RUKA 4 - Kîrîîkanîro Kîîyerû

Yiesû aagerua

¹ Yiesû akiuma bwa muuro wa Njorondani aumire aûyûrîîtwe i Kîrundu Ûmûtheru. Kîrundu amwira rwanda.

² Yiesû aagerua i Nkoma bantû a ntugû mîrongo îna atakûrîa nwa mbi. Akûthiria ntugû inu cionthe, Yiesû aatua kwîgua yûûra.

³ Nkoma yamwîra, “Ûkaaya kwîgua ûrî Mwana wa Ngai, uga iiga rîrî rîtuîke mûgaate.”

⁴ Yiesû amîcookeria amîîra, “Kwandîkîîtwe *Maandîkooni Maatheru, ‘Mûgaate unka ûtiûmba gûtûûria muntû mwoyo.’ ”

⁵ Nkoma yaira Yiesû bantû angî aûkîîru. Yamwonia moonene monthe ma nthîgûrû nthûti îmwe.

⁶ Yamwîra, “Ngakwa watho bwa kwathanaga gûkû kunthe na mwago wa ku unthe ngakwa. Nnenkeretwe moonene mama monthe mpa muntû woora nkeenda.

⁷ Mama monthe ngakwa mo weegua ûkangonga.”

⁸ Yiesû amîcookeria amîîra, “Kwandîkîîtwe Maandîkooni Maatheru, ‘Ûtikaagonge kana ûtûmîkîra ûngî tatiga Mwathani Ngai waku wenka.’ ”

⁹ Kaîrî Nkoma yaira Yiesû taûni îra ntheru ya Njerusaremu, yamwira kûra îgûrû kathûmbîri ka nyomba ya Ngai. Yamwîra, “Weegua ûrî Mwana wa Ngai, teebarûkie kuuma aaga,

¹⁰ n'ûntû kwandîkîîtwe Maandîkooni Maatheru, ‘Ngai akeera araîka baake bakûmenyeere.’

¹¹ Na kaîrî kwandîkîîtwe, ‘Ngai eerîîte araîka baake bakwambîîrie na njara ciao kaingo ûtathuumûrua nwa mbayo ciaku i maiga.’ ”

¹² Yiesû amîcookeria amîîra, “Kwandîkîîtwe Maandîkooni Maatheru, ‘Ûtikaagerie Mwathani Ngai waku.’ ”

¹³ Nkoma îkûmûgeria na njîra cionthe, yathi, yarekana n'we kwa îgiita.

Yiesû aanjîîria gûtûmîîria Gariiri

¹⁴ Yiesû aacooka Gariiri arî na inya ya Kîrundu Ûmûtheru. Nkuma yake yatamba nteere cionthe.

¹⁵ Aarutanaga *masinagoogiini agakumua n'antû bonthe.

Yiesû aaregwa Nasareethi

¹⁶ Yiesû aathi Nasareethi, naara aakûrîrîte. Ntugû ya *Sabatû îgûkinya, wata wîthîre aathi *sinagoogiini. Aarûngama kûthooma *Maandîko Maatheru.

¹⁷ Aanenkerwa îbuku rîa kîroria Isaaya. Aagwûria ara kwandîkîîtwe,

¹⁸ “Kîrundu wa Mwathani arî amwe naani, n'ûntû naanthuurîîte ntûmîîria ntheto îmbega kîrî bara barî na ûkîa. Aantûmire mbîîra agwate ibaathaûre, na mbîîra ntûngi igaatua kwona, nthaûra bara bakûnyamaarua.

¹⁹ Na mbugîîria kîrî antû, ‘Kagiita gagûkinya, Mwathani akoonokia antû baake.’ ”

²⁰ Yiesû aakûnja îbuku aanenkera mûruti ngûgî wa sinagoogi, aakara nthî. Antû bonthe bara baarî sinagoogini înu nwa meetho baamwete.

²¹ Yiesû abeera, “Îmunthî Maandîko mama makûûyûra, wata bûra maathoomwa bûkîîgagua na matû meenu.”

²² Antû bamwona arî muntû wa kûrigaria n'ûntû bwa mantû meega mara aabarîîrie. Baanjîîria kûûrania, “Anga we ti mwana wa Njosebu?”

²³ Yiesû abeera, “Ntirî na nkanja inkûmenya bûrîenda kûmbîîra njuno îra yugaga, ‘Ndagitaarî îborie wengwa,’ kana bûmbîîre ndûthe mantû mara bwîgagua indarûthire Kaperinaumu, gûkû nthîgûrû yenu.

²⁴ Na mma ga nkûbwîra, kîroria gîtitîîyagwa kwao.

²⁵ Na ga nkûbwîra ûmma, îgiita rîa Eriya ikwarî na eekûrû baingî ba ntigwa nthîgûrû ya Isiraeri, rîra mbura yakarîîte îtaura mîanka îthatû na nucu kwagîa yûûra nthîgûrû yonthe.

²⁶ Eriya ataatûmwa Isiraeri athi gûteethia nwa îmwe ya cio. Aatûmirwe kîrî ntigwa îngî ya gataûni geetagwa Carebaathi, akubî na taûni ya Sindoni.

²⁷ Ikwarî na antû baingî baarî na mûtigiri nthîgûrû ya Isiraeri îgiita rîa kîroria Erica. Na gûtirî we wao oorua, tatiga Naamani Mûsîîria.”

²⁸ Antû babu baarî sinagoogiini bakwîgua ûgu baathûûra mûno.

²⁹ Baûka bamwîngatia taûni yao. Bamûkinyia katheng'eng'aani ga kîrîma kîra taûni înu yakîîtwe babangîîte kûmwarûkia.

³⁰ Îndî Yiesû aabuuranîîria gatîgatî ka bo, aathi.

Yiesû ooria muntû aarî na kîrundu kîîthûûku

³¹ Yiesû aathi bwa taûni ya Kaperinaumu îra yarî bwa gîteere kîa Gariiri. Ntugû ya *Sabatû aanjîîria kûrutana antû.

³² Antû bonthe bara baamûthikîîrîîtie baarigara mûno n'ûrutani bwake, n'ûntû aarutanaga na watho kuuma kîrî Ngai.

³³ Gûku *sinagoogiini ikwarî na muntû aarî na kîrundu kîîthûûku. Muntû ûyu augîîria na inya auga,

³⁴ “N'ata ûkwenda naati Yiesû Mûnasareethi? Ka ûûyîîte gûtûthiria kana? Imbiyî woû ûrî ûû. Ûrî Mûtheru kuuma kîrî Ngai.”

³⁵ Yiesû aagondokera kîrundu gîku akîîra, “Kira na uma kîrî muntû ûyû!” Kîrundu gîku kîagwîthia muntû ûyu nthî mbere ya antû, kîauma na gîtaamûguraria.

³⁶ Antû bonthe bara baarî agu baarigara mûno. Baanjîîria kûûrania, “I bûrîkû bûbû! Î muntû ûyû arî na watho na inya ya kwîra irundu biithûûku biume kîrî antû na bikauma.”

³⁷ Nkuma ya Yiesû yatambua gûntû gûku kunthe.

Yiesû ooria mûthoni wa Simioni na antû bangî baingî mûno

³⁸ Yiesû auma *sinagoogiini aathi mûciî kwa baSimioni. Mûthoni wa Simioni wa mûka naayîîtue kûbîîyanîra mwîrî. Antû baanjîîria kwîra Yiesû mantû ma kwayua gwake.

³⁹ Yiesû aathi kîrî we aagondokera kûbîîyanîra gûku aabîîyanîrîte, oora. Aûkîîra warîru aanjîîria kûbagaagûra.

⁴⁰ Kîûgoro riûa rîathûa, bonthe bara antû baao baayîîtue mbayua mwanya mwanya, baareetera Yiesû bo kaingo abooria. Yiesû aigîîra wakîra ûmwe wao njara, bonthe boora.

⁴¹ Yiesû eengatia irundu biithûûku bira antû baingî baarî na bio, biauma bigîkayaga na inya bikauga, “Woû ûrî Mwana wa Ngai!” Yiesû aabigondokagîra na akagiria biaria n'ûntû ibiaiyî we aarî Kîrîstû.

Yiesû agîtûmîîria sinagoogiini

⁴² Rûûni rûkîîrî mûno Yiesû auma taûni înu ya Kaperinaumu, aathi gûntû gûtaarî na antû. Antû baanjîîria kûmûceria. Bakûmwona baacûûgia kûmûrigîîria atikaathi abatiga.

⁴³ Yiesû abeera, “Nwa mwanka nthi taûni ira ingî wana cio ngatûmîîrie ntheto îmbega cia ûnene bwa Ngai, n'ûntû ûgu i bu ndatûmirwe mbûya kûrûtha.”

⁴⁴ Kwoogu Yiesû aathi agîtûmagîîria *masinagoogiini mara maarî gîteere gîku kîa Gariiri.