1 TUNUNG RU BANSA' ISRAIL 26 - Tanou Moonsoi Timugon

Ulun-ulun magagalung ra Baloi ru Tuhan

¹ Gitio noyo pantayaran ra kandoi koson ra ulun ru Liwi ondo' mangandoi koson magalung ra Baloi ru Tuhan. Intor ra bansa' ru Kora, Misilimya anak ri Kori intor ra sasambaloi ri Ibiasap pinili'.

² I Misilimya mokoondo' tulu' anak ungkuyon ondo' tinulisan inggalan minaya' ra umur: I Jakaria, Jidiail, Jibaja, Jatniil,

³ Ilam, Joganan am Ilyoinai.

⁴ Tunggul no i Obid-Idom pinili'. Binarakat io ri Aki Kapuuno' ra balu' anak ungkuyon. Tinulisan inggalan nilo minaya' ra umur: I Simaya, Jojabad, Joa, Sakar, Nitaniil,

⁵ Amiil, Isakar am Piulitai.

^6-7 Anak katuaan ri Obid-Idom, iono i Simaya, mokoondo' onom anak ungkuyon: I Otni, Ripail, Obid, Iljabad, Iligu am Simakya; ngaangai' no ulun maatang ralalom ru bansa' nilo sabap ra mangapandai ilo kaga', mulu' poyo i Iligu am i Simakya.

⁸ Koson ra kandoi ru ulun magalung, bansa' ri Obid-Idom nangani' 62 ngaulun ungkuyon ondo' maaya' mangandoi raginio.

⁹ Bansa' ru Misilimya nangani' 18 ngaulun ondo' mangapandai.

¹⁰ I Gosa pinili' intor ra bansa' ru Mirari. Io mokoondo' apat anak ungkuyon: I Simri (ama' nano nampalantik riso nasauk ra tingganai kabalu' pana io sala' ka anak katuaan),

¹¹ Ilkia, Tibalia am Jakaria. Ngaangai' no mokoondo' 13 ngaulun ru sasambaloi ri Gosa ondo' nasauk ra ulun magalung ra Baloi ru Tuhan.

¹² Ulun magalung ra Baloi ru Tuhan tinayar ra pulalai-pulalai maya' ra bansa' nilo. Inanian ilo ra kandoi giu' ra ralalom Baloi ru Tuhan koson ra ulun ru Liwi ra bokon.

¹³ Moonong bansa', ondo' bansa' ra maayo kapoam bansa' ra boborok, nagugundi' koson mangaru' ra kulobon garabang ondo' musiti' nilo alungin.

¹⁴ I Silimia mangandoi giu' ra kulobon garabang tampilon ra sirangon. I Jakaria anak nano, ondo' magail mangani' ra bilin moonsoi, nangandoi giu' ra kulobon garabang tampilon ra ralayo.

¹⁵ Obid-Idom nangandoi giu' ra kulobon garabang tampilon ra rabugus, am anak-anak nano nangandoi magalung ra gudang-gudang.

¹⁶ I Supim am i Gosa nangandoi giu' ra kulobon garabang tampilon ra kalasaan am giu' ra Kulobon Garabang Syalikit ondo' intok no giu' ra ralan ondo' magaloi. Nangandoi ilo ra nampapalit maya' ra buoi ondo' inaru'.

¹⁷ Giu' ra tampilon sirangon, moonong orou mokoondo' onom ngaulun magalung ra mangandoi. Giu' ra tampilon ralayo mokoondo' apat ngaulun, am giu' ra tampilon rabugus mokoondo' apat ngaulun. Moonong orou gudang-gudang inalungan ru apat ngaulun magalung; ruo ngaulun magalung ra rondo' gudang.

¹⁸ Giu' ra pabilion tampilon ra kalasaan, apat ngaulun magalung giu' ra ralan maayo am ruo ngaulun magalung ra pabilion no.

¹⁹ Koon raginio noyo pantayaran ra kandoi magalung ra tayar ru bansa' ru Kora am Mirari.

Kandoi ra bokon giu' ra Baloi ru Tuhan

²⁰ Ulun ra bokon ralalom bansa' ru Liwi inanian ra kandoi manalingapu ra kuliamos ru Baloi ru Tuhan am gudang pambulian ra ondo' tinaakan-tinaakan ra tayar ri Aki Kapuuno'.

²¹ I Ladan anak ungkuyon ri Girson; io kinamatuaan ru kukula' bansa', nakaaya' bansa' ru Jiwil anak nano.

²² Anak-anak ri Jiwil, iono i Jitam am i Joil, inanian ra kandoi manalingapu ra gudang-gudang am kausinan ra Baloi ru Tuhan.

²³ Papag ri Amram, Jijgar, Gibron am Ujiil pana natayaran ra kandoi.

²⁴ I Sibuil intor ra bansa' ri Girsom anak ri Musa, iono magalung ra kausinan ra Baloi ru Tuhan.

²⁵ I Sibuil mokoondo' pabukatan ri Silomit nakasunsui ri Iliijir pabukat ri Girsom. Gitilo noyo suang ru papag ri Iliijir saboi ri Silomit: Iliijir, Rigabia, Jisaya, Joram, Jikri, Silomit.

²⁶ I Silomit am pabukat-pabukat nano inanian ra kandoi manalingapu ra ngaangai' tinaakan ondo' pinataak ru Raja' Daut, tingganai-tingganai ru sasambaloi, tingganai-tingganai ru bansa' am panglima-panglima ru saujor.

²⁷ Santayaran intor ra kuliamos tinakou ondo' noowot ralalom ru pangayawan, pinataak nilo koson pakayon ayuk giu' ra ralalom Baloi ru Tuhan.

²⁸ I Silomit am sasambaloi nano pinalansanan kandoi manalingapu ra ngaangai' ondo' tinaakan koson pakayon ayuk giu' ra ralalom Baloi ru Tuhan, nakaaya' ngaangai' taak ondo' tinaakan ru Nabi Samuil, Raja' Saul, Abnir anak ri Nir am i Joab anak ri Jiruya.

Kandoi ru ulun ru Liwi ra bokon

²⁹ Papag ri Jijgar, iono i Kinanya am niayuk anak-anak nano, inanian ra kandoi ru upis pamarintaan am kandoi pangakiman giu' ra Israil.

³⁰ Ngaangai' ugar ru ugama am pamarintaan giu' ra Israil tampilon ra kalasaan ru Sungoi Jordan pinataak ri Gasabia, am ra 1,700 ngaulun pabukat nano; ilo ngaangai' ulun nangauligan kaga' intor ra papag ri Gibron.

³¹ Tingganai ru papag ri Gibron iono i Jiria. Paat ra bilor kaapat ngoopor ra pamarintaan ru Raja' Daut, rondo' nanutunan intor ra papag ri Gibron pinaugar. Ralalom ru nanutunan no napandayan toojo ra gino ngai' nilo mokoondo' ra saujor-saujor mangapanggol ondo' minayan giu' ra Jajir giu' ra wilayah Giliad.

³² Ngaangai' ugar ru ugama am pamarintaan giu' ra Israil tampilon ra sirangon ru Sungoi Jordan, iono giu' ra wilayah ru bansa' ru Rubin, Gad am Manasi Sirangon, pinataak ra 2,700 tingganai ru sasambaloi ri Jiria; ilo ngaangai' ulun nangauligan kaga' ondo' pinili' ri Raja' Daut.