2 AŋThɛsȧlonika 2 - Ȧŋlemrȧnɛ Ȧfu

¹ Ɔwa sə nɛmthɛnɛ nu awɔnt, salata kȧder ka ɔMarki kȧsu Yisɔs Krayst, dɛ yi kagbanɛ kȧsu yi kɔn,

² kȧmȧ nə te yeŋk ba ȧmerȧ ȧyinkthanɛ thalɔm ayagbanɛ, pə yi a yɛthas nu yi ayina thalɔm rim, ta a pa ras areka aŋa a pa hɔ aŋ wur do rɔsu, kəpa ȧŋrey ŋa ɔMarki aŋ poŋ thɔŋ yi ka-ake.

³ Te selɔ wuni o wuni ɔ tɔns nu hali; kotȧy-e ȧŋrey ŋati aŋ gbəli hɛ bek thambe kakal mədarəŋ kə mɔtha der, ɔwa ɔwuni kati ka ahakɛ, pə yi mɔ-e, ɔwan ka kədinɛ, ɔ mɔtha tɔrinɛ.

⁴ Ɔwe mə tim, kɔ ŋatanɛ kəŋamnɛ kuru o kuru, thalɔm rəka o rəka mə a bȧtho; haŋ thɔŋ kɔnɔ gbeŋ ɔ tə yirȧ ka ȧŋseth ŋa Kuru asəm, kɔ pa kɔn kɔnɔnɛ ɔ yi Kuru Məsabaŋ.

⁵ Nə kala hɛ ȧmerȧ kəpa ka ȧŋlɔkɔ ma i yi ras dɛ yi naŋ, i la tɔri nu mȧtȧy ame-i?

⁶ Ɔwa nə tȧrȧ ara mə bɛnt kɔ ka-ake kȧmȧ ɔ te tɔrinɛ haŋ ȧŋlɔkɔ ŋɔŋ gbeŋ aŋ bek.

⁷ kotȧy-e ka-ake thɔŋ, aŋfɔsɔ ȧmȧnknɛ ŋa məkənə aŋ yɔ məpanth sɔy; kɛrɛ kɔn ɔwe mə wopər ŋi ka-ake, ɔ tə yɔ yi haŋ a tɔŋa kɔ.

⁸ Ka ȧŋlɔkɔ ŋati ɔwuni thanthonɛ ɔwe ɔ tə wur gbafəth, ɔwe ɔMarki ɔ tə dif yi kaŋesəm ka kȧsəŋ kɔŋ, ɔwa ɔ tə kȧl ləsər kɔ kətȧŋȧnɛ ka kȧbəprȧnɛ kɔŋ kəninis ka kȧder kɔŋ.

⁹ Ɔwa katɔrinɛ ka ɔwuni thanthonɛ ɔwe kətaŋ ka mȧyɔs ma Sethani kə tə yi dɛ yi afɔsɔ bɛ-e, rə ɛmisali ɛyem, dɛ yi rə təmɛndɛ,

¹⁰ dɛ yi sɔ rə ɛyaŋfa o yaŋfa ɛləs salata ŋaŋ aŋa mə dinɛ; pəkasifɛ aŋ malanɛ hɛ mabɔthər ma tȧteŋ, kȧmȧ aŋ gbəli kisi.

¹¹ Te ba ti Kuru ɔ somra ŋa mətɔns məbaki mədɛr kȧmȧ aŋ lanɛ rəyem.

¹² Kama a gbəli thonkas ŋa bɛ aŋa pɛnsa tȧteŋ dɛ yi aŋa ba məbɔnɛ ka məkənə.

¹³ Kɛrɛ saŋ sə yi kəsɔŋ mɔmɔ lɔkɔ o lɔkɔ ka Kuru ta ȧtȧ nu, awɔnt abɔthər ŋa ɔMarki, pəkasifɛ Kuru ɔ po thith nu kȧbi ɔtəpɛr tə kəsɔthɔ kəkisi rə kəsəməs kɔ Yina məsəm dɛ yi kȧlanɛ ka tȧteŋ.

¹⁴ Tȧsom Kuru ɔ poŋ tela nu ka ȧkɛra kəfinɔ kȧsu, kȧmȧ nə sɔthɔ aŋyiki ŋa ɔMarki kȧsu Yisɔs Krayst.

¹⁵ Tiyȧŋ awɔnt, təmȧ nu ɔbaksər, ɔwa wop nu mathəksa məkur ama sə po tɔri nu, pə yi rə sim, thalɔm ka areka a su.

¹⁶ Ɔwa ka-ake, ɔMarki kȧsu Yisɔs Krayst kɔn kɔnɔnɛ, yi Kuru ɔKas kȧsu ɔwe po bɔthər su, dɛ yi ɔwe sɔŋ su kəbɛfəth dɛ yi kəgbak ȧmerȧ kəthəbana kətȧŋȧnɛ ȧŋboŋa ŋɔŋ,

¹⁷ kaŋka ɔ bɛfəth ɛmerȧ ɛ nu tə kəbaksər nu rə rim o rim dɛ yi məpanth o məpanth məfinɔ.