Ma̱te̱yo̱ 28 - Tennet

Itinga Ye̱su̱ daiza

¹ Baling edeccai I̱i̱te̱ni̱ wa Yu̱bze̱nto̱, oot zin Ma̱ri̱ya̱ Madalina ki Ma̱ri̱ya̱ imma bo̱do̱k gooni rok ilomi ci Ye̱su̱ munyata i̱i̱te̱ne̱ wa een Dominika.

² Ataman niko otomowe ki̱rki̱ryi̱ lo̱o̱c, ulucak zin anjilo ci Manyi ta̱mu̱-kenga lo̱o̱c. Iyot zin bee bali anyuge ol ilomi ci Ye̱su̱ ke̱ kar ka̱vvu̱ biye neci.

³ Alanyit ele ci anjilo ci Ta̱mu̱ta̱dde̱no̱ kiwagon borowoci ming abadi, ovvo ru̱u̱ma̱ni̱ ciginnek voori per kiwagon i̱ra̱na̱.

⁴ A̱bba̱ri̱te̱t zin e̱le̱tti̱ cik ol ne̱k ebek ilomi ke̱ ngati o̱ngo̱o̱li̱nne̱ kar kudduwet lo̱o̱c ki ci a̱da̱i̱to̱.

⁵ Iizek anjilo ci Ta̱mu̱ta̱dde̱no̱ ngaai ne̱ke̱ ne, “Ma o̱ngo̱o̱li̱nnu̱! Ka̱gga̱ orongnyu niga Ye̱su̱ bali ododike ol nonno ta̱la̱ke̱c ke̱.

⁶ Iróng enne aave ngatu! Itingawe Ta̱mu̱ta̱dde̱n nonno daiza ki bali u̱du̱wa̱ Ye̱su̱ azi ne okko atin enne ingazi daiza. I̱vi̱ta̱ icinnet ngin bali abahek ol nonno ke̱.

⁷ I̱yo̱ko̱ i̱mi̱rtte̱ ataman, oot u̱du̱ktta̱k nuyak ciginnek izektek ne, ‘Itinga Ye̱su̱ daiza uruga, abarik enne okko o̱o̱we̱ cunno̱ng lo̱o̱ce̱ ci Ga̱li̱li̱.’ Oot nginati ovvo atin acinnu nonno. I̱yo̱ko̱ ku̱du̱wa̱u̱ng.”

⁸ O̱to̱ngo̱o̱ltte̱ ngaai kar bo̱do̱k katalto, ngati i̱mi̱rtte̱ iloma ataman ovvo a̱du̱wa̱k nuyak ciginnek.

⁹ Baling ovvo nege a̱vi̱r, u̱ru̱mtto̱ zin ki Ye̱su̱ kar enne kizek nogo ne, “Izayo.” I̱vi̱tta̱k zin nege nonno ojonun, a̱ka̱tte̱k u̱zu̱ngti̱nne̱ zoone ciginnek kar ki̱di̱ngdi̱nga̱ni̱t nonno.

¹⁰ Izek zin Ye̱su̱ nogo ne, “Ma o̱ngo̱o̱li̱nnu̱ zoz imma! U̱du̱ktta̱k nuyak cigannik aanycik koot lo̱o̱ce̱ ci Ga̱li̱li̱. Ovvo atin nege acinna annit nginati.”

Zoz ci a̱du̱wa̱ ol wak ebek ilomi

¹¹ Baling ngen ngaai owo goola, oot aciiri uggak, wak ebek ilomi orgato. U̱du̱ktta̱k alaat cik olli wawaco zoz neci do̱o̱k.

¹² U̱ru̱mtto̱ zin alaata cik olli wawaco ki lo̱ddi̱ki̱re̱ kar ku̱ru̱ktte̱k aciir ne̱ke̱ o̱ro̱bi̱ya̱ cik meelek abunna ming ovolongi ovvo azi ne ngen Ye̱su̱ kitinga daiza,

¹³ Izektek zin nege aciir ne, “U̱du̱ktta̱k ol do̱o̱k zoz ci azi ne, ‘I̱vi̱ta̱ nuyaha cik Ye̱su̱ ba̱a̱l kar kodongit ele cinne baling ngen niga adungnu.’

¹⁴ Ming izik ddi̱ki̱ryo̱i̱ti̱ Pilato zoz necu, kozozikka atin naga nonno. Arannu̱ng atin zoz necu no̱ngi̱tto̱ne̱.”

¹⁵ A̱gga̱mtta̱ zin aciiri ne̱ke̱ o̱ro̱bi̱ya̱ kar ku̱tu̱gu̱zzo̱ zoz bali a̱du̱wa̱k alaata cik olli wawaco ki lo̱ddi̱ki̱re̱ nogo ke̱. Ikeb zin olli Ya̱u̱do̱ zoz neci rok i̱yo̱ko̱.

Li̱ngli̱ngo̱n ci abunna ming ogon nuyaha cik Ye̱su̱

¹⁶ Oot zin nuyaha cik Ye̱su̱ een omoto ki co̱de̱ rok bee ci Ga̱li̱li̱, ngin bali a̱du̱wa̱k Ye̱su̱ nogo abunna ming ovvo nginati.

¹⁷ Baling icinnet nege nonno, kar zin ki̱di̱ngdi̱nga̱ni̱t nonno, imma ol uggak ngatinne̱ng abile zi̱nze̱tti̱ je̱e̱na̱.

¹⁸ I̱ki̱ya̱k Ye̱su̱ nogo, kar kize ne, “Aanya Ta̱mu̱ta̱dde̱n komiz do̱o̱k ta̱mu̱-kenga ki lo̱o̱ta̱ ngatu.

¹⁹ I̱yo̱ko̱, oot ngati ol cik lo̱o̱tu̱ do̱o̱k komize cinanni, aanycik booryyok do̱o̱k kizeto nuyak, a̱gga̱mte̱k nogo ba̱ti̱ti̱mo̱ zare cik Baba ki cik Ngerinne ki Vongiz ci A̱li̱le̱,

²⁰ Edemezit nogo abunna ming o̱ngo̱o̱le̱ kaal cik ka̱du̱wa̱kku̱ng anna i̱ge̱t ko̱ do̱o̱k. Kaave atin ngati een i̱ge̱t odohize, rok nginti aṯurneke looci.”