Buk ci ozoz zoz ci ngaa ci een Ruz 1 - Tennet

Elimelek ki ngaa cinne Naomi

¹ Anyak ba̱li̱ye̱ looci magiz ci a̱ddi̱ki̱re̱ e̱rki̱te̱ bali abale ddi̱ki̱ryo̱wa̱ balik angara olli Israilo moddene ke̱, kar e̱e̱ti̱ kitinga ki ngaa cinne ki logoz rama o̱rge̱ ci een Betelem Ju̱de̱ya̱ ku̱lu̱ge̱t koot kabaito arrak do̱yo̱i̱t lo̱o̱ce̱ ci ol cik Moabi.

² Een zara cik e̱e̱t neci Elimelek ovvo zara cik ngaa cinne een Naomi, kar logoz cigge̱k kizeto zara Mahalon ki Kilion. A̱vvu̱ nege boore ci een Ephrath Betelema, Ju̱de̱ya̱. Kar zin nege koot Moaba kar kabaito nginati.

³ A̱da̱k zin Elimeleki wa een mac ci Naomi, ize nonno ki logoz ciginnek e̱e̱ggi̱n rama ko̱ do̱.

⁴ I̱ti̱yye̱t zin logoz ne̱ke̱ dooli cik e̱e̱ggi̱n Moab, een zara cik co̱de̱ ne Orpah okko co̱de̱ een Ruz. Baling abaito nege nginati e̱rki̱nya̱ omoto,

⁵ a̱da̱i̱to̱ zin bo̱do̱k Mahaloni ki Kilion bu̱k, erahek Naomi ki ngaai cik boyek ko̱.

I̱mi̱rrte̱ Naomi ki Ruz oot Betelema

⁶ Baling izik Naomi Moaba zoz ci eelanne Manyi ol ciginnek aanyik da̱i̱ne̱t, orong zin Naomi ki alawanet ciginnek ki̱mi̱rte̱ koot olo.

⁷ Utungtek lo̱o̱c ci Moabi lo̱o̱c bali abahe nege ke̱, oot zin go̱o̱le̱ ci okkoye nogo rok lo̱o̱c ci een Ju̱de̱ya̱.

⁸ Imma bali goola, izek Naomi alawanet ne, “I̱mi̱rrte̱ oot ce̱e̱zi̱nne̱ cik e̱e̱ti̱ggo̱k. Anyik bai Manyi ki̱ye̱le̱u̱ng i̱ge̱t bunnat cinne, ki baling ogonikku niga zoz ci abunna macwa cuggo̱k balik a̱da̱i̱to̱ ke̱ ki annita bu̱k.

⁹ Anyik bai Manyi ka̱a̱nyu̱ng i̱ge̱t do̱o̱k urubta macwa cik abunna kar abait ce̱e̱zi̱nne̱ cuggo̱k labak.” Izza zin Naomi alawanet kar zin nege ku̱tu̱lu̱zzo̱ oroot,

¹⁰ kar zin nege kizettek nonno ne, “Iróng een niko, ya̱i̱, korkor naga imma i̱nne̱ta̱ rok ol cigunnek.”

¹¹ Ma̱i̱je̱ Naomi abarizek nogo a̱nne̱k ne, “I̱mi̱rrte̱ oot ce̱e̱zi̱nne̱ dooli cigannik. Nya ming anuyang ko̱? Kokko atin anna kanyai dooli u̱gge̱ cik macik, cik atin ovvo abakku bu̱k?

¹² Dooli cigannik, i̱mi̱rrte̱ oot olo, kanyata anna oroot iróng wo̱ye̱ karumena ki mac imma. Ming wo̱ye̱ nu̱nu̱n karike anna zinin kazi ne ngen ka̱ri̱ti̱, icima karumena ki mac imma ba̱a̱li̱n cu kar ki̱ti̱ra̱ logoz,

¹³ erewinnu wo̱ye̱ niga zee ki̱ddi̱ki̱rre̱t nege? Aavtiyyu atin niga zee ci iróng arumenu ki e̱e̱t imma zo̱ze̱ cinne̱ng? Iróng een niko, dooli cigannik. A̱u̱ce̱ zoz necu ngatinanni oroot kommog cunno̱ng, eci Manyi utuhuweya annita bo̱i̱c cinne!”

¹⁴ Imma zin zo̱ze̱ necu, u̱tu̱lu̱zzo̱ bo̱do̱k alawaneta. Izza zin Orpah i̱nyi̱k cinne kar kize ne abunna ki̱mi̱re̱ anna, imma Ruzi odowonik i̱nyi̱k niko.

¹⁵ Izek zin Naomi nonno ne “Ruz, cinno, a̱mi̱re̱ nyigarnu okko ngati ol ciginnek ki ta̱mu̱ta̱dde̱ne̱t cik ala nege. Mi̱re̱ zin i̱nna̱ bu̱k orkorrit ki nonno.”

¹⁶ Imma Ruzi abarizek nonno izek ne, “Ma a̱du̱wa̱ zoz ci kungneki anna i̱nne̱t lo̱o̱c icima zoz ci ka̱mi̱re̱ne̱ anna kuk ngati ol cigannik. Kokko anna ngati okkoye i̱nna̱, kaave atin anna ngati aave i̱nna̱. Ovvo ol cigunnek e̱e̱ggi̱n ol cigannik kar Ta̱mu̱ta̱dde̱n ci ala i̱nna̱ een bu̱k Ta̱mu̱ta̱dde̱n cinanni.

¹⁷ Imma ngati okko i̱nna̱ a̱da̱kne̱, kokko anna kadawonik ngineci bu̱k. Anyik bai Manyi kedeza annit oroot ming iróng een daiz ci engerya annit ki i̱nne̱ta̱.”

¹⁸ Baling icin Naomi Ruz ming odola zo̱ze̱ ci orkore enne ki nonno, ibiliz zin enne zoz ci a̱du̱wa̱k enne nonno.

¹⁹ Otozo zin Naomi ki alawan zee ki̱tto̱zo̱ Betelem. Baling u̱zu̱cca̱ nege Betelem, ataltto zin olli o̱rgu̱ do̱o̱k baling icinnet nogo, kar zin ngaai ki̱jji̱nto̱ “Een necu de̱de̱ Naomi?”

²⁰ Izek zin enne nogo ne, “Ma awuyang zare cik een Naomi, abarik u̱tu̱ya̱ng zare cik een Mara, ma̱rri̱t Ta̱mu̱ta̱dde̱n anyak Komiz do̱o̱k ming utuhu baiz cinanni kize gerza.

²¹ Kanyai ba̱li̱ye̱ anna kaal do̱o̱k, ma̱i̱je̱ Manyi anyaha annit do̱ ollin. Nya ming awuyang kize Naomi ko̱? Egerzanna Ta̱mu̱ta̱dde̱n wa anyak Komiz do̱o̱k; aanyik baiz cinanni kize gerza.”

²² Imma nye̱lo̱we̱ bali obodane Naomi lo̱o̱ce̱ ci een Moab orkora ki alawan cinne Ruz kar zin ku̱zu̱cca̱ Betelem nye̱lo̱k ci ettede ol labi wak een barley.