O̱no̱zzo̱k 21 - Tennet

Acin Joni ta̱mu̱-keng ci een jor ki lo̱o̱c ci een jor

¹ Kicina zin anna ta̱mu̱-keng ki lo̱o̱c ci een jor, eci ta̱mu̱-kengi ki lo̱o̱c bali o̱o̱tti̱nu̱ ke̱ i̱zze̱c to ne dakdak, i̱zzi̱ zin nyatapari ci a̱ddi̱ki̱re̱ imma to.

² Kedenya orog ci A̱li̱le̱, een Jerusalem ci een jor, iyowa ta̱mu̱-kenga ngati Ta̱mu̱ta̱dde̱no̱, kar zin kidiman ele ogon ki nyatirani ci aime ki̱zi̱zi̱ kicin mac cinne.

³ Kar anna kizik muluk ci a̱bu̱le̱ a̱kku̱ lecera, azi ne, “I̱yo̱ko̱ aave nginti abahe Ta̱mu̱ta̱dde̱n olle, kar atin enne kabak ki nogo. Ovvo atin nege e̱e̱ggi̱n ol ciginnek, okko atin Ta̱mu̱ta̱dde̱n eliya abak ki nogo kar enne kize Ta̱mu̱ta̱dde̱n cinne̱ng.

⁴ A̱vi̱la̱ atin enne ti̱la̱lo̱ eberene cigge̱k. I̱zzi̱ atin bo̱do̱k daizi to icima mozinet icima u̱lu̱wa̱ icima u̱u̱ce̱z, eci kaala balik reentik ke̱ i̱zze̱c to ne dakdak.”

⁵ Kar E̱e̱ti̱ bali aave lecera ke̱ kize ne, “Kogonni anna kaal do̱o̱k kizeto cik adimanai jor!” Kar zin enne bo̱do̱k kize ne, “Teherik zoz necu lo̱o̱c, eci zo̱zzo̱wa̱ e̱e̱ggi̱n de̱de̱ agano ki tu̱we̱ne̱t.”

⁶ Ize zin enne ne, “Ubunntta kaala do̱o̱k. Ke̱e̱ni̱ anna Kananet ki Ṯurnenet, kakane anna kar kedecak. Imma ngati e̱e̱t ci a̱ru̱k koor, kanyike atin anna maam ollin e̱be̱re̱ce̱ ci maam cik rugeto.

⁷ Imma e̱e̱ti̱ ci anime no̱ngi̱tto̱n do̱o̱k, aragiz atin enne baiz cu, kokko anna atin ke̱e̱ni̱ Ta̱mu̱ta̱dde̱n cinne, okko atin enne een do̱le̱c cinanni.

⁸ Ma̱i̱je̱ ol wak o̱ngo̱o̱le̱ ol ko̱, ki ol wak iróng a̱tu̱we̱, ki ol wak mu̱nye̱nu̱, ki ol wak amuny ol, ki ol wak e̱e̱ggi̱n a̱li̱ya̱k, ki ol wak irez agura, ki ol wak ala to̱do̱yyo̱k ki volongnyok, een gwa̱a̱ ci apadpadi oroot ko̱ cinne̱ng. Een necu daiz ci vu̱rrto̱.”

Jerusalem ci een jor

⁹ I̱ki̱ya̱ zin annit anjilo co̱de̱ anjilonyai cik e̱e̱ggi̱n turgerem ko̱, balik anyak uduce turgerem abbize zerenina kar kize ne, “I̱jja̱, ki̱ye̱le̱ki̱ atin nyatiran, ngaa ci Nyoono.”

¹⁰ Kar zin enne kodonga annit Vongize ci Ta̱mu̱ta̱dde̱no̱ o̱no̱zo̱we̱ okkoyya biye ci a̱ddi̱ki̱re̱ wu̱u̱ni̱ oroot, kar ki̱ye̱le̱ya̱ orog ci A̱li̱le̱, wa een Jerusalem, a̱kku̱ ta̱mu̱-kenga ngati Ta̱mu̱ta̱dde̱no̱ alucak lo̱o̱c.

¹¹ Aanyik di̱ngdi̱ngo̱ni̱ ci Ta̱mu̱ta̱dde̱no̱ orog neci katalany, okko lanyci cinne ogon kiwagon be ci een zara jasper a̱zi̱ze̱ alanyiti, ataltali bo̱do̱k ki i̱yo̱ko̱ kirijaja ko̱.

¹² Anyak a̱lu̱wa̱ ci a̱ppwe̱ wu̱u̱ni̱ kaldang ki arranet omoto ki rama, ki anjilonya omoto ki rama ebekce arranete. Okko arranete e̱he̱rye̱ zara cik booryyok cik Israilo e̱e̱ggi̱n omoto ki rama ko̱.

¹³ Anyak da̱ arranet i̱i̱yo̱ o̱to̱ne̱ ci je̱e̱ni̱, i̱i̱yo̱ o̱to̱ne̱ ci i̱do̱wo̱, ovvo arraneta cik e̱e̱ggi̱n i̱i̱yo̱ aavtte o̱to̱ne̱ ci i̱do̱li̱ya̱, kar arraneta cik e̱e̱ggi̱n i̱i̱yo̱ ka̱vvu̱to̱ o̱to̱ne̱ ci nyigjo.

¹⁴ Okko a̱lu̱wa̱ ci orog ci a̱ddi̱ki̱re̱ eenyce lo̱o̱ta̱ biyene cik i̱ti̱re̱ne̱ e̱e̱ggi̱n omoto ki rama, e̱he̱rye̱ zin zara cik to̱ni̱a̱k cik Nyoono omoto ki rama.

¹⁵ Okko anjilo ci ozozika annit ko̱, anyak keet ci adimanai zu̱rte̱nte̱ ci een dhahab, kar kiyab orog ci a̱ddi̱ki̱re̱ ko̱, ki arranet ki a̱lu̱wa̱ keeta.

¹⁶ Adimane orogi neci ku̱tu̱gu̱ ki ce̱e̱ndu̱i̱ ci anyak abanyo we̱c cik atubo do̱o̱k. Iyab enne orog keeta kar kuruba ming anyak mailnya i̱bbo̱ng co̱de̱ ki obet we̱c (1,400) kutubto wu̱u̱nze̱ta̱ abanyo we̱c veelek.

¹⁷ Baling iyab enne a̱lu̱wa̱ cinne, e̱e̱ggi̱n moten torkonom ki tu̱r mitirnya ta̱dde̱na̱. Een necu yabzinet ci e̱e̱t ci diiri, okko bo̱do̱k anjilo ci Ta̱mu̱ta̱dde̱no̱ iyab kaal niko bu̱k.

¹⁸ Eenyce da̱ a̱lu̱wa̱ neci biyene cik azi zar ne jasper ataltali ki teltelena, kar zin orogi keteehenye zu̱rte̱ni̱te̱ ci een dhahab caale paz, ku̱tu̱gu̱ ki kirijaja ci ataltali.

¹⁹ E̱he̱dde̱ biyena cik abilne a̱lu̱wa̱ ci o̱rgu̱ ko̱ ki̱zi̱ze̱c. Een be ci i̱ti̱re̱ne̱ a̱lu̱wa̱ oowa ko̱ een zara jasper, okko be ci i̱ti̱re̱ne̱ a̱lu̱wa̱ ci een rama ko̱ een zara sapphire, okko ci een i̱i̱yo̱ ko̱ een zara chalcedony, imma ci een we̱c ko̱ een zara emerald,

²⁰ okko be ci i̱ti̱re̱ne̱ a̱lu̱wa̱ een tu̱r ko̱ een zara sardony, okko ci een torkonom ko̱ een zara carnelian, okko ci een turgerem ko̱ een zara chrysolite, okko ci een tu̱rge̱ ko̱ een zara beryl, okko ci een torkoc ko̱ een zara topaz, okko ci een omoto ko̱ een zara chrysoprase, okko ci een omoto ki co̱de̱ een zara jacinth, kar zin ci een omoto ki ram ko̱ een zara amezyst.

²¹ Ovvo arraneta cik e̱e̱ggi̱n omoto ki rama ko̱ eenycai biyene cik voorik per e̱e̱ggi̱n omoto ki rama bu̱k, eenycai arani co̱de̱ biye ci voori per. Okko gool ci a̱ddi̱ki̱re̱ o̱rgu̱ ko̱ eenycai zu̱rte̱nte̱ ci een dhahab ci caale paz, ogon kiwagon kirijaja ci edenya i̱nna̱ e̱e̱t eci goola.

²² Ngen anna kicin Ce̱e̱z wa Ta̱mu̱ta̱dde̱no̱ orgato, ma̱rri̱t Manyi Ta̱mu̱ta̱dde̱n wa anyak Komiz do̱o̱k ki Nyoon nogo cik e̱e̱ggi̱n Ce̱e̱z wa Ta̱mu̱ta̱dde̱no̱.

²³ Iróng orogi orong i̱i̱ icima nye̱lo̱k kar kataran lo̱o̱c, ma̱rri̱t di̱ngdi̱ngo̱ni̱ ci Ta̱mu̱ta̱dde̱no̱ ataran lo̱o̱c, okko Nyoon een urez cinne.

²⁴ Ovvo atin olli lo̱o̱tu̱ owo ojonun ki urez cinne, kar alaata cik lo̱o̱tu̱ do̱o̱k kanyaktak i̱to̱kze̱t cinne̱ng orog ci a̱ddi̱ki̱re̱.

²⁵ Iróng arraneta cik o̱rgu̱ atin anyuge udut, eci i̱llo̱i̱ atin ba̱a̱li̱n nginati.

²⁶ Anyahak atin olli lo̱o̱tu̱ di̱ngdi̱ngo̱n ki ngo̱li̱ne̱t ngin neci.

²⁷ I̱llo̱i̱ atin gi̱i̱ imma ci anyak mu̱nye̱n kar ki̱tto̱ ngin neci, icima i̱i̱zo̱ e̱e̱ti̱ imma ci ogon kaal cik gerzek, abarik i̱i̱zo̱ ol cik e̱he̱rye̱ zara cigge̱k buwe ci Nyoono rugeto do̱ niko cik aavtte o̱rge̱ neci.