1 AŋKɔrenth 14 - Ȧŋlemrȧnɛ Ȧfu

¹ Tȧŋ tȧŋ nu mə ȧbɔthər, ɔwa fela nu ɛboya ya ro Yina, pə tha gbethi kȧmȧ nə gbəli nȧbi.

² Ȧtesoma-e ɔwe mə fɔf ka kənt kətel-e, ɔ fɔfȧnɛ hɛ afəm, ɔ fɔfȧnɛ Kuru; kotȧy-e pə sɔk hɛ wuni o wuni, ma pə yi ɔ fɔf ɛgbundu kətȧŋȧnɛ ka ɔYina.

³ Kɛrɛ kɔn ɔwe mə nabi-e, ɔ fɔf tə kətempəs ɛmerȧ ya afəm yi kəbaksər dɛ yi kəbɛfəth.

⁴ Ɔwe mə fɔf kənt kətel-e, ɔ tempəs ȧŋmerȧ ŋɔŋ, kɛrɛ kɔnɔ ɔwe mə nabi-e, ɔ tempəs aŋchɔch.

⁵ Pə tə bɔnɛ mi bepi na bɛ nə fɔf tənt tətel, kɛrɛ pə tə bɔnɛ mi ɔthasər bepi nə nȧbi. Ɔwe mə nȧbi kɔnɔ tha yi ubana pəthas kɔn ɔwe mə fɔf tənt tətel, thambe ɔ tepa kȧmȧ aŋchɔch aŋ gbəli sɔthɔ kətemp.

⁶ Ɔwa awɔnt, bepi i der do rɔnu rə kəfɔf kənt kətel-e, ko kəmar mɛ sɔŋ nu-e, thambe i fɔfȧnɛ nu rə kətɔri, thalɔm rə kətara tȧy, thalɔm rə kənabi, thalɔm rə kəthəksa-e?

⁷ Hali ɛyɛt ɛyɛ te ba ŋesəm ɛ wurɔ sim, pə yi kuleŋ-o, thalɔm ɛfer ya nȧbeŋa-o, bepi ɛ wurɔ hɛ sim təgbaskɛ gbaskɛ-e, ko ma gbəli tȧrȧ ȧtȧ ma fɛŋ-e, thalɔm ȧtȧ ma fer-e?

⁸ Bepi kathɛma kə wurɔ rim rəkasi bȧlȧnɛ-e, kanɛ mə bɛnɛnɛ tə kətim-e?

⁹ Ya pə yi sɔ naŋ-e, thambe nə fɔf sim ȧtȧ ma gbəli sɔthnɛ-e, to pə gbəli sɔk wuni ta ȧtȧ nə pa-e? kotȧy-e nə tə fɔf gbo ka kafena.

¹⁰ Sə nanɛ kəpa tənt ta tətəp təgbȧthi tə yi nɔru, ɔwa kənt o kənt kə yi hɛ ȧke te ba akolo.

¹¹ Tiyȧŋ bepi i tɛ hɛ aŋkolo ŋa ȧrim, i ti yi mɔ wuni tel do rɔŋɔŋ ɔwe fɔf. Ɔwa kɔn ɔwe fɔf ɔ tə yi do rɔmi sɔ mɔ wuni tel.

¹² Ya pə yi sɔ naŋ, fela nu ɛboya ɛsəm ɛyɛ ka ɔYina. Tim nu tə kəsɔthɔ ara tha thesa tə kətempəs aŋchɔch.

¹³ Tiyȧŋ ɔwuni ɔwe mə fɔf kənt kətel-e, ta ɔ ramnɛ kȧmȧ ɔ gbəli tepa ki.

¹⁴ kotȧy-e bepi i ramnɛ rə kənt kətel-e, ȧŋmerȧ a mi aŋ ramnɛ, kɛrɛ kȧtȧrȧ kȧmi kə wur hɛ məkomi.

¹⁵ To mə i yɔ thɔŋ-a? I ti ramnɛ rɛ yi ȧŋmerȧ a mi, ɔwa i ti ramnɛ sɔ rɛ yi kasɔthnɛ. I ti leŋ rɛ yi ȧŋmerȧ a mi, ɔwa i ti leŋ sɔ rɛ yi kasɔthnɛ.

¹⁶ Bepi pə yi hɛ ti-e, ma mə ruba ŋa rɛ yi ȧŋmerȧ a mu-e, to kɔnɔ ɔwe te tȧrȧ ɔ gbəli pa, Amina, ka kamuti ka mu mɔmɔ-e, ma pə sɔk hɛ kɔ ȧtȧ mə pa-e?

¹⁷ Tə tɛntɛnɛ mə sɔŋ ȧmɔmɔ afinɔ, kɛrɛ mə mar hɛ ulɔm.

¹⁸ I muti ti Kuru mɔmɔ, minɛ i gbəli fɔf tənt tətel pəthasi nu bɛ.

¹⁹ Kɛrɛ kətɔŋ ka aŋchɔch i tha fela tə kəfɔf sim tamath rɛ yi kȧtȧrȧ kȧmi kȧmȧ i gbəli thəksa alɔm sɔ-e, pəthas sim ɛwul tɔfɔt rə kənt kətel.

²⁰ Awɔnt, te nu yi afɛth rə ȧmerȧ, kɛrɛ rə məgbɛŋanɛ yi nu təlɛnth; ɔwa ka kəsɔthnɛ yi nu mɔ afəm abȧki.

²¹ A po gbal ti ka ȧŋthɔ kəpa ye, Kətaŋanɛ ka afəm ŋa tənt tətel dɛ yi ka tasəŋ ta atik-e, i ti fɔfȧnɛ aŋfəm aŋe; kɛrɛ hali ka ȧŋlɔkɔ ŋati-e, aŋ ba hɛ kəsua mi ɛləns, ɔMarki ɔ pa.

²² Tiyȧŋ tənt tə yi hɛ amisali ka aŋa lanɛ, kɛrɛ ka ante lanɛ. Ɔwa kənabi kə yi hɛ ka ante lanɛ, kə yi tɛn ka ŋaŋ lanɛ.

²³ Te ba ti bepi aŋchɔch alolok aŋ po thoŋklanɛ rɔkin-e, ɔwa ŋa bɛ aŋ fɔf tənt tətel-e, ɔwa afəm alɔm aŋ wɔŋ aŋa te tara-e thalɔm aŋa te lanɛ-e, aŋ ba hɛ kəpa nə yi apəŋk-i?

²⁴ Kɛrɛ bepi ŋa bɛ aŋ nabi-e, ɔwa ukin ɔwe te lanɛ-e, thalɔm ɔwe te tȧrȧ ɔ wɔŋ-e, ŋa bɛ aŋ tɔri kɔ, ɔwa ŋa bɛ aŋ ŋap kɔ.

²⁵ Ya a yɔ ɛgbundu ya ȧŋmerȧ ŋɔŋ ɛ ŋaibɛ; ɔwa kɔnɔ rə kəgbəpsȧ ro thɔf ɔ tə ramnɛ Kurɔŋ, rɛ yi ɔ tə gbithanɛ kəpa Kuru ɔ yi rɛ nu tə tɛntɛnɛ.

²⁶ To pə yi thɔŋ-a awɔnt? Bepi nə thoŋklanɛ rɔkin-e, wuni o wuni ɔ ba aleŋ, ɔ ba kəthəksa, ɔ ba kənt kətel, ɔ ba tȧy təŋȧybi, thalɔm ɔ ba kətepa. Ɔwa yɔ kȧmȧ tȧy o tȧy tə tempəs ȧŋmerȧ.

²⁷ Bepi wuni o wuni ɔ fɔf kənt kətel-e, ta pə yi afəm ŋarəŋ, ta pə te thas asas, ta aŋ yɔ ti kəber kəber; ta ukin sɔ ɔ tepa.

²⁸ Kɛrɛ bepi utepȧ ɔ yi hɛ-e, ta wuni o wuni ɔ taŋk maŋ gbanɛ; ɔwa ɔ yi tə kəfɔf gbo ka ȧŋmerȧ ŋɔŋ yi ka Kuru.

²⁹ Anȧbi ŋarəŋ thalɔm asas aŋ yi tə kəfɔf, ɔwa aŋlɔm aŋ yi tə kəthoŋkas ti.

³⁰ Kɛrɛ bepi a ŋaibi tȧy təlɔm ka ukin ɔwe yirȧ rayɛr, ta ɔtɔtɔkɔ ɔ taŋk.

³¹ kotȧy-e na bɛ nə gbəli nȧbi ukin kin kȧmȧ na bɛ nə thəkəs dɛ yi nə sɔthɔ kəbɛfəth.

³² Ɔwa ɛyina ya Aŋnȧbi ɛ sanɛ ka Aŋnȧbi.

³³ Kuru ɔ yi hɛ ɔKuru ka məsɔkanɛ, kɛrɛ ka məthɔfəl, mɔ mə pə yi ka ɛgbanɛ bɛ ya aŋsəm ŋa Yisɔs.

³⁴ Ta afəm abom aŋ taŋk ka ɛgbanɛ ya aŋchɔch kotȧy-e a selɔ hɛ kȧmȧ aŋ fɔf, kɛrɛ aŋ yi tə kəsanɛ mɔ mə ȧŋthɔ aŋ pa sɔ.

³⁵ Bepi aŋ yema thəkəs tȧy o tai-e, ta aŋ yif aŋwos ŋaŋ ka ɛseth yaŋ, ȧtesoma-e ɔ lapəs ta wuni bom ɔ fɔf ka aŋgbanɛ ŋa aŋchɔch.

³⁶ Ko-e? Mapa məfinɔ ma Kuru mə təpɛ ro rɔnu-i? Thalɔm nia son nə sɔthɔ ma-i?

³⁷ Bepi wuni o wuni ɔ nanɛ kəpa ɔ yi unabi-e, thalɔm wuni ka ro Yina-e, ta ɔ gbithanɛ kəpa mȧtȧy ame ama i gbalər nu mə yi aŋyamari ŋa ɔMarki.

³⁸ Bepi wuni o wuni ɔ yema hɛ tȧrȧ ti-e, ta ɔ tiyȧ ka kate tȧrȧ kɔŋ.

³⁹ Tiyȧŋ, awɔnt, fela nu tə kənabi, ɔwa te bɛnt tə kəfɔf tənt tətel.

⁴⁰ Kɛrɛ yɔ nu mȧtȧy bɛ nəknək dɛ yi ɔlompi.