2 Te̱se̱lo̱ni̱ka̱ 1 - Tennet

¹ Keherikung naga ciko Pa̱u̱lo̱ ki Silas ki Ti̱mo̱te̱yo̱ waraga cu ol wak ke̱le̱ci̱a̱k a̱tu̱ zoz ci Ta̱mu̱ta̱dde̱no̱ ki Manyitinna Ye̱su̱ Ki̱ri̱sto̱ o̱rge̱ ci een Te̱se̱lo̱ni̱ka̱.

² Anyik Ta̱mu̱ta̱dde̱n Be̱e̱ti̱nna̱ ki Manyi Ye̱su̱ Ki̱ri̱sto̱ wa bali atahalai kaanycung de̱ti̱ne̱t ki baiz ci abakku labak.

I̱i̱te̱n ci ettede Manyi lo̱ki̱ko̱

³ Gotonogga ki ngonogga tu̱we̱nta̱, kaanyika Ta̱mu̱ta̱dde̱n zany ngati a̱tu̱we̱nu̱ kar bo̱do̱k rezinet ci irezonnu e̱le̱tti̱ ju̱rru̱m.

⁴ Eci gon kinnatung ol wak a̱tu̱we̱ ce̱e̱zi̱nne̱ cik alawe ol Ta̱mu̱ta̱dde̱n lo̱o̱co̱we̱ do̱o̱k. Ka̱du̱wa̱kka̱ nogo zoz ci animnyu no̱ngi̱tto̱n zo̱ze̱ ci akannung ol go̱o̱le̱ ci obod ki zoz ci Ta̱mu̱ta̱dde̱no̱, ki bo̱do̱k tu̱we̱ne̱t ci a̱tu̱yyu̱ Ta̱mu̱ta̱dde̱n ming nu̱nu̱n a̱gi̱ddu̱ng ol.

⁵ A̱kku̱ atin i̱i̱te̱ni̱ ci okko Ta̱mu̱ta̱dde̱n ettede lo̱ki̱ko̱ ci ollu ju̱rru̱m, kar kidiman ol balik a̱gi̱d ol zo̱ze̱ ci ba̱a̱li̱ne̱t ci okko Ta̱mu̱ta̱dde̱n abale lo̱o̱c.

⁶ Eci gon Ta̱mu̱ta̱dde̱n ettede lo̱ki̱ko̱ ju̱rru̱m, okko atin ettedik ol balik a̱gi̱ddu̱ng ko̱ gerzet.

⁷ A̱a̱nyu̱ng atin Ta̱mu̱ta̱dde̱n abait yahe niga ol ne̱k a̱gi̱ddu̱ng ol ko̱, ogonekket agit bu̱k ming okko Manyi Ye̱su̱ alucak lo̱o̱c ta̱mu̱-kenga ki anjilonya ciginnek.

⁸ Anyaha ki gwo̱o̱ ci okko edeze ol cik iróng a̱tu̱ zoz ci Ta̱mu̱ta̱dde̱no̱, ki ol cik iróng elemi kaviyak cik abunna Manyitinna Ye̱su̱.

⁹ Edez atin Manyi nogo udut kar kanyik ka̱vvu̱to̱ reena alaanzete cinne.

¹⁰ Akane atin de̱zi̱ne̱t necu ming okko Ye̱su̱ oboda kataltal ele ngati ol wak a̱li̱le̱ a̱tu̱ zoz cinne kar ko̱to̱ngo̱o̱ltte̱ nonno. Kar ol balik a̱tu̱ nonno katalit. Iddonginu atin niga bu̱k ki ol ne̱ke̱, eci a̱tu̱yyu̱ zoz bali kuwahekkung obod ki Ye̱su̱ ke̱.

Alawek Pa̱u̱lo̱ Ta̱mu̱ta̱dde̱n ol wak a̱tu̱we̱ Te̱se̱lo̱ni̱ka̱

¹¹ Kalawekku̱ng Ta̱mu̱ta̱dde̱n odohize, kar Ta̱mu̱ta̱dde̱n kize ne abakttu go̱o̱le̱ ci abunna baize ci korongi abait ki bali ka̱du̱wa̱kku̱ng ke̱. Kalawekku̱ng bo̱do̱k Ta̱mu̱ta̱dde̱n cinna ka̱a̱nyu̱ng komiz ci ogonnu kaal cik abunna orongnyu u̱tu̱gu̱z eci niga a̱tu̱yyu̱ zoz ci Manyi Ye̱su̱.

¹² Kalayya Ta̱mu̱ta̱dde̱n cinna baize cunno̱ng kar irezzit Manyitinna Ye̱su̱, kar ol bu̱k kirezttung zo̱ze̱ ci Ye̱su̱, ngati eleme de̱ti̱ne̱t ci Ta̱mu̱ta̱dde̱no̱ ki Manyi Ye̱su̱ Ki̱ri̱sto̱.