RUKA 2 - Kîrîîkanîro Kîîyerû

Yiesû aaciarwa

¹ Nyuma ya îgiita rîtarî rîraaya kuuma Njoana agûciarwa, Kaisaarî Aûgûstû aaruta watho auga antû ba nthîgûrû yake bonthe beebandîkithie.

² Rîrî i rîo rîarî îgiita rîa mbere gûtara antû kuuma Akuirino agûtuîka Ngabana wa nthîgûrû ya Sîîria.

³ Wamuntû wonthe aathiyaga kwîbandîkithia naara booyûe baatûûraga tene.

⁴ Njosebu auma taûni ya Nasareethi, gîteere kîa Gariiri, aathi Bethireemu taûni ya baNdaundi n'ûntû aarî wa rûrîîyo rwao.

⁵ Aathiire noogo kaingo beebandîkithia na Maria ûra aakeethagia agûra. Maria naarî na nda.

⁶ Barî Bethireemu, Maria aakinyithia îgiita rîa kûgîa na mwana.

⁷ Aaciara kaana ga kaîyî karî gîtûra îria gîake, akaguîka na nguo, akamaamia rûkongorooni rûra ng'ombe ciarîyagîra. Batoona kîmaamo nyomba ya ageni n'ûntû bwa antû kwingîa.

Arîîthi na araîka

⁸ Ikwarî na arîîthi baareerie ng'ondu ciao rûriîni gûntû gûku.

⁹ Mûraîka wa Mwathani aarûngama mbere yao, mwago wa Mwathani wabamûrîka. Baamaka mûno.

¹⁰ Mûraîka abeera, “Tigaani kûmaka n'ûntû ndaaya kûbwîra ntheto îmbega ya gîkeno kîînene kîrî antû bonthe.

¹¹ N'ûntû îmunthî taûni ya baNdaundi bûgûciarîrwa Mwonokia, n'we i Kîrîstû Mwathani.

¹² Kaana kara bûkoona kaguîkîîtwe na nguo kaamaamua rûkongorooni rûra ng'ombe irîyagîra, gîku i kîo gîkaabûmenyithia n'we Mwonokia.”

¹³ Nthûti îmwe njûûrî ya araîka ba îgûrû na mûraîka ûyu baanjîîria kwina bagîkumagia Ngai. Bainaga,

¹⁴ “Ngai ûra akaraga îgûrû mûno arookumagua, ûkiri ibwîgue bûrî gûkû nthîgûrû kîrî antû baake bara bamûkenagia!”

¹⁵ Araîka bakûbatiga beetia îgûrû, arîîthi beerana, “Tûthiini Bethireemu tûkeebonere ûntû bûbû Mwathani atûmenyithia.”

¹⁶ Bauma agu na mpwî baathi. Bagûkinya beethîra Maria na Njosebu, na kaana kamaamîîtue rûkongorooni rûra ng'ombe ciarîyagîra.

¹⁷ Arîîthi bagûkoona, beera antû mantû mara mûraîka aabeerîîte îgûrû rîa kaana gaku.

¹⁸ Antû bonthe bara beegiirue mantû mara arîîthi baabeerire, baarigara i mo.

¹⁹ Maria aakira na mo akîmathûgaanagîria na nkoro.

²⁰ Arîîthi baacooka naara baumîîte bakîgongaga na bagîkumagia Ngai n'ûntû bwa mantû mara beegîîtue, na n'ûntû bwa kwona mantû makari bûra mûraîka aabeerîîte.

Yiesû airwa nyomba ya Ngai

²¹ Kagenke gaku gagûkinyitha ntugû inyanya gaataanwa geetwa Yiesû. Geetirwe riîtwa warîra keerwe i mûraîka mbere ya kinya kagîa nda ya gina.

²² Îgiita rîa kwîtheria kwa Maria rîakinya wata bûra *watho bwa Musa bwaugîîte kûrûthagwe. Baathûkia kaana baathi na ko Njerusaremu gûkanenkanîra kîrî Mwathani.

²³ Wata bûra watho bwa Mwathani bwaandîkîîtwe bwauga, “Kîîmbere gîa karûme kîonthe gîgeetwa kîîtheru kîrî Mwathani.”

²⁴ Baacooka, wata bûra watho bwa Mwathani bwaugîîte, baarutîra Ngai kîgongwana kîa “Macea mara ma mîciî maîrî kana maunga ma mo maîrî.”

²⁵ Ikwarî na muntû aatûîre Njerusaremu eetagwa Simioni. Aarî muntû ûmwagîru na aakuthûkaga Ngai. Aakaraga eeteereete kwonokua gwa antû ba Isiraeri. Kîrundu Ûmûtheru naarî amwe n'we.

²⁶ Aamwete wîrane amwîra, “Ûtiikua ûtooneete Kîrîstû wa Mwathani.”

²⁷ Simioni aathûngîra nyomba ya Ngai atongoreetue i Kîrundu. Aciari ba Yiesû, ta bo Njosebu na Maria, baira Yiesû nyomba ya Ngai kûringana na bûra watho bwaugîîte kûrûthagwe.

²⁸ Simioni aathûkia Yiesû, amûgwata. Aacookeria Ngai nkaatho, auga,

²⁹ “Îîndî, Mwathani, ûkwingia wîrane bwaku, ndekeeria niû, mûruti ngûgî waku, mbuume nthîgûrû îno na ûkiri.

³⁰ Niû ningwa nkwona Mwonokia na meetho maakwa,

³¹ ûra ûthuuranîrîte antû bonthe bakîonaga.

³² We i werû bwa kûmûrîkîra antû bara batarî Ayaundi, na gûtûma antû baaku, Aisiraeri, boona mwago waku.”

³³ Njosebu na Maria baarigara mûno i mantû mamu Simioni aariirie îgûrû rîa Yiesû.

³⁴ Simioni abathaarima. Eera Maria, “Kaana gaka gagaatûma Aisiraeri baingî baûra kana boonokua. Agaatuîka rwano îndî antû bagaakararia.

³⁵ Mathûgaania ma antû baingî makaumbûrwa. Na woû naawe kîîthikîîro gîgakûmunta nkoro ta rûyiû.”

^36-37 Ikwarî na ntigwa îmwe kîroria yeetagwa Ana. Ana aarî ûmûkûrû mûno. Aarî na ûkûrû bwa mîanka mîrongo înaana na îna. Aarî mwarî wa muntû eetagwa Panueri wa mwîrîga wa baAceri. Akûgûrwa baakarire mîanka mûgwanja, mûrûme aakua. Ana ataatîîraga nyomba ya Ngai mûthenya na ûtugû. Aathiyaga kûromba Ngai na agatîîrîra kûrîa irio n'ûntû bwa maromba.

³⁸ Ana aayîîte nyomba ya Ngai, aaya kagiita gaku Yiesû aareeteetwe. Akûûya, aacookeria Ngai nkaatho. Eera antû bonthe mantû ma kaana gaku bara beeteereete kwonokua gwa antû ba Njerusaremu.

Njosebu na Maria baacooka Nasareethi na Yiesû

³⁹ Njosebu na Maria bakûrûtha mantû monthe wata bûra *watho bwa Mwathani bwaugîîte, beenûka kwao taûni ya Nasareethi, gîteere kîa Gariiri.

⁴⁰ Yiesû aakûra, aagania inya. Aûmea mûno na eegua arî na ûtugi bwa Ngai.

Yiesû arî nyomba ya Ngai arî kaana

⁴¹ Wakîra mwanka îgiita rîakinya rîa kûrîa kîatho gîa *Pasaka, aciari ba Yiesû ibaathiyaga Njerusaremu.

⁴² Yiesû agûkûra aakinyithia mîanka îkûmi na îîrî, wata wîthîre ibaathiire Njerusaremu kîathooni gîa Pasaka.

⁴³ Kîatho gîkûthira, Yiesû aatigwa Njerusaremu aciari baake beenûka. Bataamenya agîtigwa.

⁴⁴ Baathûgaanagia nwa baathiyanîîtie amwe n'we na antû bara bangî. Ntugû îkûthira wabarî rûgendooni, baanjîîria kûmûûrithîria kîrî antû baao na kîrî acoore.

⁴⁵ Gûgûtuîka batikûmwona, rûûni baacooka Njerusaremu kûmûceria.

⁴⁶ Aûkeeni, i rîo baathiire kûmwîthîra arî nyomba ya Ngai, akari na aarimû ba watho abathikîîrîîtie bakîaria na akîbaûragia biûria.

⁴⁷ Antû bonthe bara baamwîgagua ibaarigaraga mûno i ûûme bûra aarî na bu bwa gûcookia biûria.

⁴⁸ Aciari baake bakûmwona baarigara mûno. Gina amûûria, “Mwana wakwa, i mbi n'ûntû watûrutithia ngûgî ta îno? Ga tûtakûmakîîte mûno tûrî na abaagu tûgîgûceria!”

⁴⁹ Yiesû abaûria, “I mbi bûgûnceragîria? Ka bûtakwiyî mbatîîrue kwîgua ndî nyomba ya Baaba?”

⁵⁰ Aciari ba Yiesû bataamenya bûra aabeeraga.

⁵¹ Yiesû aacookania na aciari baake bwa Nasareethi, aakara na bo akîbaathîkagîra. Gina aakaraga na mantû mamu monthe oonaga nkorooni yake.

⁵² Yiesû aathi na mbere kûgania ûûme wabûra aakûraga, agîkenagia Ngai na antû.