Roma 8 - Tennet

Anyik Vongiz ci Ta̱mu̱ta̱dde̱no̱ kabalin

¹ I̱yo̱ko̱ zin, ming arume e̱e̱ti̱ ki Ye̱su̱ Ki̱ri̱sto̱, iróng atin Ta̱mu̱ta̱dde̱n ngen edez e̱e̱t neci, i̱i̱te̱ne̱ ci okko enne ettede lo̱ki̱ko̱.

² Eci Vongizi ci Ta̱mu̱ta̱dde̱no̱ arawa annit lo̱ti̱nno̱we̱ wak mu̱nye̱nu̱ ki wak daizak, kar kanyaha ruget ci een jor ngati Ye̱su̱ Ki̱ri̱sto̱.

³ Iróng lo̱ti̱nno̱wa̱ balik aanyik Ta̱mu̱ta̱dde̱n Muses ke̱ aruguzeta eci mu̱nye̱na̱ amunyeta, ki i̱yo̱ko̱, eci naga ol cik diirik iróng kanime ku̱zu̱tte̱ nogo. Abarik zin Ta̱mu̱ta̱dde̱n aanyyet ruget ngati i̱tto̱na̱ne̱ Ngerinne kize e̱e̱t ci diiri ki olli mu̱nye̱nu̱ kar ki̱ki̱ya̱ kize wawac ci aara ol mu̱nye̱n. Aanyik Ta̱mu̱ta̱dde̱n ele ci Ye̱su̱ kize ci edeze enne mu̱nye̱n.

⁴ Ogon Ta̱mu̱ta̱dde̱n zoz neci niko kar naga ku̱tu̱gu̱z kaal cik abunna a̱du̱wa̱ lo̱ti̱nno̱wa̱ do̱o̱k, abunna naga ko̱ngo̱o̱le̱ Vongiz ci Ta̱mu̱ta̱dde̱no̱, iróng kanu kaal cik gerzek irez zi̱nze̱tti̱ cigga̱c.

⁵ I̱no̱n ol wak abak kaale cik orong zi̱nze̱tti̱ cigge̱k, kaal cik obod ki ele do̱ niko. Imma ol wak abak Vongize ci Ta̱mu̱ta̱dde̱no̱, i̱no̱n kaal cik obod ki Vongiz.

⁶ Ming kabal naga e̱le̱tti̱ kaale ci gerzek balik reentik amin zi̱nze̱tti̱ ke̱, kamuda atin daiz. Imma ming kabal e̱le̱tti̱ Vongize ci Ta̱mu̱ta̱dde̱no̱, kanyak atin baiz ci abunna ki gano.

⁷ Okko e̱e̱ti̱ ci i̱no̱n kaal cik gerzek amin zinin cinne ko̱, ooro enne ki Ta̱mu̱ta̱dde̱n, eci iróng enne o̱ngo̱o̱le̱ lo̱ti̱nno̱k ciginnek, iróng o̱ngo̱o̱le̱ i̱yo̱ko̱ niko, icima iróng bo̱do̱k enne o̱ngo̱o̱le̱ atin udut.

⁸ Imma ol wak aanyik kaal cik gerzek irez zi̱nze̱tti̱ kabal baiz cinne̱ng, iróng Ta̱mu̱ta̱dde̱n atalne zo̱ze̱ cinne̱ng.

⁹ Imma niga ol ne̱k anyakku Vongiz ci Ta̱mu̱ta̱dde̱no̱ zi̱nze̱tti̱nne̱ ciggo̱k ko̱, iróng zin niga ngen aballu e̱le̱tti̱ kaale cik gerzek irez zi̱nze̱tti̱ cuggo̱k, iróng ucca bo̱do̱k annuyu kaal ne̱ke̱. Ovvo ol wak iróng anyak Vongiz ci A̱li̱le̱ iróng nege e̱e̱ggi̱n ol cik Ki̱ri̱sto̱.

¹⁰ Ming abak Ki̱ri̱sto̱ zi̱nze̱tti̱nne̱ cuggo̱k, a̱da̱i̱to̱ e̱le̱tti̱ cuggo̱k do̱ zo̱ze̱ ci mu̱nye̱nu̱, ma̱i̱je̱ vongizzowa cuggo̱k aruge zo̱ze̱ ci bunnat ci Ta̱mu̱ta̱dde̱no̱.

¹¹ Imma Vongizi ci Ta̱mu̱ta̱dde̱no̱ bali ingane Ye̱su̱ daiza abak ngatinno̱ng do̱o̱k, nonno ci ingane Ki̱ri̱sto̱ daiza, a̱a̱nyu̱ng atin enne baiz ci een jor e̱le̱tti̱ne̱ cik daizak ko̱, Vongize cinne.

¹² Gotonogga ki ngonogga tu̱we̱nta̱, iróng kaala cik gerzek mu̱nye̱nu̱ irez zi̱nze̱tti̱ ko̱ ngen abaleta, abunna kogon gi̱i̱ wa a̱du̱wa̱kke̱t Vongizi ci Ta̱mu̱ta̱dde̱no̱, gerza ming kogon kaal cik gerzek amin zi̱nze̱tti̱ cigga̱c.

¹³ Ming ogonnu kaal cik gerzek ko̱, ovvoyyu atin daiza. Abarik ming eelaung Vongizi ci A̱li̱le̱, utungttu kaal ne̱ke̱ amin zi̱nze̱tti̱ ko̱ do̱o̱k, urugttu zin atin niga.

¹⁴ Imma ol ne̱k aanyik Vongiz ci Ta̱mu̱ta̱dde̱no̱ kabal nogo ko̱, e̱e̱ggi̱n nege dooli cik Ta̱mu̱ta̱dde̱no̱.

¹⁵ Iróng Vongizi ci Ta̱mu̱ta̱dde̱no̱ aanyyet kizet du̱cca̱k kar ko̱to̱ngo̱o̱ltte̱ lo̱ki̱ko̱ ci Ta̱mu̱ta̱dde̱no̱. Abarik Vongizi aanyyet kizet dooli ciginnek bak kawu Ta̱mu̱ta̱dde̱n kize Be̱e̱ti̱nna̱.

¹⁶ A̱du̱wa̱kke̱t Vongizi ci Ta̱mu̱ta̱dde̱no̱ de̱de̱ ke̱e̱ggi̱n naga dooli cik Ta̱mu̱ta̱dde̱no̱.

¹⁷ A̱du̱wa̱kke̱t Vongizi cinne zoz bak ka̱gga̱ naga ki Ye̱su̱ Ki̱ri̱sto̱, aanyyet atin Ta̱mu̱ta̱dde̱n zoz ci u̱du̱wa̱ enne, kozol atin naga di̱ngdi̱ngo̱n ci Ye̱su̱, ming kipirta naga ki nonno.

Di̱ngdi̱ngo̱n ci atin a̱kku̱

¹⁸ Idica pirnanet ci kamuda naga lo̱o̱ta̱ ngatu ko̱, ming katubuz ki bunnat ci kovvo atin kamuda i̱i̱te̱n neci.

¹⁹ Ma kaala cik eenyca Ta̱mu̱ta̱dde̱n lo̱o̱ta̱ ngatu ko̱ do̱o̱k, e̱re̱ye̱ talninta, orong nege i̱i̱te̱n ci atin okko Ta̱mu̱ta̱dde̱n i̱ye̱le̱k ciko ngene cik e̱e̱ggi̱n nege dooli ciginnek.

²⁰ A̱ma̱li̱ltte̱ o̱o̱tti̱ cik kaal ne̱k eenycai ko̱ do̱o̱k, iróng een kaal ne̱ke̱ cik orong kar ka̱ma̱li̱ltte̱ nogo o̱o̱tti̱. Adiman Ta̱mu̱ta̱dde̱n zoz necu ku̱tu̱gu̱ niko eci enne orongi, eci naga kere zoz ci karike zi̱nze̱tti̱ ko̱,

²¹ ovvo atin kaala ne̱k idimana Manyi ko̱ angaryai baize ci e̱e̱ggi̱nne̱ nege du̱cca̱k, kar kozolit nege di̱ngdi̱ngo̱n ci abahe dooli cik Ta̱mu̱ta̱dde̱no̱ labak.

²² Ka̱gga̱ naga do̱o̱k anyak kaala cik lo̱o̱tu̱ piryanzet ogon ki ngaa ci orong kutuyai a̱wu̱cne̱k do̱le̱c.

²³ Abarik iróng pirnanet neci aave kaale cik eenycai do̱, aave pirnanet bu̱k ngatinna, ol balik aanyyet Ta̱mu̱ta̱dde̱n Vongiz arrak oowa ke̱; kabalac zin naga zi̱nze̱tti̱nne̱, ngati kerewe e̱le̱tti̱ cik een jor ko̱, kar Manyi ki̱ye̱le̱t ke̱e̱ggi̱n naga dooli ciginnek.

²⁴ Eci zo̱ze̱ ci karikka naga zi̱nze̱tti̱ ko̱ ci aanyet ti̱ri̱ze̱ne̱t. Ma̱i̱je̱ ngatu, iróng zin naga karike zi̱nze̱tti̱ kaal cik kacin eberene ko̱. Ngene ci arike zinin gi̱i̱ ci anyak enne la̱du̱n?

²⁵ I̱yo̱ko̱ zin, ming karikka naga zi̱nze̱tti̱ kaal cik ngen naga kicinnet, kere zin zi̱nze̱tti̱nne̱ cik alali.

²⁶ Eelannet atin Vongizi ci Ta̱mu̱ta̱dde̱no̱ bu̱k agita, eci naga iróng ka̱gga̱ gool ci kalawe Ta̱mu̱ta̱dde̱n. Alawonekket Vongizi oroot, ilalek Ta̱mu̱ta̱dde̱n go̱o̱le̱ ci iróng naga ka̱gga̱.

²⁷ A̱gga̱ Ta̱mu̱ta̱dde̱n kaal cik ki̱no̱n naga do̱o̱k, a̱gga̱ bo̱do̱k zoz ci a̱du̱wa̱ Vongizi, eci Vongizi alawek ol cik Ta̱mu̱ta̱dde̱no̱ go̱o̱le̱ ci orong Manyi.

Iróng gi̱i̱ imma engeryet rezinte ci Ta̱mu̱ta̱dde̱no̱

²⁸ Ka̱gga̱ bo̱do̱k naga ogon Ta̱mu̱ta̱dde̱n zoz ci abunna kaale cik i̱i̱na̱k ol wak irez nonno. E̱e̱ggi̱n ne̱ko̱ ol wak engera enne kizeto ol cik orong enne,

²⁹ a̱gga̱ enne odohize ol wak engera enne. Kar kaanyik ku̱tu̱gu̱zzo̱ ki dooli ciginnek, u̱tu̱gu̱zzo̱ ki Ngerinne Ye̱su̱, kar Ye̱su̱ kize a̱bu̱ cinne̱ng orgene ci dooli cik meelek.

³⁰ Utu zin Ta̱mu̱ta̱dde̱n ol balik odola atahala enne, imma ol ne̱k awu enne ko̱, elema enne kize ol wak abunna, kar kaanyik nogo kozolit komiz cinne.

³¹ Kozoz wo̱ye̱ naga bo̱do̱k nya zo̱zzo̱we̱ ne̱k odola Manyi ko̱ do̱o̱k? Ming aave Ta̱mu̱ta̱dde̱n de̱de̱ o̱to̱ne̱ cinna, ngene wo̱ye̱ bo̱do̱k ci acinnet gerzet?

³² Aanyyet Ta̱mu̱ta̱dde̱n Ngerinne agit kize wawac. Baling aanyyet enne muci ci a̱ddi̱ki̱re̱ ko̱, ma i̱yo̱ko̱ naga ming ki̱no̱n do̱o̱k, iróng wo̱ye̱ enne aanyyet gi̱i̱ imma ci korong naga?

³³ Ming elema Ta̱mu̱ta̱dde̱n ol balik atahala enne ke̱, anyak wo̱ye̱ e̱e̱t imma ci ettedik ol ne̱ko̱ lo̱ki̱ko̱? I̱llo̱i̱ wo̱ye̱ e̱e̱t imma ci ettedik nogo lo̱ki̱ko̱.

³⁴ Baling a̱da̱k Ye̱su̱ Ki̱ri̱sto̱, kitinga daiza kar naga ka̱vvu̱ta̱ labak zo̱ze̱ ci ettedekket Ta̱mu̱ta̱dde̱n lo̱ki̱ko̱, ngene wo̱ye̱ ci anyak komiz ci edezetta? Iróng Ye̱su̱ a̱da̱i̱ zo̱ze̱ cinna do̱, abarik itinga daiza kar ka̱vvu̱ a̱tte̱ ci a̱zzo̱ Ta̱mu̱ta̱dde̱no̱, ngati anyahe enne komiz, alawakket Ta̱mu̱ta̱dde̱n.

³⁵ I̱llo̱i̱ gi̱i̱ imma ci engeryet rezinte ci Ki̱ri̱sto̱. Engeryet wo̱ye̱ no̱ngi̱tto̱na̱, icima piryanzet ngati kamuda gi̱de̱ne̱t, icima magiz, icima ngati kowoye nga̱dhi̱ri̱r, icima ngati a̱li̱be̱ne̱ looci, icima daiza?

³⁶ E̱he̱rye̱ Buwe ci Ta̱mu̱ta̱dde̱no̱, azi ne, “Kaavtte naga daiza odohize zo̱ze̱ cunne Ta̱mu̱ta̱dde̱n. Kogon kiwagon a̱zza̱ cik ovvo ol otodongi.”

³⁷ Ming kabak naga no̱ngi̱tto̱ne̱ nu̱nu̱n, kommog naga kaal do̱o̱k doize ci Ki̱ri̱sto̱ wa irezet ko̱.

³⁸ Ka̱gga̱ anna ju̱rru̱m, i̱llo̱i̱ gi̱i̱ imma ci engeryet agit rezinte ci Ta̱mu̱ta̱dde̱no̱, iróng een ruget, icima daiz, iróng een anjilonya cik Ta̱mu̱ta̱dde̱no̱, icima kuulo cik lo̱rye̱nta̱k, iróng een kaal cik i̱yo̱ko̱ niko, icima kaal cik atin a̱vvu̱ vu̱rrta̱, icima doiz,

³⁹ icima kaal cik aavtte ta̱mu̱-kenga, icima cik aavtte lo̱o̱ta̱. I̱llo̱i̱ kaale cik eenyca Ta̱mu̱ta̱dde̱n ko̱ cik engeryet agit rezinte ci Ta̱mu̱ta̱dde̱no̱ ngati Manyitinna Ye̱su̱ Ki̱ri̱sto̱.