1 Pitar 2 - Ȧŋlemrȧnɛ Ȧfu

¹ Tiyȧŋ gbapɛ nu məgbɛŋanɛ, yi akansoŋ, yi ɛpa ɛkȧrȧfu kȧrȧfu, yi kətut, dɛ yi kəforthȧnɛ bɛ;

² mɔ təlɛnth, fela nu ȧmȧsȧ mətəteŋ ma ȧrim ra Kuru, kȧmȧ ri kati-e, nə tɛŋa.

³ Ȧtesoma-e nə po thɔŋ tham ȧŋboŋa ŋa ɔMarki,

⁴ ɔwa nə der do rɔŋɔŋ, ɔwe mə yi ȧsar akəli aŋa afəm a kəpet aŋ farki, kɛrɛ aŋ re yi athith dɛ yi abȧki mɔlɔ rodi ka Kuru.

⁵ Ɔwa naŋ gbeŋ mɔ məsar məkəli, a kianɛ nu tə kəseth aseth ŋa ɔYina, tə kəyi rəfode rəsəm, kȧmȧ nə wurɔ sathka təsəm ȧtȧ Kuru mɔ malanɛ kətaŋ ka Yisɔs Kraystȧŋ.

⁶ kotȧy-e mȧgbal məsəm mə pa hɔ, Kəla, i bot ro Sayɔn aŋsar abana ŋa ȧŋkoŋ, Athith dɛ yi abȧki mɔlɔ, Ɔwa kɔn ɔwe mə lanɛ kɔ-e, ɔ ba hɛ kəlap.

⁷ Tiyȧŋ ro rɔnu aŋa lanɛ ɔ yi ukɛŋ, kɛrɛ ka ŋaŋ aŋa te sanɛ, Aŋsar gbeŋ aŋa ȧŋseth aŋ fȧrki-e, Apo səkɛ aŋsar abana ŋa ȧŋkoŋ.

⁸ Dɛ yi sɔ-e, Asar ŋa kəpənthbəla yi agbalaŋ ŋa kəthɛn. Ɔwa aŋ pənthbəla ka ȧrim kotȧy-e aŋ wop hɛ ri mɔ mə aŋ yi tə kəyi kȧbi ka ɔtəpɛr.

⁹ Kɛrɛ naŋ nə yi ȧbɔnshɔ ȧthith, rəfode ra rȧbȧy, abona asəm, afəm agbaskɛ; kȧmȧ nə taməs akori kori ŋa ɔKuru ɔwe po tela nu tə kəwur ka ȧŋsum kəkɔ ka kawalɛ kɔŋ kəkabanɛ.

¹⁰ Ka ɔtɔtɔkɔ nə la hɛ yi afəm, kɛrɛ ka-ake nə yi thɔŋ aŋfəm ŋa Kuru; ka ɔtɔtɔkɔ-e, nə la hɛ sɔthɔ ȧney, kɛrɛ ka-ake nə po thɔŋ sɔthɔ ȧney.

¹¹ Na abɔthər, i nɛmthɛnɛ nu-e, mɔ atik dɛ yi mɔ afəm ŋa ȧbiyas, gbapɛ nu ɛmilɛ ya madɛr ɛyɛ mə tim kəŋamnɛ rafəm.

¹² Kɔth nu ɔlompi kətɔŋ ka tȧbona təlɔm kȧmȧ pə yi, hali aŋ tɛntɛ bont nu afəm aləs-e, maŋ nənk mȧyɔs ma nu məfinɔ, ka ȧŋrey ŋa asɔmpanɛ aŋ tə yikis Kuru Məsaba.

¹³ Sanɛ nu asiraŋ o siraŋ ŋa wuni kəpet ta salata ɔMarki. Pə yi ka ɔbay-o, mɔ ɔbɔli rəkɔm thɔŋ bɛ,

¹⁴ pə yi ka agbəka-o, aŋa ɔ som tə kəthalər aŋyɔ aləs, dɛ yi tə kəyikis aŋyɔ ɔlompi.

¹⁵ Ȧtesoma-e mȧselɔ ma Kuru miəŋ, kəpa ye nə yi tə kəkantha tasəŋ ta ante tȧrȧ rə kəyɔ məfinɔ,

¹⁶ mɔ afəm a kəyaŋkaŋ; kɛrɛ te nu yɔ rȧwankom ra nu rə səkɛ mɔ kibari tə kəyɔ məkənə, kɛrɛ yɔ nu mɔ ɛbɔy ya Kuru Məsaba.

¹⁷ Yikis nu afəm bɛ. Bɔthər nu rawɔnt. Nesa nu Kuru Məsaba. Sanɛ nu ka ɔbȧy.

¹⁸ Naŋ ɛbɔy, sanɛ ka aŋa ba nu rə kəsɔŋ yiki, pə yi hɛ gbo ka aŋfinɔ yi anthɔfəl-e, kɛrɛ ka aŋbȧki rəfɔr sɔ.

¹⁹ kotȧy-e tȧy təkolo tȧŋ bepi wuni ɔ muyu ka kəthalər ȧke te ba asabu ta salata Kuru Məsaba.

²⁰ Ȧtesoma-e ko ȧmɔmɔ mə nə ba-e, bepi nə muyu ma a sap nu ta salata maləs ama nə yɔ-e? Kɛrɛ bepi ma nə yɔ məfinɔ-e, a thalər nu ta ti, ɔwa nə muyu ti, ȧte mə bɔnɛs Kuru.

²¹ Ȧtesoma-e ta ȧte tə a po nu tela, kotȧy-e Kraystȧŋ ɔ sɔmpanɛ ta ȧtȧ su, kətia su amɔl kȧmȧ nə tȧŋ ka mani mɔŋ.

²² Ɔwe yɔhɛ ahakɛ bɛ, ta a pa ras, ɔ fɔf rəyem.

²³ Kɔnɔ, ma a nal kɔ-e ɔ kala hɛ kənal; ma ɔ sɔmpanɛ ɔ gbind hɛ wuni, kɛrɛ ɔ lȧnklinɛ ka ɔwe mə thonkas ɔlompi.

²⁴ Kɔnɔ kati gbeŋ ɔ sara ɛhakɛ ɛ su ka ȧŋdɛr ŋɔŋ ka ȧŋpənki kȧmȧ saŋ ma sə yi sa afi ka ɛhakɛ-e, sə gbəli yi sa akəli ka mȧlompi, ɔwa a yenkəs nu ka tȧsam tɔŋ.

²⁵ Pəkasifɛ nə la yi mɔ təlɔmɛ təthayoŋ, kɛrɛ ka-ake nə kȧlanɛ thɔŋ ka ɔTɔl yi ka ɔGbəka ka rafəm ra nu.