Lu̱ka̱ 1 - Tennet

Zoz oo

¹ Eteherit ol cik meelek nga̱ri̱de̱t cik obod ki kaal balik u̱tu̱gu̱zze̱ orgene cinna,

² ki baling ka̱gga̱ma̱ naga ngati ol balik een bbacak ki du̱cca̱k cik zozak ke̱.

³ Kar zin ming kicina anna eliya kaal do̱o̱k kanenta, abunna ngatinanni kar keteher zo̱zzo̱k ne̱ke̱ do̱o̱k ju̱rru̱m, keheriki anna i̱nne̱ta̱, Theophilos,

⁴ kar atin i̱nna̱ gga̱ kaal cik e̱he̱rye̱ bali edemzeki ol i̱nne̱t ko̱.

U̱du̱ya̱i̱ ti̱rra̱ne̱t ci Jon Ba̱ti̱ti̱mo̱

⁵ Imma e̱rki̱te̱ bali abale alaani He̱ro̱di̱ lo̱o̱c ci Ju̱de̱ya̱, anyak da̱ e̱e̱t ci wawaco een zara Zakaria, a̱kku̱ enne tatuge ci olli wawaco biilet ci Abijah; a̱kku̱ ngaa cinne Elizabethi tatuge ci Aaroni.

⁶ Abunna bali nege a̱gga̱m zoz ci Ta̱mu̱ta̱dde̱no̱ oroot. Acin bo̱do̱k ol nogo ming azunne lo̱ti̱nno̱k wak Manyi ki keerani cigge̱k.

⁷ Ma̱i̱je̱ ngatu, i̱llo̱i̱ nogo dooli, eci Elizabethi abile; anyait zin nege do̱o̱k e̱rki̱nya̱ cik meelek.

⁸ Baling ize i̱i̱te̱n ci a̱li̱ngli̱nge̱ Zakaria zoz ci Ta̱mu̱ta̱dde̱no̱,

⁹ atahaltta zin ol nonno go̱o̱le̱ ci a̱ru̱we̱ nege bibi, kiwagon ming ogon olli wawaco keere cinne̱ng, okko enne rok Ce̱e̱z wa Ta̱mu̱ta̱dde̱no̱ kuk ku̱bbu̱rru̱ta̱n lotagong ecito ngati Manyi.

¹⁰ Kar baling i̱ki̱ya̱ i̱i̱ ci okko enne a̱bbu̱rru̱ta̱ne̱ lotagong, ovvo ol wak ala Ta̱mu̱ta̱dde̱n ke̱ do̱o̱k aavtte reena.

¹¹ I̱ye̱le̱k zin anjilo ci Manyi nonno ele, ibil i̱te̱la̱ abanyca ngati aave lotagongi.

¹² Baling icin Zakaria nonno, u̱ku̱le̱k je̱e̱n, kar enne ko̱to̱ngo̱o̱le̱ oroot.

¹³ Ma̱i̱je̱ anjilo a̱nne̱k nonno ne, “Ma o̱ngo̱o̱le̱ gi̱i̱ imma, Zakaria; izik Ta̱mu̱ta̱dde̱n lawinet cunne. A̱rri̱ta̱ki̱ atin Elizabethi ngaa cunne i̱nne̱t do̱le̱c ci maci, kar i̱nna̱ katek nonno zar cik een Jon.

¹⁴ Anyahaki atin enne i̱nne̱t talninet, ovvo atin ol cik meelek atalne i̱i̱te̱ne̱ ci ti̱ra̱ne̱t cinne,

¹⁵ okko atin enne a̱ddi̱ki̱re̱ o̱to̱ne̱ ci Manyi. Iróng atin enne aud merte icima kaal cik amukcari, aave atin Vongizi ci A̱li̱le̱ ki nonno ti̱ra̱nta̱.

¹⁶ Obodane atin enne ol cik Israilo meelek giir ki̱vi̱ta̱k Manyi Ta̱mu̱ta̱dde̱n cinne̱ng.

¹⁷ Okko atin enne oowa ngu̱me̱ ci Manyi vongiza ki komize ci E̱li̱ja̱, kar atin kutuhu zi̱nze̱tti̱ cik be̱e̱ti̱gge̱k ngati dooli cigge̱k kar ol wak iróng elemi kar kelemtta genyiz ci abunna, kar kidimanit ol kerec Manyi.”

¹⁸ I̱jji̱n zin Zakaria anjilo, “Ka̱gga̱ atin anna zoz necu ku̱? Kiize anna ma̱ti̱yo̱c kar ngaa cinanne kanyak e̱rki̱nya̱ cik meelek.”

¹⁹ Abarizek zin anjilo nonno, “Ke̱e̱ni̱ anna Gaburel. Kabili anna ngati aave Ta̱mu̱ta̱dde̱n, i̱tto̱na̱i̱ anna kar ki̱ki̱ya̱ kozozein kar ku̱du̱wa̱ kaviyak cik abunna ko̱.

²⁰ Kar i̱yo̱ko̱ ijakce atin i̱nna̱ li̱i̱m iróng ngen ozozi zee kakat zoz necu mo̱o̱le̱t, eci iróng i̱nna̱ elemi zoz cinanni, ci atin okko een de̱de̱ i̱i̱te̱ne̱ ci abunna.”

²¹ Imma ngatu ol ere Zakaria zee ka̱ma̱li̱ltte̱ o̱o̱tti̱ zo̱ze̱ ci aave enne u̱u̱mu̱c Ce̱e̱ze̱ wa Ta̱mu̱ta̱dde̱no̱ ecito.

²² Baling okko enne iyowa re̱e̱nu̱n, iróng enne ngen ozozik nogo. A̱gga̱c nege icin enne gi̱i̱ ci a̱vu̱la̱ Ce̱e̱ze̱ wa Ta̱mu̱ta̱dde̱no̱, ozozik enne ol azzine, ma̱i̱je̱ ngatu iróng ngen a̱pu̱k utug.

²³ Baling edeca enne li̱ngli̱ngo̱n cinne, obodak zin enne ce̱e̱z cinne.

²⁴ Kar vu̱rrte̱ ci zoz necu anyaho zin ngaa cinne Elizabethi kar zin ka̱vvu̱ ce̱e̱za̱ nyelowi tu̱r ci iróng i̱ye̱la̱i̱ orgene ci ollu.

²⁵ Ize zin Elizabethi ne, “U̱tu̱gu̱we̱ya̱ Manyi annit zoz cu. Okko gwo̱o̱nya̱ ne̱ko̱ i̱ye̱le̱ya̱ enne annit bunnat cinne kar aara zoz ci gerze ngatinanni orgene ci ollu.”

U̱du̱ya̱i̱ ti̱ra̱ne̱t ci Ye̱su̱

²⁶ Baling izeto nyelowi torkonom, i̱tto̱na̱ Ta̱mu̱ta̱dde̱n anjilo Gaburel kuk rok Nazareth, orog ci aave lo̱o̱ce̱ ci Ga̱li̱li̱,

²⁷ okko rok buuwec ci ngen ka̱ta̱gu̱zzo̱ ki e̱e̱t imma udut, arrahek ol e̱e̱t ci een Yosevo ki̱ti̱k, een enne boorit co Da̱vi̱de̱. Azi zar cik buuwec neci ne Ma̱ri̱ya̱.

²⁸ Uk anjilo ngatinne kar kizek nonno ne, “Kizzawo, i̱nne̱t ci ireze oroot! Aave Manyi ki i̱nne̱ta̱.”

²⁹ O̱to̱ngo̱o̱le̱ zin Ma̱ri̱ya̱ oroot zo̱ze̱ cinne kar ka̱ma̱li̱le̱ oo, zawinet ci ogon ku̱ necu.

³⁰ Ma̱i̱je̱ anjilo a̱nne̱k nonno ne, “Ma o̱ngo̱o̱le̱ gi̱i̱ imma Ma̱ri̱ya̱, irezi i̱nne̱t Ta̱mu̱ta̱dde̱n.

³¹ Anyakce atin i̱nna̱ kar ti̱rra̱ do̱le̱c ci maci, kar katek nonno zar cik een Ye̱su̱.

³² Ommog atin enne ol do̱o̱k kar ol kutuwec nonno kize Ngerrti wa Ommog Veelek. Aanyik atin Manyi Ta̱mu̱ta̱dde̱n nonno lecer ci ji̱ji̱ti̱ne̱ Da̱vi̱de̱,

³³ abal atin enne ce̱e̱z ci Ya̱ko̱bo̱ udut; iróng ba̱a̱li̱ne̱t cinne aṯurneke.”

³⁴ I̱jji̱n zin Ma̱ri̱ya̱ anjilo, “A̱kku̱ atin zoz necu ku̱, ming ke̱e̱ni̱ anna buuwec, ngen anna ka̱ta̱gu̱zza̱ ki e̱e̱t imma udut?”

³⁵ O̱bo̱de̱k zin anjilo ci Ta̱mu̱ta̱dde̱no̱ nonno a̱nne̱k ne, “Abuweki atin Ta̱mu̱ta̱dde̱n Vongiz ci A̱li̱le̱ komize cinne, kar komizi ci Manyi wa Ommog Veelek kubungin kar atin i̱nna̱ nyaho niko. Ming i̱ddi̱ki̱r wa A̱li̱le̱ O̱de̱ Ṯok, a̱gga̱ atin ol nonno ming een Ngerrti Ta̱mu̱ta̱dde̱no̱.

³⁶ Cin da̱ rok Elizabeth wa een boorit cunne ko̱, okko atin enne anyak do̱le̱c ming ize enne ma̱ti̱yo̱c nu̱nu̱n, kar nonno bali ci azi ol ne abile ko̱, abarik i̱yo̱ko̱ anyak do̱le̱c izeto nyelowi torkonom.

³⁷ I̱llo̱i̱ zin gi̱i̱ imma ci ommog Ta̱mu̱ta̱dde̱n.”

³⁸ Abariz zin Ma̱ri̱ya̱, “Ke̱e̱ni̱ anna du̱ca̱i̱t ci Manyi, anyik wo̱ye̱ zoz necu ku̱tu̱gu̱we̱ ki i̱yo̱ko̱ ming u̱du̱wa̱ i̱nna̱ ko̱.” Utungek zin anjilo nonno lo̱o̱c.

Eron Ma̱ri̱ya̱ rok Elizabeth

³⁹ Imma i̱i̱te̱n neci itinga Ma̱ri̱ya̱ kar ki̱yi̱k kuk o̱rge̱ ci aave zi̱i̱ra̱ lo̱o̱ce̱ ci Ju̱de̱ya̱,

⁴⁰ ngati okko enne i̱zo̱we̱ ce̱e̱z ci Zakaria kar kizza Elizabeth.

⁴¹ Baling izik Elizabethi zawinet ci Ma̱ri̱ya̱, ingoz zin do̱le̱c kenge cinne, kar Elizabethi kumuda Vongiz ci A̱li̱le̱.

⁴² Egereny zin enne muluwe ci a̱ppwe̱, “A̱ma̱yu̱we̱ i̱nna̱ orgene ci ngaanu, a̱ma̱yu̱we̱ do̱le̱c ci okko atin i̱nna̱ a̱rri̱ta̱ ko̱!

⁴³ Abarik nya ming ireza Ta̱mu̱ta̱dde̱n annit do̱ ko̱, kar e̱e̱ti̱ Manyi cinanni ki̱ki̱ya̱ rok annit ko̱?

⁴⁴ Baling uzuca zawinet cunne itat cinanni, ingoz zin do̱le̱c kenge cinanni talninta.

⁴⁵ A̱ma̱yu̱we̱ i̱nna̱ ngaa ci a̱tu̱ zoz ci u̱du̱wa̱i̱ Manyi i̱nne̱t okko atin ogone ko̱!”

Lo̱ng ci Ma̱ri̱ya̱

⁴⁶ Kar Ma̱ri̱ya̱ kize ne, “A̱di̱ngdi̱nga̱n zinin cinanne Manyi

⁴⁷ kar vongizi cinanne katalo ngati Ta̱mu̱ta̱dde̱n Ti̱ri̱zo̱i̱t cinanni,

⁴⁸ eci enne a̱gga̱ gununzet ci du̱ca̱i̱t cinne. Kar i̱yo̱ko̱, kuk oowa, awuya atin bu̱u̱llo̱wa̱ annit kize e̱e̱t ci a̱ma̱yu̱we̱,

⁴⁹ eci wa O̱de̱ Ommog veelek u̱tu̱gu̱we̱ya̱ enne annit kaal cik a̱ddi̱ki̱re̱, a̱li̱le̱ zara ciginnek.

⁵⁰ Okko deteni cinne rok ol wak o̱ngo̱o̱le̱ nonno, bu̱u̱llo̱k ki bu̱u̱llo̱k.

⁵¹ U̱tu̱gu̱ enne kaal cik a̱ddi̱ki̱re̱ azzine ciginnek; azan ol wak anyak zoz ci odonge e̱le̱tti̱ zi̱nze̱tti̱nne̱ cigge̱k.

⁵² A̱ju̱ke̱k enne lo̱o̱c alaat lecerite cigge̱k abarik enne odong ol wak gununik.

⁵³ Aanyik enne ol wak adak magiz kaal cik abunna ma̱i̱je̱ ngatu i̱tto̱n i̱tto̱k koot ollin.

⁵⁴ Eela enne ba̱li̱ye̱ du̱ca̱i̱t cinne Israil, a̱a̱da̱ enne bunnat cinne

⁵⁵ ngati Aburahami ki tatug cinne udut, ki baling u̱du̱wa̱k enne be̱e̱ti̱gga̱c.”

⁵⁶ Abaito Ma̱ri̱ya̱ ki Elizabeth ke̱de̱cca̱ nyelowi i̱i̱yo̱, kar zin ki̱mi̱re̱ kuk ce̱e̱za̱.

Ti̱ra̱ne̱t ci Joni Ba̱ti̱ti̱mo̱

⁵⁷ Baling ize ojon i̱i̱te̱n ci ukcane Elizabethi do̱le̱c cinne, utuyai zin, anyaha do̱le̱c ci maci.

⁵⁸ Iziyyet zin olli locariyo ki boor zoz ci azi ne i̱ye̱le̱k Manyi nonno deten cinne, kar zin kozolit ki nonno talninet.

⁵⁹ Baling ize i̱i̱nya̱ tu̱rge̱, i̱vi̱ta̱ nege ovvo etted do̱le̱c vi̱ca̱vi̱ca̱, orongit zin kakatek nonno zar cik baatinne Zakaria,

⁶⁰ ma̱i̱je̱ yaatinne ozoz ize ne, “I̱llo̱i̱! Anyik zar ciginnek kize Jon.”

⁶¹ Izektek zin nege nonno ne, “I̱llo̱i̱ e̱e̱t imma boore cunno̱ng ci anyak zar ne̱ko̱.”

⁶² Kar zin ol kozozek Zakaria azzine, kar kurubta zar cik orong enne kakatek do̱le̱c.

⁶³ I̱jji̱n zin enne gi̱i̱ wa e̱he̱ri̱ne̱ ol ko̱, kar keteher “Zar cik een Jon.” U̱ku̱lte̱k zin ol do̱o̱k je̱e̱n.

⁶⁴ Ataman niko, oowe nonno utugi kar a̱ha̱tti̱ cinne kumuc, kar zin enne kakate kozoz niko, innat Ta̱mu̱ta̱dde̱n.

⁶⁵ O̱to̱ngo̱o̱ltte̱ zin ol cik locariyo kar ol kozozit lo̱o̱ce̱ ci Ju̱de̱ya̱ ko̱ veelek kaal ne̱ko̱.

⁶⁶ Imma ol cik iziyyet zoz necu do̱o̱k a̱ma̱li̱ltte̱ o̱o̱tti̱ zo̱ze̱ necu, a̱jji̱nne̱, “Okko atin do̱le̱c necu een ku̱?” Eci a̱zzi̱ti̱ ci Manyi aave ngatinne.

Lo̱ng ci Zakaria

⁶⁷ Anyak da̱ baatinne Zakaria Vongiz ci A̱li̱le̱ kar ku̱du̱wa̱ zoz cu:

⁶⁸ “Kinnati Manyi Ta̱mu̱ta̱dde̱n ci Israilo, eci enne i̱ki̱ya̱ i̱ti̱ri̱z ol ciginnek.

⁶⁹ Anyahait enne agit e̱e̱t ci okkomi kize ti̱ri̱zo̱i̱t cinna ce̱e̱ze̱ ci du̱ca̱i̱t cinne Da̱vi̱de̱

⁷⁰ ki bali ming a̱du̱wa̱k enne go̱o̱le̱ ci a̱ri̱tto̱k waginnek a̱li̱le̱ reentik,

⁷¹ ti̱ri̱ze̱ne̱t ngati mo̱ddo̱ cigga̱c kar bo̱do̱k azzine cik ol wak amarinet agit do̱o̱k

⁷² ki̱ye̱le̱k deten be̱e̱ti̱gga̱c kar ka̱a̱dda̱ olom cinne a̱li̱le̱,

⁷³ olom bali ogon enne ki be̱e̱ti̱nna̱ Aburaham:

⁷⁴ keelawet agit azzine cik mo̱ddo̱ cigga̱c, kar kaanyyet ki̱li̱ngli̱ngte̱k nonno ci iróng ko̱ngo̱o̱le̱ gi̱i̱ imma

⁷⁵ ngati a̱li̱le̱ zi̱nze̱tti̱ cigga̱c ki bunnat ngu̱me̱ cinne i̱i̱nya̱ do̱o̱k.

⁷⁶ Kar i̱nna̱ ngeranni, awuyi atin ol ize a̱ri̱to̱i̱t ci Manyi wa Ommog Veelek; eci okko atin i̱nna̱ oowe ci Manyi kar dimanek nonno gool,

⁷⁷ kar i̱nna̱ anyik ol ciginnek ka̱gga̱c genyiz ci ti̱ri̱ze̱nto̱ go̱o̱le̱ ci alalneke Manyi nogo mu̱nye̱n,

⁷⁸ eci bunnati ki deten ci Ta̱mu̱ta̱dde̱n cinna, go̱o̱le̱ ci iyowane atin koor ngatinna ta̱mu̱-kenga,

⁷⁹ kataran ol wak abak mu̱hu̱ri̱te̱na̱ ki ngati daizo, ki̱ye̱le̱k zo̱o̱ cigga̱c gool ci anyak gano.”

⁸⁰ Itinga zin Joni ki̱ddi̱ki̱r kar kokkom vongiza; abak balala zee kar ki̱ye̱le̱k ol ele Israila.