2 Tesalonicenses 3 - Nuevo Testamento Toba Maskoy

Apkeltemo Pablo nkolhek anmalhneskaso

¹ Engelialheng'a, nengeleltavek na ennengko'o hengellelmalhneskesek kakpota envanka'ak angelpaiaksek ania'a aplhenammap Apveske lhmankek ham kakpota ngkotnek na aktaqmanma apkenmaikamok takha enenlhet'avok ka aktemo lhta ketlhengkap ham apieseksek anak.

² Hengellelmalhneskes nahan kakpota hengeltaqmelkesek Eniapom Neten neksa apkenmahai'a hennaqtevaksek enenlhet meliamolhma, apkeltemengvekho lhma la'a apkeliaskeiam la nhan Eniapom Neten.

³ Eniapom Neten apto have niapak ankek apaivoma, elpasmok hata m'a kakpota nkoliennak meliaskeiam ketlhengkap, enmeivok hata nhan neksa akmahai'a la nkovak ngkolatsekama.

⁴ Nengeliavek ennengko'o ketlhengkap apkelleliahakhave mota nengetlhekmosekamo lhta, etlhengkesek hata nhan mokhom ma'a nengetlhekmosekamo lhta aniem'o Apveske engankok.

⁵ Nengeleltavek na ennengko'o elpasmok Apveske Jesús kakpota ellasekhok po'ok ka aptemo nak ma'a Eniapom Neten apkellamelaiakmek aplhamakho enenlhet'avok, ellangkok na apkeliennaktema kakpota elvaskapok neksa akvai'a la akientalhnema.

Aktaqmanma enmakmama mota

⁶ Ketlhengkap elialheng'a, akieplomo apvesai'a apveske engankok Jesucristo mangeleltok eliepetkangvomok engelialheng'a nentemo lheme nak akhemo nak apkellangiemhaikama metka apkenmakmekama nak kanhan melieplavkeskama netlhekmosekamo lhta.

⁷ Ketlhengkap koka ntasek elvanangkok nentaiangkolha lhta ennengko'o hengelvetai'o lhta ham, akietemo nke lhta nentaiangkolha m'a,

⁸ ma lhta antoiangkok nentekamok pan metka akianmoma la'a, nientelhek anke lhta mota nenmakmekama lhamakho aknem kakpota mongelientalhneskesek apvalho'ok ketlhengkap ham hengellangko nlho mota nentekamok.

⁹ Envanka'a nlho lhta niekhe angellelmalhnama hengelpasmoma aniem'o nelemhama enmaniaie ennengko'o, koka montaiangkok ma'a kakpota nhan etnangkok ketlhengkap ma'a nentaiangkolha lhta ennengko'o.

¹⁰ Neksa nelloma lhta apieseksek anak ham nellangke lhta nhan ennengko'o lhema henganemakha, ka ntemak hengke'e, enenlhet mankonmahai'a la emakmamaha, mankoietok na elhkak aptoma.

¹¹ Nkanek nellengai'ak koka apkelvesai'a moklhem'a apieseksek anak ketlhengkap akhemo lhna ntemak apkellangiemhaikama, mankonmahai'a enmakmamaha, vanlha lhna mota apketlheianveiakmo aptakha la po'ok temma aptakha la nhan apkelvetai'a m'a.

¹² Koka nentangkok nellano ennengko'o enenlhet'avok anak ma'a ntasek enmakmama kakpota elvetak aptekamok, nengeleltavek ennengko'o m'a aniem'o apientalhnemo apveske engankok Jesucristo.

¹³ Koka ketlhengkap engelialheng'a nengeleltavek ellanangko mota qaselha altaqmelo.

¹⁴ Hata apkelvet'o ta po'ok meliehekho vakkahak nennaktalheskeskama nak, meliepetkamankek ma'a kakpota nhan enmankangvomok ma'a.

¹⁵ Koka mellammelhankek na m'a, ntasek koka ennavaksek ma'a metka apkelpalhengkasekama, malha aktonak apkelialheng'a apankavek la'a.

Aktakha nnelha apaivoma Pablo

¹⁶ Hai, askeltavek Apveske apto aktaqmelaikama engvalhok aniapom ellangkok metka altaikama apvalho'ok neska akvai'a lhamakho aktemakha akientalhnema, etnangkok hata mota apketlhelhma'ak ma'a.

¹⁷ Ko'o Pablo astalheskama ehenkek hengke'e nlhenkek evalhok ketlhengkap, akieplomo nhan astalheskama asvesai'a ka ntema mota lhamakho vakkahak astalheskama.

¹⁸ Askeltavek na Apveske engankok Jesucristo eltaqmelkeskesek apkellaniemhaikama aplhamakho ketlhengkap ham.