Mȧyɔs ma aŋsom 24 - Ȧŋlemrȧnɛ Ȧfu

¹ Ɔwa kədarəŋ ka mərey tamath-e, Ananayas-əŋ ɔfode ubana ɔ der yi aŋbȧki alɔm, yi Tatulusȧŋ utara rəsəŋ, kaŋ lɔmsa ɔgbəka ta Pɔl.

² Ma a muti kɔ-e, Tərtulus ɔ təp kəgbanthir kɔ-e, ɔ pa, Filiks ubana, ma pə yi ka kȧta ka mu sə ba məthɔfəl məbana-e, ɔwa ka aŋfɔsɔ a mu mə lompəs maləs ta ȧŋbona aŋe-e,

³ sə malanɛ ti alɔkɔ o lɔkɔ yi dɛr o dɛr, ɔwa sə mɔmɔ mu ɔfinɔ finɔ.

⁴ Kɛrɛ kȧmȧ i te sɔmpa mu, i nɛmthɛnɛ mu ka kȧmuyu ka mu tə kəsua su ɛləns rə təpa təthan gbo.

⁵ kotȧy-e sə po fir ɔlaŋgba ɔwe kəyi wuni ləs, ɔwa ɔ fak ɛtotok kətɔŋ ka aŋYuda bɛ ka ȧdȧru, ɔ yi sɔ ubaki ka kagbanth ka aŋNasarɛth.

⁶ Ɔ mɛm sɔ tə kəyifas ȧŋseth ŋa Kuru; ɔwe sə lɛsa, sə yema naŋ thonkas kɔ mɔ mə ȧŋthɔ a su aŋ pa.

⁷ Kɛrɛ ɔkaptin ubana ɔ der nɔy kɔ ka mȧta ma su rə afɔsɔ abana, kɔ yamari kȧmȧ aŋa gbanthir kɔ-e aŋ der ro mu.

⁸ Ɔwa bepi mə gbɛŋgbɛŋ kɔ-e, mun munɔnɛ mə tə tȧrȧ mȧtȧy ame bɛ ta ama sə gbanthir kɔ.

⁹ Ɔwa aŋYuda sɔ aŋ kasa ka kagbanthir kɔŋ, aŋ kȧl pa ya mȧtȧy ame mə yi.

¹⁰ Ɔwa ma ɔgbəka ɔ kapanɛ kɔ tə kəfɔf-e, Pɔlȧŋ ɔ lasi ɔ pa, Ma i tȧrȧ kəpa mə po yi uthoŋkas ta ȧŋbona aŋe ta təren təgbathi-e, ɔ bɔnɛ mi tə kəgbaki;

¹¹ kȧmȧ mə tȧrȧ kəpa pə thas hɛ mərey tɔfɔt mȧrəŋ ma i kɔ ro Yerusalɛm tə kəbatho.

¹² Ɔwa aŋ bəp hɛ mi sə pɛnsanɛ yi wuni o wuni ka ȧŋseth ŋa Kuru, thalɔm kəgbisəŋa ȧruniya ka ȧŋseth agbanɛ, thalɔm ka kȧpet.

¹³ Ɔwa aŋ gbəli hɛ tɔri mu tȧteŋ ta mȧtȧy ama a gbanthir mi.

¹⁴ Kɛrɛ ȧte, tȧ mɛ gbithanɛ ro mu, kəpa kətaŋ ka aRoŋ ara ŋaŋ aŋ tela kəgbanth, ya minɛ i bȧtho ɔKuru ka aŋkas a su, ka i lanɛ mȧtȧy bɛ ama a gbal ka ȧŋthɔ dɛ yi ka Aŋnȧbi.

¹⁵ Ka i ba kagbak ȧmerȧ ka Kuru ȧke ŋaŋ gbeŋ aŋ malanɛ kəpa kȧyokanɛ ka aŋfi kə yi, ta aŋlompi yi ta aŋkənȧ.

¹⁶ Ta ȧte i mɛm kȧmȧ i ba ȧmerȧ ȧferȧ ka Kuru yi ka afəm lɔkɔ o lɔkɔ.

¹⁷ Kərarəŋ ka təren təgbȧthi i der tə kəkara ɛboya ka ȧŋbona a mi, yi yɛt ɛsɔnd.

¹⁸ Katɔŋ ka ɛye aŋ bəp mi ufethər ka ȧŋseth ŋa Kuru, pə yi hɛ yi runiya, thalɔm yi atotok. Kɛrɛ aYuda alɔm aŋ yi ri kəwur ro Asia,

¹⁹ aŋa yi naŋ tə kəbəpər nɔ rodi ka mu kȧmȧ aŋ gbanthir mi bepi aŋ ba naŋ tȧy təlɔm tə kəŋamnɛ mi.

²⁰ Thalɔm yɔ aŋfəm aŋe aŋ lɔm ko tȧy tələs aŋ bəp minɛŋ i yɔ ma i təmȧ rodi ka aŋSanhedrin,

²¹ pəthas gbo ta ȧrim ara i lak ma i təmȧ kətɔŋ ka ŋaŋ kəpa, Ta kȧyokanɛ ka aŋfi tȧ ma thonkas mi thonɔŋ rodi ka mu.

²² Kɛrɛ Filiks-əŋ ma ɔ tȧrȧ ɔfinɔ ta aRoŋ-e, ɔ kəli ŋa, ɔ pa, Bepi Lisias ɔkaptin ubana ɔ der-e, i ti gbɛlɛŋ ȧŋpa a mu finɔ.

²³ kɔ yamari ukaptin kȧmȧ ɔ bɛnɛ Pɔlȧŋ, ɔwa kȧmȧ ɔ yosi kɔ ɔthan, ɔwa kȧmȧ ɔ te bɛnt aŋyathki ŋɔŋ tə kəyɔna kɔ.

²⁴ Kədarəŋ ka mərey məlɔm-e, Filiks-əŋ ɔ der yi Drusila ɔrani kɔŋ, ɔ yi uYuda ubɛra, kɔ som ka Pɔl kȧmȧ ɔ təlȧ kɔ ta kȧlanɛ ka Krayst.

²⁵ Ɔwa mɔ mɔ fɔf ta məlompi-e, yi kəyi ugbɛt, yi kȧder ka ȧŋrey ŋa kathoŋkas-e, Filiks-əŋ ɔ nesa ɔthasər, kɔ pa, Kɔnɛ ras, ma i ba alɔkɔ ȧfɔy tai-e, i ti tela mu.

²⁶ Ɔ nanɛ kəpa Pɔlȧŋ ɔ tə sɔŋ kɔ akala kȧmȧ ɔ gbəli ter kɔ. Tiyȧŋ ɔ som tə kətela kɔ katkat, ɔ fɔfȧnɛ kɔ.

²⁷ Kɛrɛ ma təren tərəŋ tə thas-e, Pɔrsiɔs Fɛstɔs ɔ tiyȧ ka mayira ma Filiks, ɔwa Filiks-əŋ, ma ɔ yema sɔthɔ ȧŋes afinɔ ka aŋYuda-e, ɔ tey Pɔlȧŋ usek.