MATHAYO 28 - Kîrîîkanîro Kîîyerû

Yiesû aariûka

¹ Ntugû ya *Sabatû îgûkûrûka, rûûni rûûkîîrî mûno ntugû ya Kiumia, Maria Mûmagindari na Maria gina wa Yiesû baaraûka nthikooni kwona.

² Warîmwe nthîgûrû yainaina na inya mûno. Mûraîka wa Mwathani eendama kuuma îgûrû, aathi aingiritia iiga rîra rîakunîkîrîte mûromo wa nthiko ya Yiesû, arîkarîra îgûrû.

³ Mwonekere wake akîonekana aarî na werû ta bwa rweni, na nguo ciake ciarî injerû ce ta îra.

⁴ Akaria bara baacûûbîrîte nthiko bainaina mûno n'ûguaya, baakara ta antû bakuû.

⁵ Mûraîka eera eekûrû babu, “Tigaani kûmaka. Imbiyî i Yiesû ûra arambîîtwe bûgûcûa.

⁶ Îndî atirî gûkû nariûkire wata bûra augire. Ncûûni bwone ara araigîîtwe.

⁷ Cookaani na mpwî bûmenyithie arutwa baake, bûbeere nariûkire na akûthiyaga Gariiri mbere yenu. Bwathi noogo bûkamwona. Na bûtikaariganîrue n'ûgu ndabwîra.”

⁸ Eekûrû babu bauma agu bakiinainaga n'ûguaya, îndî nkorooni ciao ibooyûrîîtwe i gîkeno. Baathi baugîîtie rwîro kwîra arutwa baake bûra mûraîka aabeerire.

⁹ Wabathiîte baugîîtie, nthûti îmwe boona Yiesû. Abeera, “Muugaani.” Baathiyanga akubî n'we, bamûgonga batiirithîîtie moothiû maao agu mbayooni ciake.

¹⁰ Yiesû abeera, “Tigaani gûkuthûka. Îthiini bwîre aruayia bathi Gariiri i noogo tûkoonanîra.”

¹¹ Eekûrû babu wabarî njîraani bathiîte, bamwe ba akaria ba nthiko baaya taûni beera *athînjîri bara banene ba Ngai mantû monthe bûra maakarîkire.

¹² Athînjîri bara banene ba Ngai na akûrû baarûtha mûceemanio. Baarûtha mûbango baanenkera acikaarî mbia inyingî mûno.

¹³ Babeera bakaaya kûûrua i muntû bamwîre n'arutwa ba Yiesû baraayire ûtugû bamaami baiya mwîrî wake baathi na uu.

¹⁴ Babeera, “Weegua mantû mama magaakinyîîra ngabana tûkamwoneeria wabu i bu kûrî kaingo bûtoona thîîna.”

¹⁵ Acikaarî baathûkia mbia baarûtha wabûra beerirwe. Na rûru i ru rûgono rûra Ayaundi baatambiirie mwanka îmunthî tûrî.

Kwîbonania kwa Yiesû kîrî arutwa baake îkûmi na ûmwe

¹⁶ Arutwa baathi Gariiri barî îkûmi na ûmwe, baakinya kîrîmaani kîra Yiesû aabeerîîte bakomane.

¹⁷ Bakûmwona bamûgonga, îndî bamwe baao ibaarî na nkanja.

¹⁸ Rîra Yiesû aayire abeera, “Impeetwe wathani bunthe îgûrû na nthîgûrû.

¹⁹ Kwoogu îthiini bûgatuîkithie antû ba nthîgûrû cionthe arutwa baakwa, bûkîbabaatithagia kwa riîtwa rîa Baaba, rîa Mwana na rîa Kîrundu Ûmûtheru.

²⁰ Na bûbarutanage kwathîkagîra mantû monthe mara mbwathîîte. Na ûkeegagua ndî amwe naabi kinya îgiita rîa mûthiro wa nthîgûrû.”