RUKA 7 - Kîrîîkanîro Kîîyerû

Yiesû ooria mûruti ngûgî wa mûtongoria wa njûûrî

¹ Yiesû akwaria mantû monthe mara eendaga antû beegua, auma agu aathi Kaperinaumu.

² Mûtongoria ûmwe wa njûûrî ya Arooma ya acikaarî îgana naarî na mûruti ngûgî aayîîtue mûno. Aarî becû gûkua. Mûnene ûyu neendeete mûruti ngûgî ûyu wake mûno.

³ Akwîgua nkuma ya Yiesû, aatûma akûrû baganoona ba Kîîyaundi bathi kûmwîta aaya kûmworeria we.

⁴ Akûrû babu bagûkinya kîrî Yiesû bamwereka mûno. Bamwîra, “Itûkwona kwagîrîte ûthi ûkamûteetherie we itû.

⁵ Neendeete antû beetû na naatwakithîîrie *sinagoogi.”

⁶ Yiesû aathiyania na bo. Arî akubî gûkinya, mûtongoria ûyu aatûma acoore bathi kwîra Yiesû mîgambo yake. Aabeerire bamwîre, “Mwathani, ûtikeethîînie. Ntikwona ndî mûganu ûntû ûûmba kûthûngîra nyomba yakwa,

⁷ kana niû mbûya kîrî woû. Uga mûgambo ûmwe akî na mûruti ngûgî wakwa akoora.

⁸ Niû ningwa ndî na mûnene ûra ambathaga. Naani ndî na acikaarî bara mbathaga, na nkeera ûmwe, ‘Îthi!’ nathiyaga. Nkeera ûngî n'we, ‘Ncû!’ naayaga. Na nkeera nkombo yakwa n'yo îrûthe ûntû bûna, nîrûthaga.”

⁹ Yiesû aarigara mûno eegua ûgu. Aûndûkîra kîrîndî kîra kîamûthingatîîte akîîra, “Ga nkûbwîra, ntoona muntû arî wîtîgio bûûnene ta bûbû. Wana Isiraeri ationeka nwa ûmwe.”

¹⁰ Bara baatûmîîtwe bagûcooka mûciî kwa mûnene ûyu aabatûmîîte, beethîra mûruti ngûgî akwora.

Yiesû aariûkia mwana wa mûka ntigwa

¹¹ Gûgûkea rûûni, Yiesû aathi taûni yeetagwa Naini. Aathiyaniirie na arutwa baake na antû bangî baingî bamûthingatîîte.

¹² Agûkinya akubî na mwîrîga wa taûni înu, oona antû bakamatîîte ntungu ya muntû na îtaratî. Muntû ûyu aarî mwana wa mûka ntigwa. Gina ataarî na kaana kangî, nwa gaku gonka. Ikwarî na antû baingî ba taûni înu bara baayîîte kûûmîîria mwekûrû ûyu.

¹³ Mwathani akwona mwekûrû ûyu amwîgua kîao. Amwîra, “Tiga kûrîra.”

¹⁴ Yiesû aathiyanga akubî, aaringithia îtaratî rîru ntungu yakamatîîtwe na rîo. Bara baakamatîîte baarûngama. Yiesû auga, “Mûthaka, ndîkwîra, ûka!”

¹⁵ Mwana ûyu aakuîte aûka aakara nthî, aanjîîria kwaria. Yiesû aacooka amûnenkanîra kîrî gina.

¹⁶ Antû bonthe baamaka, baakumia Ngai bauga, “Wana tiû tûgûtûmîrwa kîroria gîetû kîînene! Ngai akûûya kîrî antû baake!”

¹⁷ Nkuma ya Yiesû yatambua gûntû kunthe gîteere kîa Njundea na gûntû kûra kwamîthiûrûkîîte.

Antû bara baatûmîîtwe i Njoana Mûbaatithania

¹⁸ Njoana eerwa mantû mamu monthe n'arutwa baake. Eeta baîrî ba bo

¹⁹ abatûma kîrî Mwathani, abeera bathi bamûûrie, “I woû tweerirwe ûkaaya kana n'ûngî?”

²⁰ Antû babu Njoana aatûmîîte bagûkinya kîrî Yiesû bamwîra, “Ga tûtûmîîtwe i Njoana Mûbaatithania tûkûûria kana, ‘I woû tweeriirwe ûkaaya kana n'ûngî?’ ”

²¹ Îgiitaani rîru rîongwa, Yiesû ooria antû baingî ndwari ira baarî na cio. Eegatia irundu bithûûku na aatûma ntûngi itua kwona.

²² Nyuma ya ûgu Yiesû aacookeria atûmwa ba Njoana kîûria kîao abeera, “Cookaani bwîre Njoana bûra bwona na bûra bweegua. Ntûngi nikwona, bionje ibikûthi, bara baayie mîtigiri ibakworua, ipûra ibikwîgua, bara bakuû ibakûriûkua, na ntheto îmbega nîgûtûmîîrua kîrî nkîa.

²³ Kîthaarimo i kîrî ûra ambîtîgîîtie atarî na nkanja!”

²⁴ Atûmwa ba Njoana bakûthi, Yiesû aanjîîria kwaria na antû mantû ma Njoana. Abaûria, “Rîra bwathiîte rwanda kwona Njoana rî, n'ata bwerîgîîrîîte? Bwathiîte kwona rûrara rûkiinainua i ruuo?

²⁵ Kana i mbi îîndî bwathiîte kwona? I muntû eekîrîte nguo imbega? Bara beekagîra nguo ta inu boonekaga mîciî ya anene!

²⁶ Kwoogu i mbi bwathiîte kwona? Ti kîroria? Na mma ga nkûbwîra, aarî nkûrûki ya kîroria.

²⁷ N'we agweteetwe *Maandîkooni Maatheru akîîragwa, ‘Ga ngûkwîra, ngaatûma mûtûmwa wakwa mbere ya ûkinya akûrûthîre njîra.’

²⁸ Ga nkûbwîra, kîrî aana bonthe bara baaciarwa n'aka, gûtirî ûngî oonekana mûnene nkûrûki ya Njoana. Îndî kinya ûra oonekaga arî mûniini kîrî bara barî ba ûnene bwa Ngai, n'ûmûnene nkûrûki yake.”

²⁹ Antû bonthe bara baarî agu, kinya arûngithia ûgooti, bakwîgua ûgu bauga wabu Ngai n'ûmwagîru, n'ûntû ibaabaatithîîtue i Njoana.

³⁰ Îndî *Abarisai na aarimû ba watho, n'ûntû bo bateenda Njoana ababaatithia i yerekeeria rîa Ngai baareganire na rîo.

³¹ Yiesû aûria, “I mbi mma mbûmba kûbuanaania n'yo antû ba ntugû ino? Bakari ta mbi mma?

³² Bakari ta twana tûrîîkanîîte thokooni, tûmwe tûkeeraga tûra tûngî, ‘Tuugiirie mîtûûrirû, bwarega kûgoyia. Tûkwina ndwîmbo cia mathiko, bûtirarîra!’

³³ Njoana Mûbaatithania akûrega kûrîa kana kûnyua, bwaugire ‘N'arî na kîrundu kîîthûûku!’

³⁴ Mwana wa Muntû akûûya aarîa na aanyua, bwaugire, ‘Ûyû i muntû wa îtanûka, i mûtogooni, na i mûcoore wa arûngithia ûgooti na eeyia!’

³⁵ Îndî ûûme bwa kîîngai bwonekaga i bwa mma ûtûûrooni bwa bara babutûmagîra.”

Yiesû arî mûciî wa Simioni Mûbarisai

³⁶ *Mûbarisai ûmwe aathookia Yiesû gwake barîyanîra. Yiesû aathûngîra nyomba ya Mûbarisai ûyu, baanjîîria kûrîa irio.

³⁷ Ikwarî na mûka ûmwe îrwaya aakaraga taûni înu. Akûmenya Yiesû naarî kwa Mûbarisai ûyu akîrîyaga irio, aaya na cûûba yûyûri mîtaa.

³⁸ Aarûngama nyuma ya Yiesû agu mbayooni ciake, aanjîîria kûrîra meethori magîîtîgaga. Meetîgagîra mbayo cia Yiesû akîmagiragia na ntundu ciake, agîcuncaga Yiesû mbayo akîmûtûûragîria cio mîtaa înu aakamatîîte.

³⁹ Mûbarisai ûyu eetîîte Yiesû akwona ûgu eebîîra na nkoro, “Ûkeegua muntû ûyû i kîroria, eegua amenyire mûka ûyû ti mwega, i mwîyia!”

⁴⁰ Yiesû naamenyaga bûra Simioni aathûgaanagia. Amwîra, “Simioni, kûrî bu nkwenda gûkwîra.” Simioni amwîra, “Mbîîra, mwarimû.”

⁴¹ Yiesû amwîra, “Ikwarî na antû baîrî baakoobeete muntû ûmwe mbia. Ûmwe aakoobeete inyingî mûno, maita îkûmi nkûrûki ya ûra ûngî. Ûyu ûngî aakoobeete iinkai.

⁴² Bakûremwa kûrîa, ûra aabakoobithîîtie abarekera. Kîrî antû babu barî baîrî rî, n'ûrîkû agaakena mûno eende muntû ûyu mûno?”

⁴³ Simioni amûcookeria amwîra, “Mbuga n'ûra aarekerwe ira nyingî.” Yiesû amwîra, “Ûkûgwata.”

⁴⁴ Aacûûba mûka ûyu, eera Simioni, “N'ûkwona mûka ûyû? Nthûngîîre nyomba yaku na ûtirankundia rûûyî rwa kûthamba mbayo, îndî we akûnthambia mo na meethori maake na aangiria na ntundu ciake.

⁴⁵ Nkûûya, woû ûtirancunca kwonania ûkûnthookia gwaku, îndî kuuma mbûyire mûka ûyû we atiratiga gûncunca mbayo.

⁴⁶ Nkûûya ûtirantîîya ûmbaka maguta kîongo, îndî we akûmbaka mîtaa mbayo.

⁴⁷ Na mma ga nkûbwîra, wana ûkeegua meeyia maake maingîîte bûgana ata akûrekerwa mo n'ûntû nambendeete mûno. Îndî ûra arekagîrwa meeyia maakai eendanaga bûûkai.”

⁴⁸ Yiesû eera mûka ûyu, “Ûkûrekerwa meeyia maaku.”

⁴⁹ Antû bara baakaranîîrîîte na Yiesû bakîrîa baanjîîria kûûrania, “Ka muntû ûyû arî ûû n'ûntû kinya akûrekera antû meeyia?”

⁵⁰ Yiesû eera mûka ûyu, “Ûkwonokua n'ûntû bwa wîtîgio bwaku, îthi na ûkiri.”