Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Faylimɔn 1 - Ȧŋlemrȧnɛ Ȧfu

1 Pɔl ukɛndɛbira salata Yisɔs Kraystȧŋ, yi Timɔthi ɔwɔnt su, ka Faylimɔn, ɔkos su ubɔthər ka mapanth,

2 dɛ yi ka Afiya, ɔwɔnt bɛra, yi Arkipɔs, ɔkos su ka katim dɛ yi ka aŋfəm ŋa Kuru aŋa gbanɛ ka ȧŋseth a mu;

3 ta aboŋa aŋ yi do rɔmu, yi məthɔfəl, kəwur ka Kuru ɔKas yi ɔMarki Yisɔs Krayst.

4 I bont ȧŋes a mu lɔkɔ o lɔkɔ ka taramnɛ ta mi, rə kəsɔŋ Kuru mɔmɔ.

5 Pəkasifɛ i təl ta mȧbɔthər yi kȧlanɛ ȧke mə ba ta ɔMarki Yisɔs dɛ yi ka aŋfəm ŋɔŋ bɛ.

6 Kaŋka kayeranɛ ka aŋlanɛ a mu kə gbəli yɔ kȧmȧ alɔm aŋ tȧrȧ ta tȧy o tȧy ta su təfinɔ ȧtȧ yi rokor ka Yisɔs Kraystȧŋ.

7 kotȧy-e sə ba məbɔnɛ məbana dɛ yi kəbɛfəth asabu ŋa mabɔthər ma mu, pəkasifɛ mə po bȧkəs tabuth ta aŋfəm ŋa Yisɔs, ɔwɔnt mi.

8 Tiyȧŋ, hali ma i ba naŋ kəbak kəbuth ka Krayst kəyamari mu tə kəyɔ ȧtȧ yi təlompi-e,

9 kɛrɛ salata mȧbɔthər-e, i tha yema nɛmthɛnɛ mu, hali minɛ Pɔlȧŋ, ɔthem ubaki, yi ukɛndɛbira ta Yisɔs Krayst sɔ;

10 i nɛmthɛnɛ mu ta ɔwan kȧmi Onisimɔs ɔwe i po kom ka atɔrɛntha ta mi,

11 ɔwe te la munaŋfas mu-e, kɛrɛ ka-ake ɔ munaŋfas mu yi minɛŋ.

12 I kala kɔ do rɔmu, hali pə yi mɔ i somra kabuth kȧmi gbeŋ.

13 I fela naŋ tə kəbɛnɛ kɔ anɔ kȧmȧ ɔ yɔna mi salata mu ma i yi rə tərəŋka-e salata ȧkɛra kəfinɔ ka Kuru;

14 kɛrɛ i yema hɛ yɔ koko thambe i tȧrȧ ȧŋmerȧ a mu, kȧmȧ kamar ka mu kə te yi pəkasifɛ məyɔ mə yi hɛ, kɛrɛ mə selɔ tə kəyɔ ti.

15 kotȧy-e sɔthlɔm ɔ wur ro rɔmu ta alɔkɔ agbut, kȧmȧ mə gbəli kȧl malanɛ kɔ ta thȧbana;

16 pə yi hɛ mɔ utar sɔ-e, kɛrɛ pəthasi utar, mɔ uwɔnt ubɔthər ta ȧtȧ mi gbeŋ, kɛrɛ pə tha gbethi ta ȧtȧ mu, uwɔnt wɔŋ ka rawuni kəpet dɛ yi ka ɔMarki.

17 Tiyȧŋ bepi mə nənk mi mɔ uyeranɛ ka mu, malanɛ kɔ mɔ to maŋ malanɛ mi.

18 Bepi ɔ po yɔ mu tələs-e, thalɔm ɔ ba rəbey do rɔmu-e, bot amɔlɔ mati ka ȧŋes a mi.

19 Minɛ Pɔl i gbal ti yi kȧta kȧmi gbeŋ, ɔwa minɛ i ti ram ti. (I pa hɛ ta munɔ mɔ mə ba rəbei do rɔmi dɛ yi hali aŋesəm a mu gbeŋ).

20 Yao, ɔwɔnt yɔna mi kamar ake kȧmȧ i ba məbɔnɛ ka ɔMarki; bȧkəs kabuth kȧmi ka Kraystȧŋ.

21 I gbalər mu pəkasifɛ i pələnɛ mu kəpa munɔ mə tə yɔ pəthasi ȧtȧ i pa.

22 Ɔwa bɛnɛnɛ mi ɔyia, pəkasifɛ salata taramnɛ ta mu i gbak ȧmerȧ tə kəder sɔ do rɔmu.

23 Ɛpafras ɔkos mi ka ȧŋseth ȧtərənkȧ salata Yisɔs Krayst, ɔ kori mu.

24 Ya hɔ sɔ Markɔs, Aristarkɔs, Dimas dɛ yi Lukəs, aŋkos mi ka mapanth.

25 Kaŋka ȧŋboŋa ŋa ɔMarki Yisɔs Krayst aŋ yi ka ȧŋmerȧ a mu. Amina.

Themne New Testament © The Bible Society of Sierra Leone, 2009.

Bible Society in Sierra Leone
ကြှနျုပျတို့နောကျလိုကျပါ:



ကြော်ငြာတွေ