Vilipia 3 - Tennet

Tu̱we̱ne̱t ci een de̱de̱

¹ Gotonogga ki ngonogga tu̱we̱nta̱, abunna ming atalninnu oroot ngati Manyi. Iróng een zoz ci gerze ming keheri kaal balik keteheraung anna oowa ke̱, abarik een kaal cik atin azunnung.

² Egenyyit ngati ol cik gerzek ogon kiwagon urzi. Ogon nege mu̱nye̱n, irez te̱di̱ne̱t vi̱ca̱vi̱cce̱t cik ollu azi ne abunna ming amuda e̱e̱ti̱ ti̱ri̱ze̱ne̱t.

³ Eci naga ol wak kanyak te̱di̱ne̱t wa een de̱de̱ kettede mu̱nye̱n zi̱nze̱tti̱nne̱ cigga̱c, cik kinnat Vongize ci Ta̱mu̱ta̱dde̱no̱, ki di̱ngdi̱nga̱ni̱ne̱t Ye̱su̱ Ki̱ri̱sto̱, iróng naga karikka zi̱nze̱tti̱ e̱le̱tti̱ cigga̱k,

⁴ ming kanyai anna gool ci karike wo̱ye̱ zinin kaal ne̱ke̱. Ming anyak e̱e̱ti̱ imma ci i̱no̱n arike enne zinin cinne ele eci re̱e̱nu̱no̱, kanyai anna cik meelek:

⁵ Ettede vi̱ca̱vi̱ca̱ cinanni baling izeto i̱i̱nya̱ cigannik tu̱rge̱. Ke̱e̱ni̱ anna e̱e̱t ci Israilo, biilete ci Benjamini. Ke̱e̱ni̱ e̱e̱t ci I̱bu̱ru̱ de̱de̱. Ki i̱yo̱ko̱ ming ke̱e̱ni̱ Varacisoc ko̱, ko̱ngo̱o̱le̱ anna Lo̱ti̱nno̱k cik Musesi de̱de̱.

⁶ Eci kanyai anna zinin ci kireze li̱ngli̱ngo̱n cinanni, ki̱gi̱da̱ zin olli Ki̱ri̱sto̱ ke̱le̱ci̱a̱k. Imma zo̱ze̱ ci abunna orong lo̱ti̱nno̱wa̱, i̱llo̱i̱ gi̱i̱ imma ci kabaci eci anna kazunne Lo̱ti̱nno̱k cik Musesi veelek.

⁷ Ma̱i̱je̱ kaala balik ki̱no̱ni̱ anna riilik ke̱, izeto kaal cik iróng ngen riile zo̱ze̱ ci Ki̱ri̱sto̱.

⁸ I̱llo̱i̱ gi̱i̱ imma ci riili ngati a̱gga̱we̱ e̱e̱ti̱ Ye̱su̱ Ki̱ri̱sto̱ Manyi. Kodotiya anna kaal do̱o̱k lo̱o̱c, kanyike kizeto darace. Ki̱ri̱sto̱ do̱ ci korongi anna lo̱o̱ce̱ cu,

⁹ kar ka̱gga̱ kabai anna zo̱ze̱ cinne. Iróng wo̱ye̱ anna kadimani ele cinanni kubunna ngu̱me̱ ci Ta̱mu̱ta̱dde̱no̱ ngati ko̱ngo̱o̱le̱ Lo̱ti̱nno̱k cik Musesi do̱. Elemanna Ta̱mu̱ta̱dde̱n go̱o̱le̱ ci tu̱we̱ne̱t ci ka̱tu̱we̱ anna Ki̱ri̱sto̱.

¹⁰ Een gi̱i̱ ci korongi anna do̱o̱k abunna ka̱gga̱ Ki̱ri̱sto̱ ki doiz ci ingane nonno daiza kurug. Korongi kozolta ki nonno pirnanet cinne kar ka̱da̱k ki bali enne ke̱,

¹¹ kar atin anna bu̱k kitinga daiza kurug ki bali enne ke̱.

Ki̱vi̱rte̱k naga do̱o̱k baiz ci abunna

¹² Iróng zin anna kazi ne kuzuca anna baiz ci korongi, icima kiize anna e̱e̱t ci caale, abarik ka̱vi̱ro̱ni̱k zoz neci kar kuruba baiz ci a̱gga̱mnya̱ Ye̱su̱ Ki̱ri̱sto̱ ko̱.

¹³ Gotonogga ki ngonogga tu̱we̱nta̱, iróng anna kazi ne, kuzuca anna ruget. Abarik iróng ngen ka̱gga̱ kaal balik vu̱rrta̱k ke̱, kapirna zo̱ze̱ ci kaal cik aavtte oowa.

¹⁴ I̱yo̱ko̱ zin ka̱vi̱ri̱ anna kokko rugeta, kar atin kuruba muci ci awuya Ta̱mu̱ta̱dde̱n ta̱mu̱-kenga zo̱ze̱ ci Ye̱su̱ Ki̱ri̱sto̱.

¹⁵ Imma naga ol wak kanyak tu̱we̱ne̱t ci okkomi ko̱, abunna ming ki̱no̱ne̱ go̱o̱le̱ necu do̱o̱k. Kar ming anyak ol u̱gge̱ cik iróng elemi zoz necu, okko atin Ta̱mu̱ta̱dde̱n i̱ye̱le̱ke̱ nogo gool necu ju̱rru̱m.

¹⁶ Abunna zin naga ming kemenna kowo go̱o̱le̱ ci baiz ci bali kurubta een de̱de̱ ko̱.

¹⁷ Gonogga tu̱we̱nta̱ do̱o̱k, abunna ming annuyu zoz cinanni, kar edemezta zoz ngati ol wak annu baiz ci karikka naga kize cunno̱ng ko̱.

¹⁸ Ku̱du̱wa̱u̱ng anna i̱ge̱t zoz necu oowa lak cik meelek giir, anyak ol cik meelek abak kizeto mo̱ddo̱ cik ta̱la̱ke̱c ci Ki̱ri̱sto̱. Imma i̱yo̱ko̱ ki ti̱la̱lo̱ eberene kobodonik ka̱du̱wa̱kku̱ng dee.

¹⁹ Ovvo ol ne̱k iróng azikne ko̱ een baizi cinne̱ng li̱be̱ne̱t, irez nege ke̱ngti̱ cigge̱k, odong abarik e̱le̱tti̱ ci iróng adak a̱li̱ya̱ni̱ nogo, i̱no̱n nege kaal cik lo̱o̱c cu do̱ niko.

²⁰ Ma̱i̱je̱ naga ke̱e̱ggi̱n ol cik ta̱mu̱-kengo. Kere zin naga oroot Ti̱ri̱zo̱i̱t Manyi Ye̱su̱ Ki̱ri̱sto̱ ci atin a̱kku̱ ta̱mu̱-kenga.

²¹ Anyak enne doiz kaale do̱o̱k, kar zin kabal kaal do̱o̱k, uhu atin enne e̱le̱tti̱ cigga̱c gerzek ko̱ ku̱tu̱gu̱ ki ele cinne ci anyak di̱ngdi̱ngo̱n ko̱.