Ga̱la̱ti̱a̱ 1 - Tennet

Zawinet ci Pa̱u̱lo̱

¹ Keheri anna Pa̱u̱lo̱ waraga cu, atahala Ta̱mu̱ta̱dde̱n kar ki̱li̱ngli̱ng li̱ngli̱ngo̱n cinne, ke̱e̱ni̱ to̱ni̱a̱t ci kuwahek ol zoz ci Ye̱su̱. Iróng ahalana e̱e̱ti̱ ci diiri, icima zu̱we̱ cik ahalanan. I̱tto̱na̱na̱ annit Ye̱su̱ Ki̱ri̱sto̱ ele ki Ta̱mu̱ta̱dde̱n wa een Be̱e̱ti̱nna̱ bali ingane Ye̱su̱ daiza ke̱.

² Ki̱tto̱na̱nna̱ naga do̱o̱k gotonogget ki ngonogget wak a̱tu̱we̱ waraga cu ke̱le̱ci̱a̱nya̱ cik lo̱o̱c ci een Ga̱la̱ti̱a̱.

³ Anyik Ta̱mu̱ta̱dde̱n wa een Be̱e̱ti̱nna̱ ki Manyi Ye̱su̱ Ki̱ri̱sto̱ ka̱a̱nyu̱ng eezet ki gano.

⁴ A̱gga̱yyu̱ niko aanyik Ye̱su̱ ele cinne kize wawac ci aara ol mu̱nye̱n ki bali ming odola Ta̱mu̱ta̱dde̱n wa een Be̱e̱ti̱nna̱, kar keelawet lo̱o̱ce̱ ci gerze kabahe anyak mu̱nye̱n ko̱.

⁵ Ki̱di̱ngdi̱nga̱ni̱t zar cik Ta̱mu̱ta̱dde̱no̱ udut, amin.

Zoz ci obod ki ke̱le̱ci̱a̱nya̱ cik Ga̱la̱ti̱a̱

⁶ Ka̱ku̱le̱i̱ je̱e̱n zo̱ze̱ cunno̱ng eci utuburtu zoz ci Ta̱mu̱ta̱dde̱no̱ ataman, nonno ci a̱a̱nyu̱ng baiz ci abakku eezete ci Ki̱ri̱sto̱. Kanyaktaung ba̱li̱ye̱ kaviyak cik Ye̱su̱ abunna, abarik a̱tu̱yyu̱ kaviyak cik aavtte do̱ adarnannu kaviyak cik abunna Manyoni.

⁷ Iróng kaviyaha ne̱ko̱ een de̱de̱. Abarik anyak ol cik u̱la̱llu̱ng i̱ba̱ti̱ne̱ orong abunna ming uhuyu kaviyak cik abunna obod ki Ki̱ri̱sto̱ ko̱.

⁸ Ming anyak e̱e̱t ci uwahekkung kaviyak cik abunna ongorko ki cik kuwahekkung naga ko̱, icima ol u̱gge̱ icima anjilo ci a̱kku̱ ta̱mu̱-kenga, i̱i̱na̱k atin to̱ri̱ne̱t ci Ta̱mu̱ta̱dde̱no̱ nonno eci enne uwahek ol kaviyak cik aavtte do̱.

⁹ Ku̱du̱wa̱ anna ba̱li̱ye̱, i̱yo̱ko̱ kobodonik bo̱do̱k ka̱du̱wa̱ zoz cu: Ming uwak e̱e̱ti̱ kaviyak cik aavtte do̱ kaviyahe cik abunna balik iziktu niga ke̱, anyik e̱e̱t neci kotore.

¹⁰ Iróng anna ke̱e̱ni̱ e̱e̱t ci ka̱ru̱we̱k ol do̱ldo̱l. Korongi ki̱li̱ngli̱nge̱k Ta̱mu̱ta̱dde̱n do̱ niko. Ming kuwahek ol kaviyak cik orong nege do̱ niko, iróng wo̱ye̱ anna ke̱e̱ni̱ du̱ca̱i̱t ci Ki̱ri̱sto̱.

Een Pa̱u̱lo̱ to̱ni̱a̱t ci Ye̱su̱

¹¹ Gotonogga ki ngonogga tu̱we̱nta̱, korongi ku̱du̱wa̱u̱ng zoz cu, iróng kaviyaha cik abunna kuwahekkung ko̱ een zoz ci akane ol cik diirik, a̱vvu̱ kaviyaha ne̱ko̱ ngati Ye̱su̱ Ki̱ri̱sto̱.

¹² Amire ki e̱e̱t ci diiri ci edemzeka annit kaviyak ne̱ko̱, abarik Ye̱su̱ Ki̱ri̱sto̱ ci aanya kaviyak ne̱ko̱.

¹³ A̱gga̱yyu̱ ri̱t niga ba̱li̱ye̱ baiz cinanni kabahe kize e̱e̱t ci kazunne keer ci Ya̱u̱do̱. Ki̱gi̱da̱ ba̱li̱ye̱ oroot ol wak a̱tu̱we̱ Ce̱e̱ze̱ wa Ta̱mu̱ta̱dde̱no̱, korongi kegerzan nogo.

¹⁴ Ka̱gga̱ keer ci Ya̱u̱do̱ oroot kommog bu̱u̱l cigannik veelek. Kirezi keer ci ji̱ji̱ti̱ga̱nni̱k oroot.

¹⁵ Ma̱i̱je̱ baling ngen anna ki̱ti̱rra̱i̱ ke̱, atahala Ta̱mu̱ta̱dde̱n la̱du̱n, een enne bunnatait kar kodola zo̱ze̱ ci ahalanan,

¹⁶ kar ki̱ye̱le̱ya̱ Ngerinne, abunna ming kuwaheke ol wak iróng een Ya̱u̱d kaviyak cik abunna. Ngen anna ku̱du̱wa̱k e̱e̱t imma zoz necu.

¹⁷ Imma bo̱do̱k ngatu ngen anna kuk rok Jerusalem icima kozozik to̱ni̱a̱k balik o̱o̱tti̱nu̱ ke̱. Abarik kuwa rok lo̱o̱c ci een Arabiya e̱co̱de̱ niko, kar bo̱do̱k kobodak orog ci een Damascus.

¹⁸ Ma baling kedeca e̱rki̱nya̱ i̱i̱yo̱, keerona kuwa rok Jerusalem kokko kacinni Peturu, kar zin ka̱vvu̱tta̱ ki nonno i̱i̱nya̱ omoto ki tu̱r.

¹⁹ Ngen zin kurumtowa ki to̱ni̱a̱k do̱o̱k, ka̱vvu̱tta̱ ki Je̱mi̱s do̱ niko wa een gotoni Manyitinna Ye̱su̱.

²⁰ Ki̱tto̱ni̱k Ta̱mu̱ta̱dde̱n, een zoz ci ka̱du̱wa̱kku̱ng ko̱ de̱de̱, iróng een volong.

²¹ Ma bali vu̱rrta̱, kuwa lo̱o̱co̱we̱ cik een Syria ki Cilicia.

²² I̱llo̱i̱ rok e̱e̱t co̱de̱ olle ne̱k ala Ta̱mu̱ta̱dde̱n ke̱le̱ci̱a̱nya̱i̱ cik Ju̱de̱ya̱ ko̱ ci a̱tu̱ Ye̱su̱ Ki̱ri̱sto̱.

²³ Abarik nege a̱gga̱ zoz ci azi ne, “Abarik e̱e̱ti̱ bali gon a̱gi̱dde̱t ke̱le̱ci̱a̱nya̱i̱ ke̱ ci uwahek ol kaviyak cik abunna ki tu̱we̱ne̱t bali a̱gi̱d enne ke̱.”

²⁴ Innatit zin nege Ta̱mu̱ta̱dde̱n zo̱ze̱ cinanni.