NGÛGÎ 8 - Kîrîîkanîro Kîîyerû

Kûnyamaarua gwa eetîgîri

¹ Kuuma ntugû înu Stibini aûragirwe eetîgîri bara baarî Njerusaremu baanjîîria kûnyamaarua mûno. Banyagaarania bonthe baathi bwa Njundea na Samaria, tatiga atûmwa bonka.

² Antû bamwe baakuthûkaga Ngai baathûkia kiimba gîa Stibini baathika, baakara na kîeba kîînene.

³ Saûrû aatua kûthîînia eetîgîri. Aathiyaga wakîra mûciî akabaruta nyomba bonthe, aka na arûme akabathaîkithia.

Ntheto îmbega yatambua nthîgûrû ya Samaria

⁴ Eetîgîri babu bakûnyagaarania baathiire bagîtûmagîîria kiugo gûntû na gûntû.

⁵ Ûmwe wao eetagwa Piripû aathi taûni ya Samaria aatûmîîria mantû ma Kîrîstû.

⁶ Antû baingî beegua bwega mantû mara Piripû aaragia. Na wabathikîîrîîtie iboonaga biama bira aaringaga.

⁷ Piripû neengatagia irundu biingî biithûûku bikauma kîrî bara beegagua barî na bio. Aabiîngatagia bikauma bigîkayaga na inya. Na nooriirie bionje biingî na ithua biingî.

⁸ Ikwarî na gîkeno kîînene taûni înu.

Simioni na biama biake

⁹ Taûniini înu ikwarî na muntû eetagwa Simioni. Aaringaga biama akarigaria antû ba Samaria, akîboonagia aarî muntû wa gîtûmi.

¹⁰ Bonthe baanene na baaniini ibaamwîtîgîîtie. Baugaga, “Ûyû n'we inya ya Ngai îra yîtagwa inya înene.”

¹¹ Baamwîtîgîîtie n'ûntû naabarigarîîtie na biama bibu aaringaga kwa îgiita rîraaya.

¹² Antû bagwîtîgia ntûmwa îra Piripû aabatûmîîrie îgûrû rîa ûnene bwa Ngai na mantû ma Yiesû Kîrîstû, baabaatithua bonthe, aka na arûme.

¹³ Simioni wana we eetîgia. Akûbaatithua aatua kûthiyanagia na Piripû. Akwona biama biinene na iriga bira Piripû aaringaga, aarigara mûno.

¹⁴ Atûmwa bara baarî Njerusaremu bakwîgua antû ba Samaria ibeetîgîîre kiugo kîa Ngai, baatûma Petûrû na Njoana noogo.

¹⁵ Petûrû na Njoana bakûûya baarombera eetîgîri babu kaingo beewa Kîrundu Ûmûtheru

¹⁶ n'ûntû Kîrundu Ûmûtheru ataarî akûbeendamîîra. Îndî ibaarî bakûbaatithua kwa riîtwa rîa Mwathani Yiesû.

¹⁷ Kwoogu, Petûrû na Njoana babaigîîra njara. Bonthe baagîa na Kîrundu Ûmûtheru.

¹⁸ Simioni akwona atûmwa baigîîra antû njara baagîa Kîrundu Ûmûtheru, eenda kwaa Petûrû na Njoana mbia.

¹⁹ Abeera, “Mpaani inya înu na niû kaingo ûra nkaigîîra njara agîa Kîrundu Ûmûtheru.”

²⁰ Petûrû amûcookeria amwîra, “Ûraûra na mbia ciaku, n'ûntû ûrîthûgaania wagûra kîewa kîa Ngai na mbia.

²¹ Ûtirî ûmwe wetû ngûgîîni îno n'ûntû nkoro yaku îtigûkenia Ngai.

²² Kwoogu îrire ûthûûku bûbû na ûrombe Ngai akûrekere îthûgaanio rîru ûrî na rîo nkorooni, rîîthûûku.

²³ Ndîgûcûûba ûgu nkoona ûrî na rûriitho mûno na ûtaîtwe i meeyia.”

²⁴ Simioni eera Petûrû na Njoana, “Ndomberaani Mwathani bûrî biû ntikoone ûntû nwa bûmwe bwa mamu bwambîîra.”

²⁵ Petûrû na Njoana beeyana ûkûûyî bwao kîrî antû baatûmîîria kiugo kîa Mwathani. Bakûthiria baacooka Njerusaremu wabagîtûmagîîria taûni inyingî cia Samaria.

Piripû na Mwethiopia

²⁶ Mûraîka wa Ngai aaria na Piripû amwira, “Îndama na barabara îra yumîîte Njerusaremu yakûrûkîîra rwanda îthiîte Gasa.”

²⁷ Piripû eendamîîte n'yo oona Mwethiopia ûmwe aarî ûmûkabe eenûkîîte aumîîte Njerusaremu kûromba Ngai. Aarî mûrûngamîîri wa mbia cia Kandaki, mûka ûra aathanaga nthîgûrû înu.

²⁸ Mwethiopia ûyu aakamatîîtwe i nkaarî ya mbaraathi akîthoomaga îbuku rîa kîroria Isaaya.

²⁹ Kîrundu eera Piripû, “Îthi nkaarîîni îîra.”

³⁰ Piripû augia rwîro amûgwatagwata. Eegua mûnene ûyu akîthooma îbuku rîa kîroria Isaaya. Piripû amûûria, “Nûgûciûkîrwa i bûra ûkûthooma?”

³¹ Mûnene ûyu amûûria, “N'ata mbûmba gûciûkîrwa ntarî na muntû wa gûntaûrîra?” Eera Piripû atwe nkaarîîni bakare n'we.

³² Gîcuncî kîa *Maandîko Maatheru kîra aathoomaga kîaugaga, “Aatongoreerue ta ng'ondu îthiîte kûthînjwa, ta kagondu kamaarîîrîîte gakîenjwa guaya, ataatumûra kanyua.

³³ Aarûthîîrwe mantû ma îgi na ûmma bûtaathingatwa. Gûtirî we auga naiyî nciarwa ciake n'ûntû ntugû ciake cia aaga nthîgûrû iciathirire.”

³⁴ Mwethiopia ûyu aûria Piripû, “Ingûkûûria, n'ûû kîroria gîkwarîîria aaga? I kîo kîongwa kana i muntû ûngî?”

³⁵ Piripû aanjîîria rwaria rwake na gîcuncî gîku, amwîra ntheto îmbega îgûrû rîa Yiesû.

³⁶ Bathiîte baakinya bantû kwarî na rûûyî. Mwethiopia eera Piripû, “Ene, I rûûrû rûûyî. Ga kûrî kîo kîûmba kûndigîîria ntikaabaatithue?” [

³⁷ Piripû amwîra, “Bunka gwîtîgîîtie na nkoro yaku yonthe nwa ûbaatithue.” Mwethiopia eera Piripû, “Ingwîtîgia Yiesû Kîrîstû i Mwana wa Ngai.”]

³⁸ Mwethiopia auga nkaarî îrûngamue. Baathûngîra rûûyîîni na Piripû. Piripû amûbaatithia.

³⁹ Bakuuma rûûyîîni, Kîrundu wa Mwathani aathûkia Piripû. Mwethiopia ataamwona kaîrî. Aathi na mbere na rûgendo rwake akeneete.

⁴⁰ Piripû eebona arî taûni yeetagwa Asotas. Aanjîîria gûtûmîîria oogo, aathi na mbere agîtûmagîîria ntheto îmbega taûni cionthe mwanka aakinya taûni yeetagwa Kaisaria.