Mȧyɔs ma aŋsom 28 - Ȧŋlemrȧnɛ Ȧfu

¹ Ɔwa ma sə po kisi-e, ka sə tȧrȧ tɛn kəpa ȧŋes ŋa aŋyel ŋə yi Mɛlita.

² Ka aŋfəm ŋa aŋyel aŋ yɔ su ɔfinɔ ɔbana, kotȧy-e aŋ lȧpȧ su nȧnt, kaŋ malanɛ su bɛ salata ȧkɔm yi ɔtȧnk.

³ Kɛrɛ mȧ Pɔlȧŋ ɔ po thoŋkla alik ŋa ɛthɔk-e, ɔ bot yi ka ȧnȧnt-e, ka agbɔrɔ, ma ɔ təlnɛ ɔfei-e, ɔ wur, ɔ gbapsa ka kȧta kɔŋ.

⁴ Ɔwa ma aŋfəm aŋ nənk ɔka ɔ gbapsa ka kȧta kɔŋ-e, aŋ pa, Kəli ɔlaŋgba ɔwe, wuni difəth afəm wɔŋ, hali ma ɔ kisi ro baŋ-e, kɛrɛ məlompi mə selɔ hɛ kɔ kȧmȧ ɔ ŋesəm.

⁵ Kɛrɛ kɔnɔ ɔ fitha ɔka ro nȧnt, ɔwa ɔ təlnɛ hɛ ɔbaŋ.

⁶ Ɔwa ŋaŋ, aŋ nanɛ kəpa ɔ tə boya, thalɔm ɔ fumpɔ ɔ fi lɛmp. Kɛrɛ maŋ kəlɛnɛ ti ɔwoni-e, ɔwa aŋ nənk hɛ koko rə yi kɔ-e, aŋ siŋkar ɛnanɛ yaŋ, aŋ pa, Ukuru wɔŋ.

⁷ Ɔwa ka ȧkələŋ kələŋ kati, tȧkay ta wuni bana tə yi ri. Kɔnɔ ba ȧŋes ŋa Publiɔs, ɔwe malanɛ su, ɔwa ɔ wop su ɔfinɔ tə mərey məsas.

⁸ Ka pə yɔnɛ, ɔkas ka Publiɔs ɔ tu mədɛr məgbipanɛ yi kəgberende. Ka Pɔlȧŋ ɔ wɔŋ ro ŋɔŋ, ɔ ramnɛ, kɔ reŋ kɔ mȧta mɔŋ, kɔ yenkəs kɔ.

⁹ Ma ȧte tə po yɔnɛ-e, aŋlɔm ka aŋyel aŋa ba tətu aŋ der sɔ kɔ yenkəs ŋa.

¹⁰ Aŋe sɔ aŋ yikis su kəyikis kəbana. Ma sə pay tə kəwur ri-e, aŋ bȧksȧ su yɛt bɛ ɛyɛ sə yema ro bil.

¹¹ Kədarəŋ ka yof ɛsas-e, sə wur ri rə abil ŋa Alɛksandria aŋa po təmȧ ka aŋyel ka ȧŋlɔkɔ ŋa ɔtaŋk, ɔwa aŋ ba aŋlomar Tabari təruni.

¹² Ma sə bek ro Sirakus-e, sə ba ri mərey məsas.

¹³ Kəwur ri sə kȧpli, ka sə bek ro Rekiyɔm. Ma ȧrey ŋin aŋ thas-e, afef ŋa aŋdiyɔ aŋ sɔŋ, ɔwa ka ȧŋrey aŋa bekȧ marəŋ-e, sə bek ro Putioli,

¹⁴ ro sə bəp aŋwɔnt aŋa nɛmthɛnɛ su kȧmȧ sə yi yi ŋaŋ ta mərey tȧmthədɛrəŋ. Ɔwa ya sə der ro Rom.

¹⁵ Ɔwa ma aŋwɔnt ri aŋ təl ta ȧtȧ su-e, aŋ der gbans su haŋ aŋ bek ka ɔdɛr ɔthila wa ro Apiyɔs yi ɛseth ɛyiya ɛsas, aŋa pə yi ma Pɔl ɔ nənk ŋa-e, ɔ muti Kuru mɔmɔ kɔ bȧk kəbuth.

¹⁶ Ɔwa ma sə bek ro Rom-e, a ter Pɔlȧŋ kȧmȧ ɔ yirȧ thɔkɔŋ, ɔwa utim ukin ɔ bumər kɔ.

¹⁷ Ka pə re yi kədarəŋ ka mərey məsas-e, Pɔlȧŋ ɔ tela aŋkərbomp kətɔŋ ka aŋYuda dɛr rɔkin. Maŋ po thoŋklanɛ dɛr rɔkin-e, ɔ pa ro ŋaŋ, Aŋwɔnt a mi, minɛŋ hali ma i te yɔ tȧy o tȧy tələs ka aŋfəm thalɔm matanɛ ma aŋkas a su-e, a lȧnki mi ukɛndɛbira kəwur ro Yerusalɛm ka mȧta ma aŋRom.

¹⁸ Maŋ po mi gbɛŋgbɛŋ-e, aŋ tə ter mi naŋ kotȧy-e aŋ fir hɛ tȧy o tȧy ȧtȧ yi təbeki tə kədif mi.

¹⁹ Kɛrɛ ma aŋYuda aŋ fɔf ti ɔləs-e, i bot ti rə ȧmerȧ tə kəlaŋkli ȧŋpa a mi ka Sisar. Pə yi hɛ kəpa i ba tȧy tə kəgbanthir ȧŋbona a mi.

²⁰ Tiyȧŋ ta ȧtȧy ȧte i som kətela nu kȧmȧ sə nəŋkanɛ, ȧtesoma-e salata kagbak ȧmerȧ ka Isrɛl a kotər mi akɔrɛntha ake.

²¹ kaŋ pa ro ŋɔŋ, Sə sɔthɔ hɛ ɛreka kəwur ro Yudia ta ȧtȧ mu, ɔwa aŋwɔnt sɔ aŋ der hɛ tə kəkara akanɛ thalɔm tȧy o tȧy tələs ta ȧtȧ mu.

²² Kɛrɛ sə yema təlȧ ȧte mə nanɛ-e, kotȧy-e sə tȧrȧ kəpa a fɔf ɔləs ta kagbanth ake dɛr o dɛr.

²³ Ɔwa maŋ po botȧ kɔ arey-e, agbȧthi aŋ der ro ŋɔŋ kaŋ yiya ŋɔŋ. Kɔ yɛrkia ŋa ȧŋpa, ma ɔ seri ta rȧbȧy ra Kuru, kɔ thɔnthɔ ŋa ta Yisɔs ka ȧŋthɔ ŋa Mosis yi ka mȧgbal ma Aŋnȧbi, kətəp ka bəth haŋ rəfɔy.

²⁴ Ɔwa aŋlɔm aŋ lanɛ mȧtȧy ama ɔ fɔf, alɔm aŋ lanɛ hɛ.

²⁵ Ɔwa maŋ te ba rim rin-e, aŋ sakanɛ kədarəŋ ka ma Pɔlȧŋ ɔ fɔf rim rin, ɔ pa, Təlompi tȧŋ ȧtȧ ɔYina məsəm ɔ pa ka kȧsəŋ ka Isaya ɔnȧbi ka aŋkas a nu,

²⁶ ɔ pa, Kɔnɛ ka aŋfəm aŋe, kanɛ ŋa kəpa, Rə kətəl nə tə təl, kɛrɛ pə gbəli hɛ sɔk nu. Dɛ yi rə kənəŋk nə tə nənk kɛrɛ nə gbɛnthas hɛ.

²⁷ kotȧy-e ɛmerȧ ya aŋfəm aŋe ɛ po bȧk mədɛr, Ɛləns yaŋ ɛ taŋa, Ɔwa aŋ po mɔp ɛfɔr yaŋ, Ta thani aŋ nənk yi ɛfɔr yaŋ, Aŋ kȧl təl yi ɛləns yaŋ, Ɔwa aŋ sɔthnɛ ka ɛmerȧ yaŋ Kama aŋ kȧl lafthɛ, Ɔwa kȧmȧ i ramər ŋa,

²⁸ Tiyȧŋ tȧrȧ nu kəpa a somra kakisis ka Kuru ake ka tȧbona təlɔm; ɔwa ŋaŋ aŋ tə təl sɔ.

²⁹ Ma ɔ po fɔf ȧsim ȧte-e aŋYuda aŋ kɔnɛ, ɔwa aŋ ba ȧthonka abana kətɔŋ ka ŋaŋ.

³⁰ Ɔwa Pɔlȧŋ ɔ yirȧ təren tərəŋ təlolok ka aŋ yiya ŋɔŋ ayep ta ȧrȧm, ɔ malanɛ aŋfəm bɛ aŋa wɔŋ ro ŋɔŋ,

³¹ ɔ taməs rȧbȧy ra Kuru, ɔ thəksa mȧtȧy ta ɔMarki Yisɔs Krayst rə kəmintha, ɔwa wuni o wuni ɔ bɛnt hɛ kɔ.