APIRIPI 2 - Kîrîîkanîro Kîîyerû

Eetîgîri babatîîrue beenyithia ta Kîrîstû

¹ Kwîgua bûrî ndeni ya Kîrîstû ikûbwîkagîra wîru? Î wendo bwa Kîrîstû ibûbûûmagîîria? Bûrî ngwatanîrooni îmwe ya gîîkîrundu? Ibwîgagua bûrî na nkoro imbega cia kwîganîîrua kîao?

² Na n'ûntû i bu kûrî, tûmagaani nkenaga mûno na kwîgagua bûrî na mathûgaanio mamwe, wendo bûmwe, na bûgwatanîrîte meerekeeriani meenu.

³ Bûtikaarûthe ûntû na rûriitho kana wîkumia. Muntû nenyiagie kîrî ûra ûngî, na nathûkagie bara bangî ta bo barî gîtûmi nkûrûki yake.

⁴ Bûtikaathûgaanagîrie wamantû meenu monka. Thûgaanagîriani ma bara bangî wana mo.

⁵ Bûbatîîrue bwîgua bûrî na mathûgaanio ta ma Yiesû Kîrîstû na bûkara ta we.

⁶ Kîrîstû aakari ta Ngai mantûûni monthe. Îndî amwe noogu, eerekeeria na baganeene na Ngai.

⁷ Aaciarirwe arî muntû, eetuîkithia gîntû gûtarî, aatuîka mûruti ngûgî.

⁸ Agûtuîka muntû, eenyithia, aathîkîra Ngai mwanka aakua, gîkuû kîra aakuire mûtharabaani.

⁹ Na gîku i kîo gîatûmire Ngai amûneneithia mûno na amwaa riîtwa rîra rîrî îgweta nkûrûki ya mariîtwa mara mangî monthe.

¹⁰ Na i kîo n'ûntû bwa riîtwa rîake biûmbe bionthe bikaamûturîria maru. Biûmbe bira birî îgûrû na antû bonthe barî nthîgûrû bara ûkeegua barî mwoyo na bara bakaariûkua bakamûturîria maru.

¹¹ Na wakîra kîûmbe gîkauga Yiesû Kîrîstû i Mwathani, bikumithie Ngai Baaba.

Mîkarîre yenu nîtharare nthîgûrû

¹² Kwoogu, aruayia na aarayia, rîonthe ibwamenyagîîra bûkambathîkîra rîra ndarî kwenu. Îndî îîndî ntarî amwe naabi i rîo bûbatîîrue bûmenyeera mûno nkûrûki kwathîkîra bûra nkûbwîra. Îrutagaani ngûgî imbega bûgîkuthûkaga Ngai mûno mûtûûrîreeni wenu wa wonokio.

¹³ I Ngai akûruta ngûgî ndeni yenu akîbweyaga wendi na akîbûûmbithagia kûrûtha bûra bûmûkenagia.

¹⁴ Rûthagaani mantû monthe bûtakûnung'una kana bûtagûkararia,

¹⁵ kaingo bûtuîka aana ba Ngai baatheru batarî na mabîtia. Bûtûûraga na antû batarûthaga bûra kwagîrîte, antû ba meeyia. Werû bwa mûkarîre wenu ûbathararagîra ta bûra werû bûthararaga mwinduuni.

¹⁶ Gwataani ntheto îra yeyaga antû mwoyo bûmiitie kaingo mbûkeneera ntugû îra Kîrîstû agaacooka. Bûbu i bu bûkoonania ngûgî îra ndutîîte kîrî biû t'ya mana.

¹⁷ Na wana kinya ûkeegua inkwîrwa mbûragwe mbûyûrîîrie kîgongwana kîa ngûgî yenu kîra bûrutagîra Ngai n'ûntû bwa wîtîgio bwenu nwa nkene. Na kwoogu ingûkeneera bûgîkeneera bwinthe.

¹⁸ Na bûbatîîrue bûkena n'ûntû bwa bu amwe naani.

Timotheo na Epabironditas

¹⁹ Weegua i kwenda kwa Mwathani Yiesû, inkwîrîgîîra gûtûma Timotheo kîrî biû nyuma ya îgiita rîtarî rîraaya kaingo ndamenya bûra bûrî ngîa wîru.

²⁰ Gûtirî muntû ûngî kîrî bara ndî na bo abûthûgaanagîria ta Timotheo.

²¹ Bara bangî bonthe i mantû maao monka beendaga kûrûtha. Batiendaga kûrûtha mantû ma Yiesû Kîrîstû.

²² Ibwiyî Timotheo we noonanîîtie bûra akari. Tûrutîîte n'we ngûgî ta mwana na îthe, n'ûntû bwa ntheto îmbega.

²³ Inkwîrîgîîra kûmûtûma kîrî biû na mpwî bûra kûûmbîka, ndatiga nkûmenya bûra mantû maakwa magaakara.

²⁴ Na ndî na mma Mwathani aganteethia mbûye ndî niû nyuma ya îgiita rîtarî rîraaya.

²⁵ Bwatûmire mûruayia Epabironditas aaya gûnteetheeria mantûûni maakwa. Tûrutaga ngûgî amwe n'we na nangwatagia kûrûîrîîra ntheto îmbega. Îndî ndîona imbagîrîtwe kûmwîra acooke kîrî biû.

²⁶ Ndîenda acooka kîrî biû n'ûntû nakwenda kûbwona mûno bwinthe. Arî na bata ya kwenda bûmwona n'ûntû naiyî ibûreegiirue bûra araayîîtue bûgana.

²⁷ I mma we naraayîîtue mûno, akubî akua. I Ngai aramwîgiirue kîao. Îndî t'we wenka, wana niû Ngai narambîgiirue kîao kaingo ntagwatwa i kîîthikîîro, n'ûntû agîkuire nkîgwatwa i kîîthikîîro kîînene.

²⁸ Kwoogu ndîenda mûno acooka kîrî biû bûmwona kaingo bûkena, na niû naani ntiga gûtangîka i bûra nkûmenya ibûkûthûgaania bûtamwene.

²⁹ Aaya mûkeneereeni n'ûntû i mûruti ngûgî wa Mwathani. Na tîîyagaani bara bakari ta we.

³⁰ Bûbatîîrue bûtîîya Epabironditas n'ûntû araarî akubî gûkuîra ngûgîîni ya Kîrîstû. Areebîkîrîte ûgwatiini bwa gîkuû kaingo anteethia. Na gûnteethia kûra aranteethiirie i kûra bwagîrîtwe bûnteethia.