1 RAJA'-RAJA' 4 - Tanou Moonsoi Timugon

Pagawai-pagawai ru Raja' Salomo

¹ Raja' Salomo nasauk ra raja' ra titikop ru pagun ru Israil.

² Gitilo noyo pagawai ru Raja' Salomo: Imam: I Ajaria anak ri Jadok

³ Mamamatik ru pagun: I Iligorip am i Agia, iono anak-anak ri Sisa Manutun ra rapu' ru pagun: I Josapat anak ri Agilud

⁴ Panglima ru saujor: I Binaya anak ri Joyada Imam-imam: I Jadok am i Abiatar

⁵ Tingganai ru pagawai ru libung: I Ajaria anak ri Natan

⁶ Tingganai ru mangngandoi ru istana: I Agisar Tingganai ru kuli': I Adoniram anak ri Abda.

⁷ Nampalantik Raja' Salomo ra mopor am ruo ngaulun nasauk ra pagawai ru libung giu' ra Israil. Kandoi nilo mampalulur ra akanon intor ra wilayah nilo tayar ru raja' am ngaangai' ru mayan ra istana. Sigagama' ru pagawai ru libung no mangula' buoi sambulan paat ra moonong bilor.

⁸ Gitilo noyo inggalan ru pagawai am libung nilono: I Bin-Gur: Tampilon ra kabuluran ru Ipraim

⁹ I Bin-Dikir: Bandar Makas, Saalbim, Bit-Simis, Ilon am Bit-Ganan

¹⁰ I Bin-Gisid: Bandar Arubot am Sokgo, am niayuk titikop ru wilayah Gipir

¹¹ I Bin-Abinadab, ralaki ri Tapat, anak ruandu' ru Raja' Salomo: Titikop ru tampilon ra Dor

¹² I Baana anak ri Agilud: Bandar Taanak, Migido, am titikop ru tampilon mamaar ra Bit-Sian, mamaar ra Bandar Sartan, giu' ra tampilon rabugus ru Jijriil, saboi ra bandar Abil-Migola am Jokmiam

¹³ I Bin-Gibir: Bandar Ramot giu' ra Giliad, nakaaya' ngaangai' pekan longgom ru bansa' Jair, bansa' ru papag ri Manasi am wilayah Argob giu' ra Basan; ngaangai' no 60 bandar maayo ondo' makatimbok am kulobon garabang makaumpok ra gangsa'

¹⁴ I Aginadab anak ri Ido: Libung Maganaim

¹⁵ I Agimaas ralaki ri Basmat, anak ruandu' ru Raja' Salomo: Wilayah Naptali

¹⁶ I Baana anak ri Gusai: Tampilon ra Asyir am bandar Alot

¹⁷ I Josapat anak ri Parua: Wilayah Isakar

¹⁸ I Siimi anak ri Ila: Wilayah Binjamin

¹⁹ I Gibir anak ri Uri: Tampilon ra Giliad, ondo' igondo' kinuasa' ru Raja' Sigon, raja' ru Amori no am Raja' Og intor ra Basan. Suai ra mopor am ruo ngaulun pagawai ru libung no, sangulun pagawai ru libung niayuk linantik ra tayar ru wilayah Jiuda.

Kinaayo ru pamarintaan ru Raja' Salomo

²⁰ Mamagun ru Jiuda am Israil masuang kaga', nogondo' ra kinasuang ru agis giu' ra kiing ru raat. Maukapan ilo ra akanon am inumon, am niayuk matasu' kaayagan.

²¹ Pamarintaan ru Raja' Salomo nakasimpung ngaangai' pagun intor ra Sungoi Iprat saboi ra Palistin am balitan ru pagun ru Misir. Panguasa' ru pagun-pagun no mambayar ra upiti ra Raja' Salomo, am ilo ti kinuasa' no ra buoi ru bayag nano.

²² Akanon ondo' ulaan ra Raja' Salomo ra moonong orou iono 5,000 ngalito tapung halus am 10,000 ngalito tapung kasar,

²³ 10 ngainan sapi' inaput ra kandang, 20 ngainan sapi' pinalabus ra paun, am 100 ngainan domba, suai ra tambang, kima, tambang dandi am bibiag mansiab.

²⁴ Nanguasa' Raja' Salomo ra titikop ru tana' tampilon ra kalasaan ru Sungoi Iprat, intor ra Tipsa giu' ra Sungoi Iprat saboi ra kinagalur ru bandar Gaja giu' ra tampilon ra kalasaan. Ngaangai' ru raja' ra tampilon ru kalasaan ru Sungoi Iprat kinuasa' ru Raja' Salomo, am riminangan io ra ngaangai' ru pagun ra paginggaar.

²⁵ Buoi ru Raja' Salomo naayag, mamagun giu' ra titikop ru Jiuda am Israil maayag ra moonsoi, moonong ru sasambaloi mokoondo' ra umo ru anggur am umo ru ara.

²⁶ Mokoondo' Raja' Salomo ra 40,000 kandang ru kuda ondo' mamunduk ra kurita' kuda, am 12,000 ngainan kuda ra pulalai mangkuda.

²⁷ Mopor am ruo ngaulun pagawai ru libung nano, sigagama' mangula' ra akanon ondo' pakuan ru Raja' Salomo am ngaangai' ru ulun ondo' mangakan giu' ra istana nano. Pagawai-pagawai ru libung no mangula' ra bulan-bulan ondo' inaru' noyo risilo. Magail ilo mangula' ra ngaangai' no ra ukopon.

²⁸ Moonong pagawai ru libung niayuk mangula' ra barli am rami akanon ru kuda kurain am kuda mamunduk ra kurita' kuda, ati ayuk kapakuan ra akanon ru bibiag no.

²⁹ Nanaak i Aki Kapuuno' ra Raja' Salomo ra kapintaran am kapandayan ondo' makaimuag kaga' am niayuk pangaratian ondo' malandom kaga'.

³⁰ Raja' Salomo nasauk ra ulun mapintar poyo intor ra ulun mangapintar giu' ra pagun ru Sirangon am ulun mangapintar giu' ra pagun ru Misir.

³¹ Io no mapintar kaga': Mapintar poyo intor ri Itan ulun ru Ijragi am i Giman, i Kalkol am i Darda, anak-anak ri Magol. Inggalan ru Raja' Salomo nauligan kaga' giu' ra ngaangai' pagun ra paginggaar.

³² Nanulis io ra 3,000 amsal am nasailan intor ra 1,000 mazmur.

³³ Makaindagu io intor ra puun tataun am tutuu'-tutuu': intor ra puun sidar ondo' timinuu' giu' ra kagunungan Libanon saboi ra sakot Isop ondo' timinuu' giu' ra timbok. Mindagu io intor ra bibiag, susuit, bibiag mamuntana' am papait.

³⁴ Raja'-raja' ra titikop ru tana' ti nokorongog intor ra kapintaran ru Raja' Salomo, am nanusub ilo ra ulun mongoi riso koson rumongog ra raguon nano.