NJOANA 3 - Kîrîîkanîro Kîîyerû

Yiesû na Nikondemu

¹ Ikwarî na mûtongoria ûmwe Mûyaundi wa gîkundi kîa *Abarisai eetagwa Nikondemu.

² Ûtugû bûmwe aathi kîrî Yiesû amwîra, “Rabai, itwiyî i Ngai agûtûmîîte ûrî mwarimû, n'ûntû gûtirî we arûtha mantû ma kûrigaria ta mara ûrûthaga twanga Ngai arî amwe n'we.”

³ Yiesû amwîra, “Na mma ga ngûkwîra, twanga muntû agaciarwa îciarwa rîa maîrî, atiûmba kûthi ûneneeni bwa Ngai.”

⁴ Nikondemu amûûria, “Kûûmbîka ata muntû ûmûgima aciarwa kaîrî? Kwaûmbîka agacooka nda ya gina agaciarwa kaîrî?”

⁵ Yiesû amûcookeria amwîra, “Na mma ga ngûkwîra, twanga muntû agaciarwa kaîrî na njîra ya rûûyî na ya gîîkîrundu, atiûmba kûthûngîra ûneneeni bwa Ngai.

⁶ Kîra gîciaragwa i muntû gîkari ta muntû. Na kîra gîciaragwa gîîkîrundu gîkari ta Kîrundu.

⁷ Ûtikaarigare i bûra ndakwîra atî, nwa mwanka bûciarwe îciarwa rîa maîrî.

⁸ Ruuo rwerekagîra wanaara rûkwenda. Nûruîgagua, îndî ûtimenyaga ruumaga kû kana rûthiyaga kû. I ta bu gûkari ûgu kîrî ûra acierwe na njîra ya gîîkîrundu.”

⁹ Nikondemu amûûria, “N'ata ûntû bûbû bûûmbîkananga?”

¹⁰ Yiesû amwîra, “Ûtigûciûra ûntû bûbû, mwarimû agana ûûgû wa Isiraeri!

¹¹ Na mma ga ngûkwîra, twaragia mara twiyî, na tûkûûyagîîra mara twona, îndî bûtiendaga gwîtîgia ûkûûyî bwetû.

¹² Weegua mbwîraga mara matuîkîkaga gûkû nthîgûrû na bûtiîtîgagia rî, n'ata bûgeetîgia ndabwîra mantû ma îgûrû?

¹³ Gûtirî ûngî aakinya îgûrû tatiga Mwana wa Muntû ûra aaumire noogo.

¹⁴ Na wata bûra Musa aûkîîrie njoka rwanda, nwa ta bu Mwana wa Muntû agaûkîîrua,

¹⁵ kaingo muntû wonthe ûra akaamwîtîgia, oona mwoyo wa tene na tene.

¹⁶ “N'ûntû bwa bûra Ngai eendire kîrîndî kîa nthîgûrû neeyanire Mwana wake wa kîmoomwe, kaingo ûra wonthe akaamwîtîgia ataûra, îndî oone mwoyo wa tene na tene.

¹⁷ Ngai ataatûma Mwana wake nthîgûrû aaya kûgiitîra antû îgamba, îndî naaboonokia.

¹⁸ Ûra amwîtîgagia atirî na îgamba, îndî ûra atamwîtîgagia wana n'ûmûgiitîre îgamba mwanka agu tûrî îîndî, n'ûntû atiîtîgîîtie riîtwaani rîa Mwana wa Ngai wa kîmoomwe.

¹⁹ Gîtûmi gîa kûgiitîrwa îgamba i kwîgua werû ibwayire nthîgûrû, îndî antû beendeete mwindu bantû a werû n'ûntû mantû mara barûthaga i maathûûku.

²⁰ Muntû wonthe ûra arûthaga mantû maathûûku nameneete werû na atienda kuumîra, n'ûntû nakuthûkaga mantû mara arûthaga mamenyekana.

²¹ Îndî ûra we arûthaga bûra kwagîrîte, akaraga werûûni, kaingo antû boona arîrûtha kûringana na kwenda kwa Ngai.”

Bûra Njoana Mûbaatithania augire îgûrû rîa Yiesû

²² Nyuma ya ûgu, Yiesû na arutwa baake baathi bwa Njundea, baakarakaranga noogo ma akîbaatithagia antû.

²³ Kagiitaani wagaku, Njoana wana we naabaatithanagîria bantû eetagwa Aenoni, akubî na Sarimu. Aabaatithanagîria noogo n'ûntû ikwarî na rûûyî rwa kûgana. Antû baakaraga bakîîyaga ababaatithia. (

²⁴ Rîru kwarî mbere ya athaîkwa nceera.)

²⁵ Arutwa bamwe ba Njoana ibaakararanagia na Mûyaundi ûmwe îgûrû rîa wîthîre bwa kîîndini bwa kwîtheria.

²⁶ Arutwa ba Njoana baathi kîrî we bamwîra, “Rabai, muntû ûra wagwetaga, ûra bwarî n'we rûteere rûra rûngî rwa muuro wa Njorondani, wana we nakûbaatithania, na kîrîndî kîonthe i noogo gîkwerekera!”

²⁷ Njoana aabeera, “Muntû atiîgua arî na gîntû atarî mwe kîo i Ngai.

²⁸ Na biû bwingwa bûrî akûûyî atî indaugire, ‘Ti niû Kîrîstû, niû igûtûmwa ndî ûmûtûme mbere ya aaya.’

²⁹ Mwiki eegagua arî wa mûgûrani, îndî mûbarûngamîîri, ûra ngûgî yake îrî kûrûngama na kûthikîîria, nakenaga mûno eegua bûra mûgûrani akuuga. Wata ûgu naani i kîo gîtûmîîte mbîgua nkeneete kûthiria.

³⁰ Nwa mwanka we athi agîtuîkaga n'we arî gîtûmi, niû nthi ngîtuîkaga ntirî gîtûmi.”

Ûra arî wa kuuma îgûrû

³¹ “Ûra arî wa kuuma îgûrû n'we mûnene kîrî bonthe. Ûra arî wa kuuma nthîgûrû n'wa nthîgûrû, na aaragia mantû ma kîînthîgûrû. Ûra aumîîte îgûrû n'we mûnene kîrî bonthe.

³² We aaragia mara oona na mara eegua, îndî gûtirî we eetîgagia ûkûûyî bwake.

³³ Muntû ûra eetîgagia ûkûûyî bwake noonanagia wabu Ngai aaragia ûmma.

³⁴ Ûra Ngai atûmîîte aaragia mîgambo ya Ngai, n'ûntû Ngai namweyaga Kîrundu wake wa kûgana.

³⁵ Îthe neendeete Mwana, na namwete wathaani bwa kwathaga bionthe.

³⁶ Ûra eetîgagia Mwana, arî na mwoyo wa tene na tene. Îndî ûra atamwathîkagîra ationa mwoyo, na akaagiitîrwa îgamba bûûthûûku n'ûntû Ngai akaraga athûûri n'we.”