Roma 6 - Tennet

Karuba naga ruget ngati Ye̱su̱

¹ Kazi wo̱ye̱ naga ne, “Kogon wo̱ye̱ naga mu̱nye̱n odohize kar bunnati cinna kotore kize a̱ppwa̱?”

² Iróng een niko! Ming iróng mu̱nye̱na̱ ngen abalet ko̱, nya bo̱do̱k ming kobodonik naga mu̱nye̱n ko̱?

³ Abunna zin ming a̱gga̱yyu̱ kozol naga ki Ye̱su̱ Ki̱ri̱sto̱ gool ci ka̱gga̱me̱ ba̱ti̱ti̱mo̱, kozol naga bu̱k ki nonno daiz cinne, kizeto zin naga ol co̱de̱ ki nonno.

⁴ Baling ka̱gga̱mi̱t naga ba̱ti̱ti̱mo̱, ka̱da̱i̱to̱ ki Ki̱ri̱sto̱ bu̱k iloma, kar atin naga bu̱k kabait baiz ci een jor, ki bali ming ingane baatinne nonno daiza komize cinne ke̱.

⁵ Imma ming kozol naga ki Ye̱su̱ daiz cinne go̱o̱le̱ ci ka̱gga̱me̱ ba̱ti̱ti̱mo̱, kingazi atin naga daiza ki nonno.

⁶ Ka̱gga̱ naga odode baizi cinna bali reeni ke̱ ki Ye̱su̱ keete ci een ta̱la̱ke̱c, kar mu̱nye̱na̱ iróng aruba gool ci abaleta,

⁷ eci e̱e̱ti̱ ci a̱da̱ha̱ i̱zzi̱ enne mu̱nye̱ne̱.

⁸ Ka̱gga̱ naga ki i̱yo̱ko̱ ming ka̱da̱i̱ ki ti̱ri̱zo̱i̱t Ki̱ri̱sto̱ ko̱, karuge atin bu̱k ki nonno.

⁹ Ka̱gga̱ ju̱rru̱m iróng daizi anyak komiz ngati ti̱ri̱zo̱i̱t Ki̱ri̱sto̱. A̱da̱k enne ba̱li̱ye̱ kar Ta̱mu̱ta̱dde̱n kitingawe nonno daiza, iróng atin enne a̱da̱i̱ dee udut.

¹⁰ Imma daizi ci Ye̱su̱ ko̱, a̱da̱i̱ kar kaara mu̱nye̱n cik ollu do̱o̱k lak co̱de̱. Imma i̱yo̱ko̱ zin, aruge enne, abak zo̱ze̱ ci Ta̱mu̱ta̱dde̱no̱.

¹¹ Abunna zin niga ming a̱gga̱yyu̱ niko, iróng mu̱nye̱na̱ ngen abalung bo̱do̱k, urumteu niga ki Ta̱mu̱ta̱dde̱n zo̱ze̱ ci Ye̱su̱ Ki̱ri̱sto̱.

¹² I̱yo̱ko̱ zin, ma anyikku mu̱nye̱n kutuwaung o̱o̱tti̱ ciggo̱k kar unuwet kaal cik orong zi̱nze̱tti̱ ciggo̱k.

¹³ Ma anyikku o̱o̱tti̱ ciggo̱k koottung go̱o̱le̱ ci gerze kar anyait mu̱nye̱n, abarik aanycik zi̱nze̱tti̱ ciggo̱k do̱o̱k Ta̱mu̱ta̱dde̱n ki i̱yo̱ko̱ ol wak balik ingane Ta̱mu̱ta̱dde̱n daiza ke̱. I̱yo̱ko̱ zin, u̱tu̱gu̱z kaal cik abunna.

¹⁴ Ma anyikku mu̱nye̱n kanyait doiz ngatinno̱ng, eci lo̱ti̱nno̱wa̱ balik reentik Musesi ke̱ iróng ngen bo̱do̱k abalung, abarik aanycik de̱ti̱ne̱t ci Ta̱mu̱ta̱dde̱no̱ kabalung.

Du̱cca̱k cik zoz ci Ta̱mu̱ta̱dde̱no̱

¹⁵ Ka̱gga̱ naga niko aanyyet de̱ti̱ne̱t ci Ta̱mu̱ta̱dde̱no̱ ka̱vvu̱t labak, aanyyet wo̱ye̱ zoz necu ke̱me̱dda̱k mu̱nye̱n eci iróng lo̱ti̱nno̱wa̱ abaleta? I̱llo̱i̱!

¹⁶ Abarik zin abunna ming ka̱gga̱ niko ke̱e̱ggi̱n naga du̱cca̱k cik ol wak ko̱ngo̱o̱le̱ naga. Ming ke̱e̱ggi̱n du̱cca̱k cik mu̱nye̱nu̱, okkoyet daiza, abarik zin abunna ke̱e̱ggi̱n du̱cca̱k cik Ta̱mu̱ta̱dde̱no̱ okkoyet bak karuba bunnat cinne.

¹⁷ E̱e̱ggi̱nnu̱ niga ba̱li̱ye̱ du̱cca̱k cik mu̱nye̱nu̱, abarik aanycik Ta̱mu̱ta̱dde̱n zany, eci niga iziktu de̱mzi̱ne̱t cinne, kar u̱zu̱tte̱ de̱mzi̱ne̱t neci zi̱nze̱tti̱nne̱ cuggo̱k.

¹⁸ I̱yo̱ko̱ zin, iróng niga ngen anyakku mu̱nye̱n, abarik izetu niga du̱cca̱k cik bunnat ci Ta̱mu̱ta̱dde̱no̱.

¹⁹ Katubuzei anna zoz necu niko ko̱, eci ngen niga e̱e̱ggi̱nnu̱ tarbale ngen a̱gga̱c zoz imma. Anyikku niga e̱le̱tti̱ ciggo̱k kizeto du̱cca̱k kaale cik gerzek, ngati abarik weete anyikku e̱le̱tti̱ ciggo̱k kizeto du̱cca̱k cik bunnat ci Ta̱mu̱ta̱dde̱no̱ kar izet dooli ciginnek a̱li̱le̱.

²⁰ Ecebannung i̱ge̱t do̱o̱k mu̱nye̱na̱ o̱o̱tti̱, iróng ngen i̱no̱nnu̱ gi̱i̱ ci abunna ngu̱me̱ ci Ta̱mu̱ta̱dde̱no̱.

²¹ Amudannu i̱yo̱ko̱ niga nya ci abunna kaale cik anyahakku̱ng a̱li̱ya̱n ko̱? Ovvoyyung zin kaala ne̱ko̱ do̱o̱k go̱o̱le̱ ci daizo.

²² I̱yo̱ko̱ zin, aara Ta̱mu̱ta̱dde̱n mu̱nye̱n ciggo̱k, abaktu labak, izetu niga du̱cca̱k cik Ta̱mu̱ta̱dde̱no̱. A̱a̱nyu̱ng zin zoz necu izet ol cik a̱li̱le̱ kar bo̱do̱k kuyung baize ci aave udut.

²³ Aanyyet mu̱nye̱na̱ daiz, okko zoz ci Ta̱mu̱ta̱dde̱no̱ aanyyet baiz ci aave udut ngati Manyitinna Ye̱su̱ Ki̱ri̱sto̱.