Kȧŋȧibinɛ 12 - Ȧŋlemrȧnɛ Ȧfu

¹ Ka a nənk ȧtȧy təkabanɛ təbana ka ȧkȧriyana, mɔ wuni bom ɔ lopra aret, ɔwa aŋof aŋ yi ka tatək tɔŋ ratha, kɔ sara ȧniyɔ ŋa tɔs tɔfɔt tərəŋ.

² Mɔ mɔ yi ka akənt ka kəkom-e, ɔ kulɔ ka ɔbaŋ wati.

³ Ka ȧtȧy təkabanɛ təlɔm tə tɔrinɛ ka ȧkȧriyana; kəla aniŋkinaŋka ubana uyim, ɔwe ba təbomp tȧmthədɛrəŋ yi təlɛn tɔfɔt, dɛ yi ɛniɔ tȧmthədɛrəŋ ka tȧbomp tɔŋ.

⁴ Ka aŋleŋa ŋɔŋ aŋ liŋ ȧgbȧp ŋin ka ɛgbap ɛsas ya atɔs ta kȧriyana, kɔ fitha ti ka ȧdȧru. Ɔwa ȧŋninkinanka ɔ təmȧ rodi ka ɔwuni bom ma ɔ yi ka kəkom-e, tə kəsɔm ɔwan kɔŋ ka ɔlɛmp ma a po kom kɔ-e.

⁵ kɔ kom wath runi ɔwe yi tə kəgbəka tȧbona sɛŋk rɛ kətək ka rəfat, ka a sɛmpi ɔwan kɔŋ lɛɔ, kəŋata kɔ rokɔm kəkɔ ka Kuru dɛ yi ka kawaŋ kɔŋ ka rȧbȧy.

⁶ Ka ɔwuni bom ɔ gbukɛ ro wula ro Kuru ɔ bɛmpanɛ kɔ dɛr, kȧmȧ a wɔnthər kɔ ri mərey awul ŋin tɛmɛ tərəŋ dɛ yi mərey təgba təsas.

⁷ Ɔwa rəfȧ rə wɔŋ ka ȧkȧriyana; Maykɛl yi aŋmȧleka ŋɔŋ aŋ tim ȧŋninkinanka; ka ȧŋninkinanka dɛ yi aŋmȧleka ŋɔŋ aŋ tim sɔ.

⁸ Kɛrɛ aŋ thamrɔ, ɔwa aŋ ba hɛ sɔ məyira ro riyana.

⁹ Ka a wurɔ ȧŋninkinanka ubana, pə yi mɔ ȧŋbok ukur ɔwe a tela ɔkərəfi dɛ yi Sethani, ɔwe tɔns ȧdȧru bɛ. Ka a fitha kɔ ka ȧdȧru dɛ yi aŋmȧleka ŋɔŋ sɔ.

¹⁰ Ka i təlȧ rim rəbana ro riyana rə pa, Kakisi, yi aŋfɔsɔ, yi rȧbȧy ra ɔKuru kȧsu rə po der, yi aŋfɔsɔ ŋa kagbəka ka ɔKrayst kɔŋ; kotȧy-e a po wurɔ ɔkanɛ ɔwe mə kanɛnɛ aŋwɔnt su pali gbɛs rodi ka ɔKuru kȧsu.

¹¹ Kɛrɛ aŋ tham kɔ ka mȧtir ma kaLɔmɛ kəfɛth, yi ka ȧrim ra maseri maŋ; ɔwa aŋ sɔnd ɛŋesəm yaŋ haŋ ka rəfi.

¹² Tiyȧŋ ba məbɔnɛ munɔ kȧriyana, dɛ yi naŋ sɔ aŋa yirȧ ri. Sɛkɛ nu-o, naŋ aŋa yi ka ȧdȧru, dɛ yi ka kȧbȧŋ kəbana; pəkasifɛ Sethani ɔ po thor do rɔnu, ɔwa ɔ ba rəbaŋ rəbana, kotȧy-e ɔ tȧrȧ kəpa ɔ ba gbo alɔkɔ agbut.

¹³ Ɔwa ma ȧŋninkinanka ɔ nənk kəpa a thora kɔ ka ȧdȧru-e ɔ sɔmpar ɔwuni bom ɔwe kom ɔwath runi.

¹⁴ Ka a sɔŋ ɔwuni bom ɛkufna yɛrəŋ ya aŋgboyo ubana kȧmȧ ɔ gbəli fal ka ɔdɛr wɔŋ ro wula, ro a kəlianɛ kɔ ta alɔkɔ, rɛ ɛlɔkɔ, rɛ ɛlɔkɔ ɛkɛthəŋ kəwur ka kəbəpəranɛ ka ȧŋbok ubana.

¹⁵ Ka ȧŋbok ɔ thuf mȧnt kəwur ka kȧsəŋ kɔŋ mɔ mȧnt məfɔl kətaŋ ɔwuni bom kȧmȧ ɔ dim kɔ ka mȧgbonthoni mati.

¹⁶ Kɛrɛ ȧŋthɔf aŋ de mar ɔwuni bom, ka ȧŋthɔf aŋ kanthɛ, aŋ mer kȧbȧŋ ka ȧmȧnt ȧke ȧŋninkinanka ɔ thuf kəwur ka kȧsəŋ kɔŋ.

¹⁷ Ka ȧŋninkinanka ɔ ba rəbaŋ rəbana kəŋamnɛ ɔwuni bom, kɔ bɔnɛ tə kətim aŋwuth ŋɔŋ alɔm, aŋa bɛnɛ ɛyamari ya Kuru, dɛ yi aŋa wop maseri ma Yisɔs Krayst.