1 Pitar 3 - Ȧŋlemrȧnɛ Ȧfu

¹ Ya pə yi sɔ naŋ arani sanɛ nu ka aŋwos a nu gbeŋ, kȧmȧ pə yi-e, bepi alɔm aŋ wop hɛ ȧrim ra Kuru-e, aŋ tə lafthɛ, kəte ba ȧrim salata mafinɔ ma aŋrani ŋaŋ;

² maŋ nənk mȧyɔs ma nu məlompi mə kuluŋanɛ rənes.

³ Ta ɛyesinɛ ɛ nu ɛ te yi gbo tə kəthesis madɛr ma nu, mɔ-e mȧrusȧ ma aŋfon, yi kagbaksənɛ məbɔŋɔ, thalɔm kəwɔŋ ɛloprȧ ɛwenkwenk.

⁴ Kɛrɛ ta pə yi aŋesəm afu rokor ka nu, aŋa te ba tə kələsə thȧnkȧŋ, dɛ yi ɛyesinɛ ya ȧmerȧ athɔfəl ɛyɛ yi rəka rəkɛŋ rodi ka Kuru.

⁵ Ya afəm abom asəm thəpaŋ aŋ yesinɛ, aŋa bot ȧmerȧ ka Kuru; kaŋ sanɛ ka aŋwos ŋaŋ gbeŋ;

⁶ hali mɔ Sara ɔ wop ȧrim ra Ebrahamȧŋ, kɔ tela kɔ marki; ɔwa nə yi awuth ŋɔŋ abɛra bepi nə yɔ ɔlompi, ɔwa nə selɔ hɛ koko rə ninisnɛ nu.

⁷ Ɔwa naŋ awos, ka ȧŋgbȧp a nu, yiranɛ yi aŋrani a nu rə kətaranɛ kəfinɔ, mɔ ŋa yi arȧnt athasi nu. Ɔwa sɔŋ ŋa ayiki ma nə yi akos ka kəsɔthɔ ȧŋboŋa ŋa aŋesəm. Yɔ nu ȧte kȧmȧ a te bɛnt taramnɛ ta nu.

⁸ Tiyȧŋ ba nu ȧmerȧ ŋin, ba nu ȧney, bɔthərȧnɛ nu mɔ awɔnt, tɔri ȧmerȧ athoranɛ.

⁹ Te nu kala ɔləs ta ɔləs, thalɔm kənal ta kənal; kɛrɛ kala aruba, pəkasifɛ nə tȧrȧ kəpa a po muti nu tə kəsɔthɔ aruba.

¹⁰ Pəkasifɛ, Kɔn ɔwe bɔthər ŋesəm, yi ɔwe yema nənk mərey məfinɔ, Ta ɔ bum ramer rɔŋ kəwur ka mələs, Dɛ yi kȧsəŋ kɔŋ kəte fɔf ayaŋfa.

¹¹ Ta ɔ pɛnsa tələs, ta ɔ yɔ təfinɔ; Ta ɔ thɛns məthɔfəl kȧmȧ ɔ bȧkərȧ ma.

¹² Ȧtesoma-e ɛfɔr ya ɔMarki ɛ yi rokɔm ka aŋlompi, kɔ su ɛləns ka taramnɛ taŋ. Kɛrɛ ader ra ɔMarki rə yi kəŋamnɛ ŋaŋ aŋa mə yɔ tələs.

¹³ Ɔwa kanɛ mə gbəli yɔ nu tələs bepi nə tȧŋ ȧtȧ yi təlompi-e?

¹⁴ Kɛrɛ halisa bepi nə nakasi ta salata məlompi-e, ta pə bɔnɛ nu; te nu nesa maninisanɛ maŋ, ɔwa ta pə te kɛtha nu.

¹⁵ Kɛrɛ pɔlɔ nu Krayst kȧmȧ ɔ yi ɔMarki ka ɛmerȧ ɛ nu; ɔwa yi nu abɛnɛnɛ alɔkɔ o lɔkɔ tə kəgbakia wuni o wuni ɔwe mə yif salata kagbakər ȧmerȧ ȧke yi nu rokor, rə rənes yi məthɔfəl;

¹⁶ kȧmȧ nə bɛnɛ aŋyiko a nu ȧferȧ pər, kȧmȧ pə yi ma a fofiya nu mɔ afəm aŋa yɔ aləs-e, aŋ tə wɔŋ məlap maŋ nənk mȧyɔs ma nu məfinɔ rokor ka Kraystȧŋ.

¹⁷ Pəkasifɛ ɔ fisa-e, bepi mȧselɔ ma Kuru mə yi yaŋ-e, kȧmȧ nə nakasi salata məyɔs məlompi, pəthas mȧyɔs mələs.

¹⁸ kotȧy-e Kraystȧŋ ɔ po thɔŋ nakasi win haŋ thəbana ta ɛhakɛ, ɔlompi ɔ sɔmpanɛ ta aŋkənȧ, kȧmȧ ɔ gbəli kȧrȧ su ka Kuru. A dif kɔ ka madɛr, kɛrɛ a kəlis kɔ ka ɔYina.

¹⁹ Ɔwa kətaŋ ka ɔYina ɔ kɔ kawandi ka ɛyina ro kərəfi,

²⁰ aŋa te wop ȧrim thəpaŋ, ma kamuyu kəlele ka Kuru kə kar ka aŋyamana ŋa Noa, ma ɔ bɛmpa abil, ro afəm athȧn, aŋ yi tamthərɛsas gbo, aŋ kisi ka ȧmȧnt məgbonthoni.

²¹ Ya pə bȧlȧnɛ sɔ ka-ake, kəbaptais kə mə kisis su, ɔwa pə yi hɛ rə kəyak anɔkɔ ŋa madɛr, kɛrɛ pə yi aŋseri ŋa ȧmerȧ ȧferȧ ka Kuru kətaŋ ka kakal yokanɛ ka rafi ka Yisɔs Krayst,

²² ɔwe po kɔnɛ ro riyana, kɔ yi ka kȧdiyɔ ka Kuru; ɔwa amaleka-o, ɛfɔsɔ-o, yi təbomp bɛ aŋ sanɛ thɔŋ ro rɔŋɔŋ.