagaya', am niayuk mangayou ra tayar ru Tuhan.”

¹⁸ Taam i Daut, “Osoi boo kia aku ti, am osoi boo kia sasambaloi ru ama' kuli giu' ra Israil saboi aku ti masauk ra anak mangiwan ru raja'?”

¹⁹ Kaa' nasaboi paat ri Mirab paganduon ri Daut, pinataak i Mirab no ra sangulun ungkuyon ra bokon ondo' makainggalan ri Adriil intor ra bandar Migola.

²⁰ Kaa' i Mikgal, anak ruandu' ru Raja' Saul ra bokon no, malaai ri Daut. Pokorongog Raja' Saul ra baal raginio, Raja' Saul pana naansayan.

²¹ Nangkara' Raja' Saul, “Pataakin ku i Mikgal no ri Daut maa' raginio malandak i Daut am potoyon ru ulun ru Palistin.” Kainduo no boo, indagu Raja' Saul ri Daut, “Raino masauk kou ra anak mangiwan kuno.”

²² Nanusub Raja' Saul no ra pagawai-pagawai nano maa' raginio suminok mambala' ri Daut koson ragitio, “Maansayan Raja' no rirun, am ngaangai' ru pagawai nano masaga' rirun; ginio ra raino noyo paat ondo' motopot rirun koson manangandu' ra anak ruandu' ru raja'.”

²³ Baal raginio pinasaboi nilo ri Daut, am taam io, “Karaan min kia ra matasu' masauk ra anak mangiwan ru raja'? Aku ti ulun musikin am kalo maatang!”

²⁴ Pagawai-pagawai no nampasaboi ra taaman ri Daut no ra Raja' Saul,

²⁵ am nanusub Raja' Saul ra pagawai-pagawai mambala' ri Daut ra bilin ragitio, “Rondo' ayuk toojo kitaakon ru raja' no intor rirun koson ra mulo iono maatus kungkung ru khatan ru ulun ru Palistin, koson mansuli' ra pantula' nano.” (Gitio noyo ralan inatang ru Raja' Saul maa' raginio potoyon i Daut no ru ulun ru Palistin.)

²⁶ Pagawai-pagawai ru Raja' Saul nampasaboi ra ragu ru Raja' Saul no ri Daut, am naansukan i Daut ra naambi' masauk ra anak mangiwan ru raja'. Ginio ra kalo poyo nasaboi orou paguatan ondo' inaru' noyo,

²⁷ nababaya' i Daut ra ulun-ulun nano namatoi ra ruo ngaatus ngaulun Palistin; inalap ri Daut kungkung khatan nilono. Kopongo raginio pinataak ri Daut ngaangai' no ra raja' ra kalo natutusan ra rondo' pana maa' raginio masauk io ra anak mangiwan ru raja'. Ginio ra musiti' pawatin ru Raja' Saul no anak ruandu' nano i Mikgal no ri Daut.

²⁸ Nalimanan ru Raja' Saul ra Tuhan mabaya' ri Daut, am i Mikgal anak ruandu' nano malaai ri Daut.

²⁹ Gumaai boo laa' ru Raja' Saul no ri Daut. Nantula' Raja' Saul no ri Daut buoi ru bayag nano.

³⁰ Pogonong ra saujor ru Palistin mamulunsar, makasugut poyo i Daut nangala risilo intor ra pagawai ru Raja' Saul ra bokon no. Kon raginio noyo i Daut nasauk ra nauligan kaga'.