मत्ती 17 - राना थारु नयाँ नियम

मोशा और एलियाके सँग येशू

¹ जाको छय दिन पिच्छु येशू अपने सँग पत्रुस, याकूब और बिनको भइया यूहन्नाके एक उँचे पहाड उपर अलग लैगओ।

² बिनके अग्गु बाको रुप बदलिगओ। और बाको चहेरा सुर्य हानी चिल्कन लागो,

³ और बाको कुर्ता उजियारो हानी सेतो भओ, तओ मोशा और एलिया बाके सँग बात चित करत दिखाने।

⁴ पत्रुस येशूसे कही, “हे प्रभु, हमके हियाँ रहानके अच्छो हए। तुमर इच्छा हुइहए तओ हियाँ तीन परमेश्वरको आराधना करन बारो तम्भु बनामंगो, एक तुमर ताहीं, एक मोशाके ताहीं और एक एलियाके ताहीं।”

⁵ पत्रुस मसकतए मसकत, चमकदार बादर बिनके तोपदइ, और बादरसे एक अबाज आओ, “जा मिर प्रिय लौंणा हए, जासे मए बहुत खुसी हओं, इनकी बात सुनओ।”

⁶ जब चेला जा सुनीं, तओ बे बहुत जोडसे झसक्के घुपटा पणिगए।

⁷ तओ येशू आएके बिनके छुइ और कही, “उठओ, मतडरओ।”

⁸ जब बे उपर देखीं, बे येशू बाहेक और कोइके नाए देखीं।

⁹ जब बा पहाडसे उतरत रहए, तओ येशू बिनके हुकुम दइ, “जब तक मए, आदमीको लौंणा, मरे मैसे जीबनमे नाए उठेतक, जो कुछ तुम देखे हओ कोइके मत् बतैयओ।”

¹⁰ और चेला बासे अइसे करके पुछीं, “तओ मोशाको नियम कानुन सिखान बारे पहिले एलियाके आन पणैगो कहिके काहे कहात हएं?”

¹¹ बा बिनसे कही, “एलिया नेहात्तओ आबैगो, और सब बातके फिर सुधारैगो।

¹² पर मए तुमसे कहात हओं, एलिया अग्गुसे आइगओ हए, और हमर अगुवा एलियाके सँग बहुत खराब ब्यबहार करीं, और बोके बे मनमानी करीं। उइसीयए मए, आदमीको लौंणा फिर बिनके हातसे बहुत दु:ख भोगंगो।”

¹³ तओ बा बप्तिस्मा देन बारो यूहन्नाके बारेमे कही हए करके चेला बुझीं।

मिर्गी रोगसे अच्छो करी

¹⁴ तओ भिडके ठिहामे आएके एक आदमी येशूके अग्गु आदर देनके ताहीं घुपटा पणके कही,

¹⁵ “प्रभु, मिर लौंणाके उपर दया करओ, काहेकी बोके मिर्गी रोग लागो हए, और बहुत कष्ट भोग रहोहए। बो कभु आगीमे कभु पानीमे गिरपणत हए।

¹⁶ मए मिर लौंणाके अच्छो करंगे कहिके तुमर चेलनके ठिन लाओ रहओं, पर बे बोके अच्छो नाए करपाइं।”

¹⁷ तओ येशू कही, “ए अबिश्वासी और हठी आदमी, कहाँ तक मए तुमरसँग रएहओं? कहाँ तक मए तुमके सहामऔं? बोके मेरे ठिन लियाबओ।”

¹⁸ येशू बोके डाँटी, और भुत बोसे निकरिगओ। बो लौंणा तुरन्त अच्छो हुइगओ।

¹⁹ तओ चेला येशूके ठिन चुप्पएसे आएके पुछीं, “हम बोके काहेनाए निकारपाए?”

²⁰ येशू बिनसे कही, “तुमर अल्पबिश्वासके मारे नाए निकारपाए। नेहात्तओ, मए तुमसे कहात हओं, कि तुमर एक लाहीको दाना बरोबर बिश्वास हए तओ जा डँगा हियाँसे हटीजा कएहओ तओ बो हटीजएहए। और तुमर ताहीं कोइ असम्भब नाए हुइहए।

²¹ (तहुँफिर जा किसिमको भुत प्राथना और उपवास बिना नाए निकरत हए)।”

अपनी मृत्युके बारेमे येशूक दुस्रो भबिष्यबाणी

²² बे गालीलमे इकट्ठा होत येशू बिनसे कही, “मए, आदमीको लौंणा आदमीनके हातमे सौँपो जामंगो।

²³ तओ बे मोके मारङगे, तओ तीन दिन पिच्छु फिर जिन्दा हुइके उठजएहओं।” और बे बेढाम दु:खित भए।

मन्‍दिरको कर

²⁴ जब येशू और बाके चेला कफर्नहुम सहरमे आए, और मन्दिरको कर उठान बारे पत्रुसके ठिन आएके कहीं, “का तुमर गुरु कर नाए तिरत हए?”

²⁵ बो कही, “हाँ तिरत हए।” जब पत्रुस घरमे घुसो तओ येशू बिनसे सुरुमे कही, “सिमोन, तुमर बिचार का हए? पृथ्वीके राजा, महसुल और कर कासे उठात हएं? अपन लौंणासे कि औरनसे?”

²⁶ पत्रुस जबाफ दइ, “औरनसे।” येशू बिनसे कही, “तओ त लौंणनके कर तिरनके नाए पणैगो।

²⁷ पर बे हमसे नाए दिक्कामए करके, समुन्दरमे जाएके बन्सी लगाबओ, और पहिली पणी मछ्री लियाओ। और बोको मुँहुँ खोलैगे तओ तुम एक चाँदीक लोहोटा रुपैया पएहओ। बो लैजाएके तुमर और मिर कर बिनके देओ।”