AŋKȧletia 2 - Ȧŋlemrȧnɛ Ȧfu

¹ Ma təren tɔfɔt tanlɛ tə po thas-e, i kɔnɛ sɔ ro Yerusalɛm yi Banabasȧŋ, ka i kerȧnɛ Taytɔs sɔ.

² Ɔwa i kɔnɛ mɔ Kuru ɔ ŋaybi mi mȧselɔ mɔŋ, ka i tɔri mapa məfinɔ ma Kuru ama i bɔ kəwandi kətɔŋ ka tȧbona təlɔm, kɛrɛ i lɔma aŋbȧki rə ȧmȧnknɛ, ta thani thɛpɛnɛ i bɔ gbukɛ thalɔm i la gbukɛ kətiŋ.

³ (Kɛrɛ hali ɔkos mi Taytɔs, ɔwe yi uKrik, aŋ yɔ hɛ kȧmȧ a birons kɔ).

⁴ I yɔ ti salata awɔnt ayem aŋa po wɔŋ sɔy, kȧmȧ aŋ de dəkər ta rȧwankom ra su ara sə ba ka Krayst Yisɔs, kȧmȧ a wɔŋȧ su rə kɛndɛbira,

⁵ kɛrɛ sə sɔŋ hɛ ŋa afɛrɛ hali ka alɔkɔ agbut; kȧmȧ tȧteŋ ta mapa məfinɔ ma Kuru tə gbəli tiyȧ do rɔnu.

⁶ Kɛrɛ kəwur ka ŋaŋ aŋa a lɔm mɔ afəm abana bana, (toto ŋa yi, tə ba hɛ mi tȧy o tȧy, Kuru ɔ malanɛ hɛ ader ra wuni), i pa gbo ŋaŋ aŋa a lɔm mɔ afəm abana bana, aŋ bȧr hɛ mi tȧy o tȧy təfu.

⁷ Kɛrɛ maŋ nənk kəpa a po maŋkər mi mapa məfinɔ ma Kuru ta ante birons-e, mɔ mȧ a po maŋkər Pita ta ȧŋbirons;

⁸ (ȧtesoma-e kɔn ɔwe yɔ məpanth kətȧŋȧnɛ ka Pita tə kəyi ɔsom ka ȧŋbirons, kɔnɔ ɔ yɔna sɔ kətaŋ do rɔmi ta ante birons),

⁹ maŋ sɔthnɛ ȧŋboŋa aŋa a po sɔŋ mi-e, Yeməs, Kifas, yi Yɔnȧŋ aŋa a lɔm mɔ məkər ma aŋchɔch-e, aŋ sɔŋ saŋ Banabasȧŋ kȧta kədiyɔ ka məmanɛ; kȧmȧ saŋ sə kɔ ka tȧbona təlɔm, dɛ yi ŋaŋ ka ȧŋbirons.

¹⁰ Aŋ yema gbo kȧmȧ sə te pənɛ ȧŋmɔnɛ, ȧtȧy tin tati i la bȧsər yɔ sɔbɛ.

¹¹ Kɛrɛ ma Pita ɔ der ro Antiɔk-e, i pɛnsa kɔ ro der kəri kɔŋ pəkasifɛ ɔ po ba məthɛkɛ.

¹² Ȧtesoma-e yeŋka afəm alɔm aŋ der kəwur ka Yeməs-e, ɔ di yi tȧbona təlɔm, kɛrɛ maŋ der-e, ɔ kȧl mədarəŋ kɔ gbaskinɛ rə kənesa ŋaŋ aŋa yi ka ȧŋbirons.

¹³ Ka aŋYuda alɔm sɔ aŋ yɔ kayɔr kin kati dɛ yi kɔn haŋ aŋ po yɛthas hali Banabasȧŋ.

¹⁴ Ma i nənk kəpa aŋ kɔth hɛ toloŋ kətȧŋȧnɛ ka tȧteŋ ta mapa məfinɔ ma Kuru-e, i pa ka Pita rodi ka ŋaŋ bɛ, Bepi munɔ ma mə yi uYuda-e, mə yɔ mɔ tȧbona təlɔm, dɛ yi mɔ uYuda thahɔ, ta kɔyɛŋ mə yema yɔ tȧbona təlɔm aŋ yɔ mɔ aŋYuda-e?

¹⁵ Saŋ aŋa a kom aYuda-e, afəm ŋa ahakɛ ŋa tȧbona təlɔm thahɔ,

¹⁶ ma pə yi sə tȧrȧ kəpa wuni kəpet ɔ sɔthɔ hɛ məmari salata mȧyɔs ma ȧŋthɔ, thambe ka kȧlanɛ ka Yisɔs Krayst, tiyȧŋ hali saŋ sə po lanɛ Yisɔs Krayst kȧmȧ sə sɔthɔ məmari ka kȧlanɛ ka Krayst, pə yi hɛ ka mȧyɔs ma ȧŋthɔ. Pəkasifɛ ka mȧyɔs ma anthɔ-e, wuni o wuni ɔ gbəli hɛ sɔthɔ məmari.

¹⁷ Kɛrɛ bepi ma sə thɛns məmari rokor ka Kraist-e, a fir su kəyi afəm ŋa ahakɛ-e, sə gbəli pa Krayst ɔ yi ukɔtha ka ahakɛ-i? Saki ti Kuru.

¹⁸ Bepi i mɛm tə kətəmər ȧtȧ i po thɔŋ fȧk-e, i tɔri kəpa i yi uləsər ȧŋthɔ.

¹⁹ kotȧy-e kətȧŋȧnɛ ka ȧŋthɔ i po fi ka ȧŋthɔ kȧmȧ i gbəli ba ŋesəm salata Kurɔŋ.

²⁰ A po taŋtaŋ mi ka akənt kəpəŋkinɛ yi Kraystȧŋ, halisa i ba ŋesəm; kɛrɛ min tha sɔ, pə yi Kraystȧŋ kɔnɔ ɔ yi ukəli rokor kȧmi. Ɔwa aŋesəm aŋa i ŋesəm ka madɛr ka-ake, i ŋesəm kətaŋ ka kȧlanɛ ka ɔWan ka Kuru ɔwe bɔthər mi, kɔ sɔndnɛ ta ȧtȧ mi.

²¹ I yɔ hɛ kȧmȧ ȧŋboŋa ŋa Kuru aŋ yi kətiŋ, kotȧy-e bepi mȧlompi ma yi ka anthɔ-e, Krayst ɔ po fi fu fa fu.