2 AŋKɔrenth 1 - Ȧŋlemrȧnɛ Ȧfu

¹ Pɔl, usom ka Yisɔs Krayst ka mȧselɔ ma Kurɔŋ, yi Timɔthi ɔwɔnt su, ka aŋfəm ŋa Kuru aŋa yi ro Kɔrinth, yi ka aŋsəm bɛ aŋa yi ro Akaya bɛ.

² Ta aboŋa yi məthɔfəl mə yi ro nu kəwur ka Kuru ɔKas kȧsu, yi ka ɔMarki Yisɔs Kraystȧŋ.

³ Ta aruba yi ka Kuru, hali ka ɔKas ka ɔMarki kȧsu Yisɔs Krayst, ɔKas ka ȧney, yi ɔKuru ka kȧbɛfəth bɛ;

⁴ ɔwe mə bɛfəth su ka ɛsɔmpanɛ ɛ su bɛ, kȧmȧ saŋ sɔ sə gbəli bɛfəth ŋaŋ aŋa yi rə asɔmpanɛ o sɔmpanɛ, kətȧŋȧnɛ ka kȧbɛfəth gbeŋ ȧke Kuru mɔ bɛfəth su.

⁵ kotȧy-e mɔ mə ɛnakasi ya Kraystȧŋ ɛ la do rɔsu-e, yaŋ sɔ kȧbɛfəth kȧsu kə la asabu ŋa Kraystȧŋ.

⁶ Tiyȧŋ bepi pə yi sə muyu ɛsɔmpanɛ-e, pə yi ta kȧbɛfəth dɛ yi kakisis ka nu; ɔwa bepi pə yi sə sɔthɔ kəbɛfəth-e, kə yi sɔ salata kȧbɛfəth ȧke yɔ nu nə muyu ɛsɔmpanɛ yati gbeŋ ɛyɛ saŋ sɔ sə muyu.

⁷ Ɔwa kagbak ȧmerȧ kȧsu ta ȧtȧ nu kə yi kəbaksər, ma sə tȧrȧ kəpa, mɔ mə nə yi apantnɛ ka ɛsɔmpanɛ-e, yaŋ sɔ nə yi ka kȧbɛfəth.

⁸ kotȧy-e awɔnt, sə yema hɛ nə te tȧrȧ kasɔmpanɛ ȧke bəp su ro Asia, ȧke bora bȧk su asɔbɛ, pəthas ras aŋfɔsɔ a su, haŋ sə thamrɔ rə ȧmerȧ ta ɛŋesəm ɛ su.

⁹ Aŋko, saŋ gbeŋ sə po ba mȧgbək mȧ rȧfi rokor kȧsu, kɛrɛ pə re yɔnɛ kȧmȧ sə te sɛlinɛ ka ɛyɛthɛ su, kɛrɛ kȧmȧ sə sɛlinɛ ka Kuru ɔwe yokas aŋfi.

¹⁰ Kɔnɔ yi ɔwe tafi su ka rafi rəbana rati, kɔ yi tə kətafi su sɔ; ka sə gbak ɛmerȧ ɛ su kəpa ɔ tə bȧsər tafi su.

¹¹ Naŋ sɔ, ta nə mar rɛ kanɛmthɛnɛ ka nu ta ȧtȧ su kȧmȧ afəm agbathi aŋ tə sɔŋ ȧmɔmɔ ta ȧtȧ su salata ȧŋboya aŋa sə po sɔthɔ asabu ŋa tȧramnɛ təgbȧthi.

¹² Kakolonɛ kȧsu ki ake, pə yi mɔ-e, aseri ŋa ɛmerȧ ɛ su-e, kəpa rə məsəm yi tȧteŋ rodi ka Kuru, pə yi hɛ rə kȧtemp ka rawuni kəpet kɛrɛ ka ȧŋboŋa ŋa Kuru, sə po kɔth ka ȧdȧru, ɔwa pə tha gbethi ro rɔnu.

¹³ kotȧy-e sə gbalər hɛ nu mȧtȧy məlɔm thambe ȧtȧ nə gbəli karaŋ yi ȧtȧ nə tȧrȧ; ka i gbak ȧmerȧ sɔ kəpa nə tə sɔthnɛ ti ɔgbenthis,

¹⁴ mɔ mȧ nə po sɔthnɛ ti ɔthan kəpa nə gbəli kolonɛ do rɔsu mɔ mȧ saŋ sɔ sə gbəli kolonɛ do rɔnu ka ȧŋrey ŋa ɔMarki kȧsu Yisɔs.

¹⁵ Asabu ŋa kagbak ȧmerȧ ake-e, i la nanɛ tə kəder ro rɔnu, kȧmȧ nə bȧr sɔthɔ kəmar mȧrəŋ.

¹⁶ I la yema tȧŋ do rɔnu ka kakɔ dɛ yi kakal kȧmi ro Masidonia, kȧmȧ nə paya mi ro Yudia.

¹⁷ Ma i la botəs yaŋ-e, pə yi kəpa i ba ȧmerȧ afəlɛ fəlɛ-i? Thalɔm mȧtȧy ama i botəs-e, pə yi kəpa i nanɛ ma mɔ wuni kəpet mɔ nanɛ ɔwe yi ubɛnɛnɛ tə kəpa, Yao, Yao, dɛ yi, Sako, Sako, yawin-i?

¹⁸ Kɛrɛ mɔ mə Kuru ɔ yi təteŋ-e, ȧrim ra su ro rɔnu rə yi hɛ Yao dɛ yi Sako.

¹⁹ kotȧy-e ɔWan ka Kuru Yisɔs Kraystȧŋ, ɔwe sə taməs kətɔŋ ka nu, minɛŋ-o, Silfenɔs-o, yi Timɔthi-o, ɔ yi hɛ Yao yi Sako, kɛrɛ do rɔŋɔŋ rə yi gbo Yapi.

²⁰ kotȧy-e ɛlahiri ya Kuru bɛ ɛ yi Yao do rɔŋɔŋ, dɛ yi Amina do rɔŋɔŋ, kəkɔ ka aŋyiki ŋa Kuru kətȧŋȧnɛ kȧsu.

²¹ Ɔwa ɔwe mə təmsər su rɛ naŋ rokor ka Kraystȧŋ, rɛ ɔ kȧl sopa su mȧro, kɔn ɔ yi Kuru Məsaba.

²² Ɔ po mathlɛ su sɔ, kɔ po sɔŋ su ɔYina məsəm ka ɛmerȧ ɛ su mɔ masɛkɛ ma aŋruba aŋa sə yi tə kəsɔthɔ.

²³ Halisa i tela Kuru tə kəyi useri ta ȧtȧ mi, mɔ mȧ aŋesəm a mi aŋ tə wosa ti, pə yi tə kətɔri nu ȧŋney aŋe som i te der ro Kɔrinth.

²⁴ Pə yi hɛ kəpa sə ba kəgbəka rokɔm ka kȧlanɛ ka nu, kɛrɛ sə yi amar ŋa mabɔnɛ ma nu, kotȧy-e nə təmȧ rɛ kəlanɛ.