Roma 9 - Tennet

Atahala Ta̱mu̱ta̱dde̱n olli Israilo

¹ Kozozi anna zoz ci een de̱de̱ zare cik Ye̱su̱ Ki̱ri̱sto̱, iróng ka̱du̱wa̱ zoz ci een volong, eci Vongizi ci A̱li̱le̱ i̱ye̱le̱ka̱ zoz wa een de̱de̱.

² Kanyai anna matiz ki ciriton ci a̱ppwe̱ oroot zinina.

^3-4 Korongi wo̱ye̱ anna Ta̱mu̱ta̱dde̱n kotoran kar kengertowa ki Ki̱ri̱sto̱, ming een annit ci kalami ol cigannik Israilo ngati arubane ti̱ri̱ze̱ne̱t ci Ki̱ri̱sto̱. Aburka atin Ta̱mu̱ta̱dde̱n nogo kizeto dooli ciginnek; een di̱ngdi̱nga̱ni̱ne̱t ci Ta̱mu̱ta̱dde̱no̱ cinne̱ng, ki olom ci ogon Ta̱mu̱ta̱dde̱n ki e̱e̱t ci diiri, ki lo̱ti̱nno̱k balik eher Musesi, ki Ce̱e̱z wa Ta̱mu̱ta̱dde̱no̱ zoz ci u̱du̱wa̱ Ta̱mu̱ta̱dde̱n.

⁵ A̱rri̱ta̱ nogo alaata wak a̱ddi̱ki̱re̱, a̱vvu̱ ji̱ji̱ti̱k Ki̱ri̱sto̱ tatuge necu, wa een Ta̱mu̱ta̱dde̱n ci kaal do̱o̱k. Kinnatit zar cik Ta̱mu̱ta̱dde̱no̱ udut. Amen.

⁶ Iróng anna kazi ne egerzan Ta̱mu̱ta̱dde̱n zoz bali u̱du̱wa̱ enne ke̱, eci ol ne̱k een ji̱ji̱ti̱nne̱ng Aburaham ko̱ do̱o̱k, eci iróng olli Israilo do̱o̱k e̱e̱ggi̱n olli Israilo.

⁷ Iróng dooli cik dooli cik Aburahami do̱o̱k a̱tu̱ Ta̱mu̱ta̱dde̱n ki bali Aburahami ke̱. E̱he̱rye̱ buwe ci Ta̱mu̱ta̱dde̱no̱, azi ne, “Eci zo̱ze̱ ci I̱sa̱ko̱ okko i̱nna̱ a̱va̱dde̱ ki bali ku̱du̱wa̱ anna ke̱.”

⁸ Azi keng ci zoz necu ne, iróng biileti ci Aburahami do̱o̱k een dooli cik Ta̱mu̱ta̱dde̱no̱ de̱de̱. Abarik dooli cik dooli cik ngerinne wa een zar I̱sa̱ko̱ bali a̱rri̱ta̱i̱ zo̱ze̱ ci u̱du̱wa̱ Ta̱mu̱ta̱dde̱n ko̱ cik een dooli cik Aburahami de̱de̱.

⁹ A̱gga̱c zoz ci u̱du̱wa̱k Ta̱mu̱ta̱dde̱n Aburaham, icu, “Kobodaki atin lola nye̱lo̱we̱ cu kar atin Sarah kanyak do̱le̱c ci maci.”

¹⁰ Ngen zin zoz necu kuṯurehe niko, i̱ye̱la̱ zin Ta̱mu̱ta̱dde̱n dooli ciginnek de̱de̱, anyak ba̱li̱ye̱ ngaa ci een zara Rebekah a̱lle̱n, a̱ri̱to̱ni̱k nonno I̱sa̱ko̱ wa een ji̱ji̱ti̱nna̱.

^11-12 Baling ngen cuudena ne̱ke̱ ki̱ti̱rtta̱i̱, ngen bu̱k ka̱gga̱c gi̱i̱ ci abunna ki ci gerze, kar tahalinet ci Ta̱mu̱ta̱dde̱no̱ ki̱ye̱la̱i̱, a̱nne̱k Ta̱mu̱ta̱dde̱n e̱e̱ti̱nne̱ng ne, “Okko atin ngerunne wa een a̱bu̱ ko̱ a̱li̱ngli̱nge̱k gooni wa dici.”

¹³ E̱he̱rye̱ zin buwe ci Ta̱mu̱ta̱dde̱no̱ azi ne, “Kirezi anna cuudenit wa dici een zara Ya̱ko̱bo̱, imma I̱sa̱u̱ iróng anna kirezi.”

¹⁴ Ma i̱yo̱ko̱ kazi wo̱ye̱ naga ne? Anyak Ta̱mu̱ta̱dde̱n meder zo̱ze̱ necu? Iróng een niko!

¹⁵ A̱nne̱k ba̱li̱ye̱ Ta̱mu̱ta̱dde̱n Muses ne, “Kanyike atin anna deten ol cik korongi anna kanyik deten. Kar bo̱do̱k keela e̱e̱t ci kamanik korongi anna keela.”

¹⁶ Iróng Ta̱mu̱ta̱dde̱n a̱mu̱yu̱k ol li̱ngli̱ngo̱nte̱ ci ogon nege, icima orong nege oroot, abarik enne u̱mu̱yu̱k ol wak orong zinin cinne eci enne e̱de̱te̱.

¹⁷ E̱he̱rye̱ Warage ci Ta̱mu̱ta̱dde̱no̱ zoz ci obod ki alaan ci Masiro, azi ne, “Kidimani anna i̱nne̱t ize alaan kar ki̱ye̱le̱i̱ doiz cinanni kar ol ko̱to̱ngo̱o̱lte̱ya̱ annit lo̱o̱co̱we̱ do̱o̱k.”

¹⁸ Aanyik Ta̱mu̱ta̱dde̱n deten e̱e̱t ci odola enne orong kaanyik, kar kidit o̱o̱tti̱ cik ol wak iróng aziye zoz cinne.

¹⁹ Okko e̱e̱ti̱ co̱de̱ ngatinno̱ng a̱nne̱ka̱ ne, “Ming odola Ta̱mu̱ta̱dde̱n gi̱i̱ye̱ ci ogonik enne e̱e̱t ci diiri, nya bo̱do̱k Ta̱mu̱ta̱dde̱n ming anganyet agit ko̱? Eci ngene ci wo̱ye̱ abure zoz wa orong Ta̱mu̱ta̱dde̱n e̱e̱t ci diiri kar ku̱tu̱gu̱?”

²⁰ Gotonogga ki ngonogga tu̱we̱nta̱, ka̱jji̱nnu̱ng, “Ngene ngatinno̱ng wo̱ye̱ ci a̱cu̱b Ta̱mu̱ta̱dde̱n zo̱ze̱ necu? A̱jji̱n wo̱ye̱ todowaci e̱e̱t ci adiman i̱jjo̱? Azi ne, ‘Nya ming adimana i̱nna̱ ki i̱yo̱ko̱ ko̱?’”

²¹ Ogon Ta̱mu̱ta̱dde̱n ki e̱e̱ti̱ ci eenyet i̱jjo̱nyya̱, imma e̱e̱ti̱ wa eenyet i̱jjo̱nyya̱ ko̱, eenyet go̱o̱le̱ ci orong zinin cinne, adiman u̱gge̱ kize cik a̱li̱ngli̱nge̱ ol kaal cik riilik, okko adiman u̱gge̱ kize cik oboda to.

²² Orong Ta̱mu̱ta̱dde̱n ki̱ye̱la̱ mozinet ki doiz cinne ka̱gga̱we̱, ngati ol wak gerzek agano ki ru̱we̱ne̱t. Abarik enne alalnek ol ne̱ko̱ dee.

²³ Ogon Ta̱mu̱ta̱dde̱n niko i̱ye̱la̱ di̱ngdi̱ngo̱n cinne, ngati amanik ol ne̱k atahala enne ke̱ kar kozolit ki nonno di̱ngdi̱ngo̱n cinne.

²⁴ I̱yo̱ko̱ ke̱e̱ggi̱n naga ol balik atahala Ta̱mu̱ta̱dde̱n kar ki̱ye̱le̱t deten cinne, iróng een olli Ya̱u̱do̱ do̱ abarik ki ol wak iróng een Ya̱u̱d bu̱k.

²⁵ Azi Manyi buwe ci a̱ri̱to̱i̱t ci zoz cinne, een zara Hoseyya ne, “Kawu atin anna nogo kizeto ‘ol cigannik’ ming iróng nege e̱e̱ggi̱n ol cigannik nu̱nu̱n, kawu atin anna nonno ‘e̱e̱t co̱de̱ ci kirezi’ ming iróng enne een e̱e̱t co̱de̱ ci kirezi anna,”

²⁶ Azi bo̱do̱k Hoseyya ne, “U̱du̱ya̱i̱ ba̱li̱ye̱ zoz necu: ‘Iróng niga e̱e̱ggi̱nnu̱ ol cigannik,’ awu atin ol nogo kizeto ‘dooli cik Ta̱mu̱ta̱dde̱no̱.’”

²⁷ Icu zin zoz ci eher a̱ri̱to̱i̱ti̱ ci zoz ci Ta̱mu̱ta̱dde̱no̱ een zara Isaya, obod ki olli Israilo, azi ne, “Ming nu̱nu̱n meele olli Israilo giir ku̱tu̱gu̱zzo̱ ki azac ci aave nyatapar ci a̱ddi̱ki̱re̱ ti̱ti̱ma̱, amuda atin ol cikidik ngatinne̱ng ti̱ri̱ze̱ne̱t ci Ta̱mu̱ta̱dde̱no̱.

²⁸ Ogon atin Manyi zoz cu: kar kedecak kettedik ol ciginnek lo̱o̱ta̱ ngatu lo̱ki̱ko̱ ataman.”

²⁹ U̱du̱wa̱ ba̱li̱ye̱ a̱ri̱to̱i̱ti̱ ci een zara Isaya, azi ne, “Ming iróng Manyi Ta̱mu̱ta̱dde̱n wa anyak doiz anyigza dooli cigga̱c u̱gge̱, ku̱tu̱gu̱zzo̱ weda naga ki olli orog ci een Sodom, kutubto weete ki orog ci een Gomorrah.”

Iróng olli Israilo a̱tu̱we̱

³⁰ Azi ungec ci zoz necu ne? Iróng ol wak iróng een Ya̱u̱d ko̱ elemi bunnat ci Ta̱mu̱ta̱dde̱no̱, elemi enne nogo kubunnta ngu̱me̱ ci cinne eci nege a̱tu̱ Ye̱su̱.

³¹ Imma olli Israilo wak orong kubunnta ngu̱me̱ ci Ta̱mu̱ta̱dde̱n go̱o̱le̱ ci azunne nege lo̱ti̱nno̱k balik Musesi ke̱, iróng Ta̱mu̱ta̱dde̱n elemi nogo kubunnta ngu̱me̱ cinne.

³² Iróng een niko nya? Eci olli Ya̱u̱do̱ iróng a̱tu̱ Ye̱su̱ ti̱ri̱rzo̱i̱t, abarik nege ogon zoz ci azunne lo̱ti̱nno̱k ki li̱ngli̱ngo̱n. Ogon ki ci adir bee nogo.

³³ Ki i̱yo̱ko̱ ming a̱du̱wa̱ Ta̱mu̱ta̱dde̱n buwe cinne, azi ne, “Icinnet, kabaik anna bee nginti een Zion kar kidir ol, bee ci aanyik nogo ku̱yu̱kte̱, Ma̱i̱je̱ e̱e̱ti̱ ci a̱tu̱ nonno, iróng atin adak a̱li̱ya̱ni̱.”