MATHAYO 4 - Kîrîîkanîro Kîîyerû

Yiesû aagerua

¹ Kuuma agu Yiesû aathûkua i Kîrundu Ûmûtheru amwira rwanda kaingo agerua i Nkoma.

² Akûthiria ntugû mîrongo îna, mûthenya na ûtugû atarûma gîntû, Yiesû aatua kwîgua yûûra.

³ Nkoma yathi yamwîra, “Ûkaaya kwîgua ûrî Mwana wa Ngai, uga maiga mama matuîke mîgaate.”

⁴ Yiesû amîîra, “Kwandîkîîtwe *Maandîkooni Maatheru, ‘Mûgaate unka ûtiûmba gûtûûria muntû mwoyo, îndî kiugo kîonthe kîra kiumaga kîrî Ngai kîamûtûûria.’ ”

⁵ Kaîrî Nkoma yaira Yiesû taûni îra ntheru ya Njerusaremu. Yamwira kûra îgûrû kathûmbîri ka nyomba ya Ngai.

⁶ Yamwîra, “Weegua ûrî Mwana wa Ngai, teebarûkie n'ûntû kwandîkîîtwe Maandîkooni Maatheru, ‘Ngai eerîîte araîka baake bakwambîîrie na njara ciao kaingo ûtathuumûrua nwa mbayo ciaku i maiga.’ ”

⁷ Yiesû aacookeria Nkoma amîîra, “Maandîko Maatheru kaîrî maugîîte ûûgû, ‘Ûtikaagerie Mwathani Ngai waku.’ ”

⁸ Kaîrî Nkoma yaira Yiesû kûra îgûrû kîrîmaani kîîraaya mûno. Yamwonia moonene monthe ma nthîgûrû na mwago wa mo.

⁹ Yamwîra, “Ngakwa mama monthe weegua ûgaaturia maru ûngonge.”

¹⁰ Îgûkinyia agu Yiesû amîîra, “Tigana naani, Saitaani, n'ûntû kwandîkîîtwe Maandîkooni Maatheru, ‘Ûtikaagonge kana ûtûmîkîra ûngî, tatiga Mwathani Ngai waku wenka.’ ”

¹¹ Nkoma yarekana n'we yathi. Araîka baaya bapa Yiesû ûteethio.

Yiesû aacooka Gariiri

¹² Yiesû akwîgua Njoana akûthaîkwa nceera, aacooka gîteere kîa Gariiri.

¹³ Aumire Nasareethi aathi gûtûûra taûni ya Kaperinaumu rûteere rwa îria rîa Gariiri, mwankaani wa mûgongo wa Saburoni na wa Nabutaari.

¹⁴ Ûroria bûra Isaaya aaroriirie bwaûyûra, bûra buugîîte,

¹⁵ “Nthîgûrû ya Saburoni na ya Nabutaari, na bara batûûraga rûteere rwa ûmotho rwa muuro wa Njorondani ûtarîîte bwa îria, Gariiri nthîgûrû ya mîgongo îngî îtarî Ayaundi,

¹⁶ antû bara batûîre mwinduuni, ibooneete werû bûûnene. Bara batûûraga kûra gûkari taka kûrumeene mwindu n'ûntû bwa ûguaya bwa gîkuû, werû bûkûbamûrîkîra!”

¹⁷ Kuuma îgiita rîru, Yiesû aanjîîria gûtûmîîria akiugaga, “Îrireeni meeyia meenu n'ûntû ûnene bwa îgûrû bûkûthengeera.”

Arutwa ba mbere ba Yiesû

¹⁸ Yiesû atambîîte na rûteere rwa îria rîa Gariiri oona ategi ba makûyû baîrî bakîamba neeti ciao bagwata makûyû. Baarî Simioni, ûra kaîrî eetagwa Petûrû, na mûruagina Enderea.

¹⁹ Yiesû abeera, “Nthingataani mbûtuîkithie ategi ba antû.”

²⁰ Bamûthingata warîru baatiga neeti ciao naagu.

²¹ Yiesû akûthiyathiyanga mbere, eethîra antû bangî baîrî. Wana bo baarî muntû na mûruagina. Baarî Njakubu na Njoana. Îthe eetagwa Cabendi. Baarî îtarûûni na îthe bagîtumaga neeti ciao. Yiesû abeeta.

²² Warîru baatiga îthe na neeti ciao bamûthingata.

Yiesû aarutana na ooria aayie

²³ Yiesû aariûnga Gariiri yonthe akîrutanaga antû *masinagoogiini na agîtûmagîîria mantû ma ûnene bwa îgûrû. Kinya nooragia antû ndwari cia mîthemba yonthe na mbayua cionthe ira beegagua barî na cio.

²⁴ Nkuma yake yatamba nthîgûrû ya Sîîria yonthe. Antû bamûreetera aayie bonthe ba mîthemba yonthe, na bara bonthe baathîînaga na njîra ingî inyingî. Kûrî baarî na irundu biithûûku, bangî nkurî, na bangî bonju mîîrî. Yiesû abooria.

²⁵ Kîrîndî kingî mûno kuuma Gariiri, Ndikaporis, Njerusaremu, Njundea, na kinya rûgongo rûra rûngî rwa muuro wa Njorondani kîathingata Yiesû.