1 RAJA'-RAJA' 3 - Tanou Moonsoi Timugon

Makiasi' Raja' Salomo makitaak ra kapintaran

¹ Raja' Salomo napasauk ra raja' ru Misir no pagamung nano am nanangandu' ra anak ruandu' ru raja' ru Misir. Inibit ru Raja' Salomo anak ruandu' ru raja' no minayan ra Bandar Daut saboi ra pambaalan ra istana ru Raja' Salomo, Baloi ru Tuhan, am timbok giu' ra liput ru bandar Jirusalim no nopongo.

² Paat raginio Baloi ru Tuhan kalo poyo binaal. Ginio ra mamagun mampataak ra taak simbalui giu' ra altar-altar ra nansusuai intok.

³ Motogom Raja' Salomo ra Tuhan am siminugut ra bilin ru Raja' Daut, ama' nano, kaa' Raja' Salomo pana nanimbalui ra bibiag am mampataak raginio koson ra taak simbalui giu' ra altar-altar giu' ra nansusuai intok.

⁴ Paat ra sangarawan no minongoi Raja' Salomo ra Gibion koson mampataak ra taak simbalui, sabap ra giu' no altar ondo' mauligan kaga'. Nampataak io ra ratus-ratus taak simbalui ra altar no ragili.

⁵ Kaa' rondom raginio intalang Tuhan ra Raja' Salomo ralalom ru inupi am pangkuot riso, “Atan kia masaga' muno pataakon Ku rirun?”

⁶ Taam Raja' Salomo, “Nampakito Kono ra togom ondo' maayo ra ulipon Muno Raja' Daut, ama' kuno. Io moonsoi, gumagaya', am mabanis guang Rirun. Magail Kou mampakito ra togom Muno ondo' maayo am mantilayun no riso am nangani' riso ra sangulun anak ungkuyon, ondo' raino ti mamarinta minalit riso.

⁷ Iou Tuhan i Aki Kapuuno', nangiou Kou raki' masauk ra raja' minalit ra ama' kuno, kabalu' pana aku ti lakat poyo mamulok am kalo mapandai mamarinta.

⁸ Soroi aku ra gino ngai' ru bansa' ondo' pinili' Muno masauk ra ulun Muno galama' – rondo' ra ulun ondo' masuang kaga' no saboi kalo maalap ra untob.

⁹ Ginio ra anii' aku ra kapintaran ondo' gogoton kuno koson mamarinta ra ulun Muno ra matimpok, am maa' raginio mapandayan ku ondo' moonsoi am ondo' malaat. Amon ru kalo, kalo lair masaga' aku mamarinta ra ulun Muno ondo' maayo ti?”

¹⁰ Nangiou Tuhan ra kitaakon ru Raja' Salomo no.

¹¹ Indagu Io boo ra Raja' Salomo, “Sabap ra nakitaak kou ra kapintaran am sala' ka umur ra maawar, kapoam kalangkayaan, kapoam patayan ru pantula' muno,

¹² iowon Ku kitaakon muno. Manaak Aku rirun ra kapintaran am karatian ondo' kalo igondo' linonggom kapoam longgomon ru osoi pana.

¹³ Mangani' Aku niayuk ra baal ondo' kalo kinitaak muno: buoi ru bayag muno masauk kou ra langkaya' poyo am urumaton poyo ru ulun intor ra ati pana raja'.

¹⁴ Amon ru gumagaya' kou raki' am maya' ra ukum Kuno koson ra ama' muno i Daut ragili, manaak Aku rirun ra umur maawar.”

¹⁵ Paat ra Raja' Salomo nakarat, nakaliman io ra minindagu i Aki Kapuuno' riso ralalom ru inupi. Kopongo raginio minongoi Raja' Salomo ra Jirusalim am minigor ra saang ru Kaban Nabantuan ru Tuhan. Nampataak Raja' Salomo ra taak simbalui koson mapabansuk ra guang ru Tuhan am taak simbalui koson makibarakat ra Tuhan. Kopongo raginio nambaal Raja' Salomo ra bunsag koson ra ngaangai' ru pagawai nano.

Mangakim Raja' Salomo ra baal ondo' mapagon

¹⁶ Paat ra sangarawan no, ruo ngaulun ruandu' mantalan ra inan minuma' ra Raja' Salomo.

¹⁷ Sangulun intor risilo minindagu ra raja', “Raja' kuno, ruandu' ti minayan rondo' baloi raki'. Soroi io ra baloi paat ra aku naganak ra sangulun anak ungkuyon.

¹⁸ Kopongo ruo ngoorou, io ti bagu naganak ra sangulun anak ungkuyon. Akai ruo ayuk minayan ra baloi; kolondo' ulun ra bokon ondo' siminimpung ramon.

¹⁹ Paat ra sarandaman, tatanga' ruandu' ti nombolong, am kalo siningon no nakaintun ra anak nano saboi anak no minatoi.

²⁰ Paat ra tanga' ru rondom, tatanga' ra aku nombolong, tirong io am nangalap ra anak kuno intor raki', am nagibit ra anak kuno ra intok kaalangan nano. Kopongo raginio pinabanta' no baangkai ru anak nano ra intok kaalangan kuno.

²¹ Suabon no, paat ra aku timinirong am mampatiti' ra anak kuno, ilai' ku anak no minatoi noyo. Paat ra inimansaan ku toojo anak no, ilai' ku anak no sala' ka anak kuli.”

²² Kaa' indagu ruandu' ra sangulun no poyo, “Kalo! Anak ondo' naayag ti topot-topot anak kutu. Anak ondo' minatoi no anak muno!” Indagu ruandu' ra kasaa' ni, “Kalo! Ondo' minatoi no anak muno, am ondo' naayag no anak kuno!” Ginio noyo ra ilo nansangor ra saang ru raja'.

²³ Kopongo raginio indagu Raja' Salomo, “Akau sigagama' mangiou ra anak ondo' naayag ti anak min, am anak ondo' minatoi no sala' ka anak min.”

²⁴ Panusub raja' ra ulun magibit ra rondo' ilang,

²⁵ am indagu, “Piruo' anak ondo' naayag ti, am pantukiro' saputul sangulun ra ruandu' ti.”

²⁶ Norongog susuban raginio, ina' toojo ru anak no minindagu, “Ampun raja' kuno, pai' potoyo' anak no! Pataako' anak no ra ruandu' ti!” Rinagu ru ina' no ginio sabap ra motogom io kaga' ra anak nano. Kaa' indagu ruandu' ra sangulun no poyo, “Kalo pana taakin anak no ra osoi pana; putulo' noyo anak ti.”

²⁷ Kopongo raginio indagu Raja' Salomo, “Pai' potoyo' anak no! Pataako' anak no ra ruandu' kasaa' no. Io noyo ina' nano.”

²⁸ Paat ra ulun ru Israil nokorongog ra namatasan ru Raja' Salomo, mangurumat ilo kaga' riso sabap ra nakapandai ilo ra nangani' i Aki Kapuuno' riso ra kapintaran koson mampaugar ra katimpakan.