1 RAJA'-RAJA' 2 - Tanou Moonsoi Timugon

Bilin pamupusan ru Raja' Daut ra Raja' Salomo

¹ Paat ra Raja' Daut maar noyo matoi, pampiau io ra Raja' Salomo, anak nano, am pambilin io ra pamupusan.

² Indagu Raja' Daut, “Nasaboi noyo patayan kutu. Pangintopot no am baani kou.

³ Baalo' atan ondo' nanusuban ru Tuhan, i Aki Kapuuno' muno rirun. Gagaya' no ra ngaangai' ru ukum am panusuban Nano ondo' tinulisan ralalom ru Ukum ri Musa, maa' raginio ati ayuk pana angayan muno, iawo kou ra ngaangai' ru pirot muno.

⁴ Amon ru gumagaya' kou ra Tuhan, suguton no bantu' ondo' binaal Nano paat ra Io nambala' raki' ra papag kuno mamarinta ra Israil, buoi nilo totopot gumagaya' ra ngaangai' susuban Nano am gumagaya' Riso ra sotopot-topot ru guang am salibuor nilo.

⁵ “Mokoondo' rondo' poyo baal. Lakat mu poyo makara' binaal ri Joab raki'. Namatoi io ra ruo ngaulun panglima ru saujor ru Israil, i Abnir anak ri Nir am i Amasa anak ri Jitir. Lakat mu poyo makara' ralan no namatoi risilo paat ra pababansayan koson mansuli' ra nampatayan paat ra pangayawan. Namatoi io ra ulun ondo' kolondo' sala, kaa' raino aku ti ondo' musiti' mansaan ra kinibit ru binaal nano am aku ti ondo' maimbolo'.

⁶ Nakapandai kou ra atan ondo' musiti' baalon; pai' polosoo' ra matoi io mamimio.

⁷ Kaa' koonsoi no ra anak-anak ri Barjilai, ulun ru Giliad no. Tampilani' ilo ra kaukapan nilo sabap ra moonsoi ilo raki' paat ra aku nagiru' intor ra maayo muli i Absalom.

⁸ Mokoondo' sangulun poyo ondo' inggalan no i Simii anak ri Gira, intor ra bandar Bagurim giu' ra wilayah Binjamin. Nagulas io raki' ra malaat paat ra aku minongoi ra Maganaim. Kaa' paat ra io minatong uma' raki' giu' ra Sungoi Jordan, nambantu' aku ralalom inggalan ru Tuhan ra kalo potoyon ku io.

⁹ Kaa' pai' polosoo' ra io makalabus intor ra ukuman. Nakapandai kou ra atan ondo' musiti' baalon; tutuno' noyo maa' raginio ukumin io ra matoi.

Raja' Daut minatoi

¹⁰ Raja' Daut minatoi am linobong giu' ra Bandar Daut.

¹¹ Buoi apat ngoopor ngambilor io nasauk ra raja' ru Israil: buoi tulu' ngambilor io namarinta giu' ra Gibron, am buoi talu ngoopor am talu ngambilor giu' ra Jirusalim.

¹² Kopongo raginio Raja' Salomo nasauk ra raja' namalit ra Raja' Daut, ama' nano. Kuasa' ru Raja' Salomo koson ra raja' maikang kaga'.

I Adonia minatoi

¹³ Kopongo raginio i Adonia anak ri Gagit, minongoi uma' ri Batsyiba, ina' ru Raja' Salomo. Pangkuot i Batsyiba ri Adonia, “Rinatangan mutu ra kuayan moonsoi kia?” Taam i Adonia, “Iou.”

¹⁴ Kon poyo ri Adonia, “Mokoondo' rondo' kitaakon kuno intor rirun.” Pangkuot i Batsyiba, “Atan kia ginio?”

¹⁵ Kon ri Adonia, “Nakapandai kou ra aku ti noyo ondo' sotopot no masauk ra raja', am ginio noyo ondo' lansanin ru moonong ulun ru Israil. Kaa' baal raginio kalo nasauk, am boborok kuno boo ondo' nasauk ra raja', sabap ra ginio noyo kasagaan ru Tuhan.

¹⁶ Raino mokoondo' rondo' kitaakon kutu; pai' impayi' kitaakon kutu.”

¹⁷ Pangkuot i Batsyiba, “Atan kia kitaakon muno?” Taam i Adonia, “Balai' Raja' Salomo – nakapandai aku ra raja' no kalo mangimpai ra kitaakon muno – maa' raginio mangiou raki' manangandu' ri Abisag, ralaa intor ra Sunim no.”

¹⁸ Taam i Batsyiba, “Iou noyo. Posoboyon ku kitaakon muno ra raja'.”

¹⁹ Kopongo raginio uma' i Batsyiba ra Raja' Salomo koson mampasaboi ra baal raginio ra bala ri Adonia. Bigor raja' no manguma' ra ina' nano am kubu samba ra saang nano. Panturung Raja' Salomo ra kurisi' nano, am paatango' no rondo' poyo kurisi' tampilon ra pamiris koson ra ina' nano.

²⁰ Indagu i Batsyiba, “Makitaak i ina' mutu ra rondo' ondo' boborok ayuk intor rirun; pai' impayi' kitaakon kuno.” Pangkuot Raja' Salomo, “Atan kia kitaakon muno? Kalo impayin ku kitaakon muno.”

²¹ Indagu i Batsyiba, “Iowo' noyo i Adonia maayo muno manangandu' ri Abisag.”

²² Pangkuot Raja' Salomo, “Kua kia panusub kou raki' mampataak ri Abisag no ri Adonia? Ginio nogondo' ayuk ra makitaak raki' mampataak ra kurisi' kuno riso. Sala' ka kia maayo ku io? Mulu' poyo, Imam Abiatar am i Joab manungka' riso!”

²³ Kopongo raginio nagibot Raja' Salomo ralalom inggalan ru Tuhan, kono, “Polosoon noyo i Aki Kapuuno' no mamatoi raki' amon ru kalo ukumin ku ra matoi i Adonia sabap ra makitaak ra baal raginio!

²⁴ Namiot noyo Tuhan ra intok kuno ra rasawat ru kurisi' ru ama' kuno, Raja' Daut. Sinugut noyo ru Tuhan no bantu' Nano am nangani' ra pamarintaan ti raki' am papag kuno. Magibot aku ralalom inggalan ru Tuhan ondo' naayag no ra i Adonia matoi ra orou raiti' niayuk!”

²⁵ Kopongo raginio Raja' Salomo nanusub ri Binaya, am ongoi i Binaya pamatoi ri Adonia.

I Abiatar pinolonggo' am i Joab minatoi

²⁶ Kopongo raginio indagu Raja' Salomo ra Imam Abiatar, “Uli' no ra intok namagunan muli giu' ra Anatot. Sotopot no okou ti ukumin ra matoi, kaa' kalo mangukum aku raginio rirun raino, sabap ra paat okou lakat poyo nabaya' ra ama' kuno, nagalung kou ra Kaban Nabantuan ru Tuhan, am nakaaya' kou naimbolo' nabaya' ra ama' kuno.”

²⁷ Pinolonggo' ru Raja' Salomo i Abiatar intor ra kandoi nano koson ra imam ru Tuhan. Koon raginio noyo, nasauk noyo atan ondo' rinagu ru Tuhan giu' ra Silo intor ra Imam Ili am papag nano.

²⁸ Nokorongog i Joab ra atan ondo' nasauk no. (Minaya' io ri Adonia, kaa' kalo minaya' io ri Absalom.) Ginio ra nagiru' io minongoi ra Kim ru Tuhan am guut ra sangau-sangau ru altar.

²⁹ Tanou intor ri Joab ondo' minongoi ra Kim ru Tuhan am soroi ra kiing ru altar, pinasaboi ra Raja' Salomo. Panusub Raja' Salomo ra ulun koson mangkuot ri Joab sasaban nano minongoi ra Kim ru Tuhan. Taam i Joab ra nagiru' minongoi ra Tuhan sabap ra malaa' io ra Raja' Salomo. Ginio ra nanusub Raja' Salomo ri Binaya mamatoi ri Joab.

³⁰ Ongoi i Binaya ra Kim ru Tuhan am indagu ri Joab, “Nanusub raja' no rirun mingkual.” Taam i Joab, “Kalo. Masaga' aku matoi ragiti.” Saguli' i Binaya ra raja' am pambala' ra taaman ri Joab.

³¹ Indagu raja', “Baalo' noyo atan ondo' rinagu ri Joab no. Potoyo' io am lobongo' io. Koon raginio noyo aku am papag ru Raja' Daut ra bokon no kalo boo mansaan ra binaal ri Joab paat ra io namatoi ra ulun kolondo' sala.

³² Mangukum Tuhan ri Joab sabap ra namatayan ondo' binaal nano ra kalo nakapandai Raja' Daut, ama' kuno. Namatoi i Joab ra ruo ngaulun ondo' kolondo' sala, ruo ngaulun moonsoi poyo intor riso: I Abnir panglima saujor ru Israil am i Amasa panglima saujor ru Jiuda.

³³ Ukuman ra namatayan ra ruo ngaulun tutumula' no saanin ri Joab am papag nano saboi ra sabuoi-buoi no. Kaa' masalok Tuhan mangani' ra kasugutan ra papag ru Raja' Daut ondo' nanturung ra kurisi' nano.”

³⁴ Kopongo raginio minongoi i Binaya ra Kim ru Tuhan, am namatoi ri Joab. Linobong i Joab giu' ra baloi nano giu' ra liwar ru bandar.

³⁵ Kopongo raginio lantiko' ru Raja' Salomo i Binaya masauk ra panglima saujor koson malit ri Joab, am nampalantik ra Imam Jadok koson malit ri Abiatar.

I Simii minatoi

³⁶ Kopongo raginio nampiau Raja' Salomo ri Simii am indagu riso, “Panambaloi no rondo' rirun galama' ragiti, ra Jirusalim ti. Ayan no ra giu' no am pai' pangiruan ra bandar.

³⁷ Amon ru mingkual kou am lumaup ra sungoi boborok Kidron no, maaru' potoyon kou, am okou galama' mansaan ra patayan muno.”

³⁸ Taam i Simii, “Iou. Gagayaan ku ragu muno.” Nabuoi i Simii minayan giu' ra Jirusalim.

³⁹ Kaa' pakasail talu ngambilor, ruo ngaulun ulipon ri Simii nagiru' minongoi ra Raja' Akis anak ri Maakga, raja' ru Gat. Paat ri Simii nokorongog ra ulipon-ulipon nano soroi giu' ra Gat,

⁴⁰ nangura' io ra kaladai nano am ongoi ra Raja' Akis giu' ra Gat koson maguyum risilo. Kopongo io nakatuum risilo, ibito' no ilo minuli'.

⁴¹ Pokorongog Raja' Salomo ra ondo' binaal ri Simii,

⁴² nampiau io ri Simii am ragui' no io, “Sala' ka kia nanusub aku rirun magibot ralalom inggalan ru Tuhan ra okou topot-topot kalo mangiruan ra Jirusalim? Nampakara' aku no rirun ra amon ru baalon mu ginio matoi kou! Sala' ka kia nangiou kono am minindagu ra gagayaan mu ragu kuno?

⁴³ Kua kia lungkang kou am minanggal ra susuban kuno?

⁴⁴ Nakapandai kou ra ngaangai' kasalaan muno ra Raja' Daut, ama' kuno. Raino mangukum Tuhan no rirun sabap ra binaal muno.

⁴⁵ Kaa' mambarakat Io raki' am mangikang ra pamarintaan ru Raja' Daut ra sabuoi-buoi no.”

⁴⁶ Kopongo raginio nanusub Raja' Salomo ri Binaya koson mongoi pamatoi ri Simii. Raino Raja' Salomo makakuasa' toojo ralalom ru pamarintaan nano.