Mathiu 15 - Ȧŋlemrȧnɛ Ȧfu

¹ Ka aŋFarisi yi aŋkarmɔkɔ kǝwur ro Yerusalem aŋ der ka Yisɔs, aŋ pa,

² kɔyɛŋ aŋkarande a mu aŋ lǝsǝr makur ma aŋbȧki ma aŋ te yanɛ yeŋka aŋ di-e?

³ kɔ lasi ɔ pa ro ŋaŋ, kɔyɛŋ naŋ sɔ nǝ lǝsǝr aŋyamari ŋa Kuru salata makur ma nu-e?

⁴ kotȧy-e Kuruȧŋ ɔ pa, Yikis ɔkas ka mu yi ɔkara ka mu, dɛ yi; Kɔn ɔwe mǝ fɔf ɔlǝs ta ɔkas thalɔm ta ɔkara-e, ta ɔ fi rafi.

⁵ Kɛrɛ naŋ nǝ pa, Wuni o wuni ɔwe mǝ pa ka ɔkas kɔŋ thalɔm ɔkara kɔŋ, Arǝka ra mi ara gbǝli naŋ munafas mu-e, a sɔŋ ri Kuru-e,

⁶ ɔ ba hɛ sɔ tǝ kǝyikis ɔkas kɔŋ thalɔm ɔkara kɔŋ. Ɔwa nǝ po wop ȧrim ra Kuru ɔyai salata makur ma nu.

⁷ Na amunafaki, pǝ yi ɔlompi ȧte ɔnȧbi Isaya ɔ nȧbi ta ȧtȧ nu ma ɔ pa,

⁸ Aŋfǝm aŋe aŋ yikis mi yi tasǝŋ taŋ, Kɛrɛ ɛmerȧ yaŋ ɛ bɔlȧnɛ mi.

⁹ Kɛrɛ aŋ bȧtho mi gbo kǝtiŋ, aŋ thǝksa ɛmaŋ ya afǝm a kǝpet mɔ mȧthǝksȧ maŋ.

¹⁰ Mȧ ɔ po tela aŋfǝm ro rɔŋɔŋ-e, ɔ pa, Tǝl nu, ɔwa tȧ pǝ sɔk nu.

¹¹ Pǝ yi hɛ arǝka ara mǝ wɔŋ ka kasǝŋ ara mǝ nɔkɔs wuni, kɛrɛ ara mǝ wur ka kasǝŋ, rǝ mǝ nɔkɔs wuni.

¹² Ka aŋkarande ŋɔŋ aŋ der kaŋ pa ro rɔŋɔŋ, Mǝ tȧrȧ kǝpa aŋFarisi aŋ bansȧ maŋ tǝl ȧsim ȧte-i?

¹³ Kɛrɛ ɔ lasi ɔ pa, Ŋǝnt o ŋǝnt aŋa ɔKas kȧmi ro riyana ɔ te tɛp-e, a ba kǝtusi ŋi.

¹⁴ Tey ŋa, aŋ yi gbo afith aŋa kɔtha aŋfith. Ɔwa bepi ufith ɔ kɔtha ufith-e, ŋa ŋarǝŋ aŋ tǝ fumpɔ ro fo.

¹⁵ Ka Pita ɔ pa, Lokthia su aŋlomɔ aŋe.

¹⁶ Ka Yisɔs ɔ pa, Naŋ sɔ nǝ tha ba hɛ kǝsɔthnɛ-i?

¹⁷ Nǝ tɛ hɛ kǝpa rǝka o rǝka ara mǝ wɔŋ ro sǝŋ rǝ thas rokor-i, ɔwa a lǝpsɔ fitha ri-i?

¹⁸ Kɛrɛ mȧtȧy ama wur ka kasǝŋ mǝ wur ka ȧŋmerȧ; ɔwa ame-e, mǝ mǝ nɔkɔs wuni.

¹⁹ Ȧtesoma-e ɛnanɛ ɛlǝs-o, kǝdifǝth-o, kǝrǝp-o, rǝkeiyo, mǝseri ma rǝyem-o yi kǝfɔf Kuru ɔlǝs-e, ɛ wur ka ȧŋmerȧ.

²⁰ Mȧtȧy ame mǝ mǝ nɔkɔs wuni, kɛrɛ tǝ kǝdi kǝte yanɛ kǝ nɔkɔs hɛ wuni.

²¹ Ka Yisɔs ɔ wur ri, ɔ kɔ ka ɛgbap ya ro Tair yi ro Sidon.

²² Ɔwa wuni bom ka ro Kenan ɔ wur ka ɛgbap yati, ɔ sel ɛrɔŋ ɔ pa, Pa, munɔ ɔwan ka Debid, ba mi ȧney. Ukǝrǝfi ɔ sɔmpa ɔwan kȧmi ubɛra.

²³ Kɛrɛ ɔ lasianɛ hɛ kɔ hali dim din. Ka aŋkarande ŋɔŋ aŋ der aŋ nɛmthɛnɛ kɔ, aŋ pa, Yɔ ɔwath ubɛra ɔ kɔnɛ, kotȧy-e ɔ bokǝr su.

²⁴ Kɛrɛ ɔ pa, A som mi gbo ka talɔmɛ tǝsɔkar ta ȧŋseth ŋa Isrɛl.

²⁵ Ka ɔya ɔ der ɔ sɔna kɔ tǝwu, ɔ pa, Pa, mar mi.

²⁶ Ka Yisɔs ɔ pa, Pǝ mar hɛ tǝ kǝgbasi kabo ka aŋfɛth tǝ kǝfitha ki ka ɛtǝn.

²⁷ Kɛrɛ ɔwath ubɛra ɔ pa sɔ, Tǝteŋ Pa, kɛrɛ hali ɛtǝn aŋ di atɔmp ȧte mǝ fumpɔ ro thɔf kǝwur ka aŋthebǝl ŋa aŋmarki ŋaŋ.

²⁸ Ka Yisɔsȧŋ ɔ pa ro ŋɔŋ, Bithaŋ, kȧlanɛ ka mu kǝ bana. Ta pǝ yɔnɛ mu mɔ mǝ mǝ yema. Ka ɔwan kɔŋ ubɛra ɔ yeŋk ka ȧŋlɔkɔ ŋati gbeŋ.

²⁹ Ka Yisɔs ɔ wur ri, ɔ kɔ fatǝr kȧbȧŋ ka ro Kalili. Kɔ gbep ka kateŋ rokɔm, ɔ yirȧ ri.

³⁰ Ka suniya tǝbana tǝ der ro ŋɔŋ tǝ banȧnɛ aŋtǝtkɛ-o, aŋfith-o, tabobo-o, aŋlopanɛ-o yi alɔm agbȧthi, ka a bot ŋa ka ȧtȧtək tɔŋ. Kɔ yeŋkǝs ŋa bɛ,

³¹ haŋ ȧruniya rǝ kabanɛ maŋ nənk tabobo aŋ fɔf, aŋlopanɛ aŋ yeŋk, aŋtǝtkɛ aŋ kɔth yi aŋfith aŋ nənk. Kaŋ yikis ɔKuru ka Isrɛl.

³² Ka Yisɔs ɔ tela ro ŋɔŋ aŋkarande ŋɔŋ, ɔ pa, I ba ȧney ta ȧruniya, ȧtesoma-e aŋ po yi yi minɛŋ mǝrei mǝsas, aŋ ba hɛ ra rǝdi. I yema hɛ tey ŋa ŋa ador, ta thani aŋ pika ro roŋ.

³³ Ka aŋkarande ŋɔŋ aŋ pa ro ŋɔŋ, Reke mǝ sǝ sɔthɔ tǝbo tǝgbathi tǝbeki namsǝr ȧruniya rǝbana are ka ɔdɛr ɔyeŋ ɔwe-e?

³⁴ Ka Yisɔs ɔ yif ŋa, Mɔlɔ tǝbo nǝ ba-a? kaŋ pa, Tamthǝdɛrǝŋ, dɛ yi ɛlop athȧn.

³⁵ kɔ kanɛ ȧruniya tǝ kǝyira yirȧ ro thɔf.

³⁶ kɔ gbasi tǝbo tamthǝdɛrǝŋ yi ɛlop-e, kɔ muti mɔmɔ, ɔ simǝth yi, kɔ sɔŋ aŋkarande ŋɔŋ kȧmȧ aŋ sɔŋ ȧruniya.

³⁷ Ka ŋa bɛ aŋ di aŋ namra, ɔwa aŋ gbas tǝbǝlai tamthǝdɛrǝŋ ka ɛbɛm ɛtianɛ.

³⁸ Ɔwa ŋaŋ aŋa di aŋ yi mɔlɔ ma afǝm aruni ɛwul yanlɛ, kǝte lɔmanɛ aŋfǝm abom yi aŋfɛthȧŋ.

³⁹ kɔ ter ȧruniya, ɔ bȧkȧ ka ȧŋbil, kɔ der ka ȧŋgbȧp ŋa ro Makadan.