2 Peturu 3 - Tennet

Okko i̱i̱te̱ni̱ ci obodane Manyi een de̱de̱

¹ Gotonogga ki ngonogga tu̱we̱nta̱, i̱yo̱ko̱ keherakkung bo̱do̱k waraga necu kar kunu gooni bali arrak keherakkung oowa ke̱. Imma zin waraganyai ne̱ko̱ do̱o̱k, korongi ka̱a̱da̱u̱ng i̱ge̱t zo̱zzo̱k ne̱ke̱ kar i̱no̱ni̱t nogo do̱o̱k.

² Korongnyung i̱ge̱t a̱a̱dda̱ zo̱zzo̱k balik a̱du̱wa̱ a̱ri̱tto̱wa̱ wak a̱li̱le̱ zoz ci Ta̱mu̱ta̱dde̱no̱, ki bo̱do̱k de̱mzi̱ne̱t ci Manyitinna wa een Ti̱ri̱zo̱i̱t bali edemezek enne to̱ni̱a̱k.

³ Arrak oowa, abunna ming a̱gga̱yyu̱ i̱i̱te̱n ci okko looci aṯurneke, a̱vvu̱ atin ol wak a̱da̱c ol, ovvo aranne ol cik a̱tu̱we̱, abarik nege i̱no̱n kaal cik gerzek irez zi̱nze̱tti̱ cigge̱k do̱ niko.

⁴ Azi atin nege ne, “Baling u̱du̱wa̱ Manyi cunno̱ng azi ne ka̱kku̱ni̱, a̱kku̱ atinga? A̱da̱i̱to̱ ji̱ji̱ti̱gga̱c, ngane kaala ogon ki bali eenycane Ta̱mu̱ta̱dde̱n lo̱o̱c ke̱, i̱llo̱i̱ gi̱i̱ imma ci een jor.”

⁵ Ibezzit nege zoz wa een de̱de̱ lurur, eenyca bali reena Ta̱mu̱ta̱dde̱n ta̱mu̱-keng ki lo̱o̱c zoza do̱. Eenyca enne lo̱o̱c maame.

⁶ Imma bali vu̱rrta̱ egerzan Ta̱mu̱ta̱dde̱n lo̱o̱c maame.

⁷ Abarik zin Ta̱mu̱ta̱dde̱n aanyik lo̱o̱c cu ki ta̱mu̱-keng ka̱vvu̱to̱ zee ki̱ki̱ya̱ i̱i̱te̱ni̱ ci okko enne ettede lo̱ki̱ko̱. Kar zin atin enne kakatek gwo̱o̱, kar kidita ol do̱o̱k wak iróng a̱tu̱ zoz cinne.

⁸ Gotonogga ki ngonogga tu̱we̱nta̱, ma anyikku gi̱i̱ co̱de̱ kereheung, ogon i̱i̱te̱ni̱ co̱de̱ ngati Manyi ki e̱rki̱nya̱ i̱bbo̱ng co̱de̱ (1,000), ovvo e̱rki̱nya̱ cik een i̱bbo̱ng co̱de̱ ogon ki i̱i̱te̱ni̱ co̱de̱.

⁹ Iróng Manyi ogon zoz ci u̱du̱wa̱ enne idic, ki i̱yo̱ko̱ ming i̱no̱n ol uggak ko̱. Alalizan enne zinin cinne ngatinno̱ng, iróng orong e̱e̱t imma ngatinno̱ng ka̱da̱k, abarik orong ol do̱o̱k kuturta mu̱nye̱n cigge̱k.

¹⁰ Abarik atin i̱i̱te̱ni̱ ci Manyi a̱kku̱ kiwagon ogoryaiti, iróng e̱e̱ti̱ imma a̱gga̱. Okko i̱i̱te̱ne̱ neci a̱zze̱ atin ta̱mu̱-kengi ne dakdak. Imma koor ki nye̱lo̱k ki munyuny atuze gwo̱o̱ya̱ ne lai. Atuze atin looci ki kaal do̱o̱k wak aavtte lo̱o̱ta̱ ngatu ko̱ ne lai, kar kaala do̱o̱k ki̱ye̱lta̱i̱.

¹¹ Aditai atin kaala veelek go̱o̱le̱ necu. Abunna zin ming abakku baiz ci a̱li̱le̱ o̱ngo̱o̱li̱nnu̱ Ta̱mu̱ta̱dde̱n kar i̱li̱ngli̱nge̱t zoz cinne.

¹² Ki i̱yo̱ko̱ e̱re̱yyu̱ niga i̱i̱te̱n ci Ta̱mu̱ta̱dde̱no̱ zi̱nze̱tti̱nne̱ cuggo̱k oroot. A̱kku̱ atin i̱i̱te̱ni̱ neci ki li̱be̱ne̱t ci lo̱o̱tu̱, atuze ta̱mu̱-kengi ki i̱i̱ ki nye̱lo̱k ki munyuny gwo̱o̱ya̱ ne lai.

¹³ Ki ming kere naga zoz ci u̱du̱wa̱ enne ko̱, kere naga ta̱mu̱-keng ki lo̱o̱c ci een jor bali u̱du̱wa̱e̱t Ta̱mu̱ta̱dde̱n agit ke̱, ngintik aavtte ol wak ogon kaal cik abunna.

¹⁴ Gotonogga ki ngonogga tu̱we̱nta̱, ming ngen niga erewinnu ko̱, abait baiz ci a̱li̱le̱, i̱llo̱i̱ rok gi̱i̱ imma ci gerze, kar bo̱do̱k abait yahe.

¹⁵ Abunna zin ming a̱gga̱yyu̱ niga zi̱nze̱tti̱nne̱ cuggo̱k, laliz zinin ci Manyi Ta̱mu̱ta̱dde̱n ci anyahakket ti̱ri̱ze̱ne̱t. Eteheraet gotoneti ci een Pa̱u̱lo̱ ba̱li̱ye̱ kaal ne̱ko̱ genyize ci aanyik Ta̱mu̱ta̱dde̱n nonno.

¹⁶ Eher enne waraganyai ciginnek do̱o̱k zoz ci akati kaal ne̱ko̱ ele. Ozoz gon bali enne zoz ci odoi ngatinna, iróng zin naga ka̱gga̱ ke̱ngti̱ cik zo̱zzo̱k ne̱ke̱. Imma ol uggak wak iróng a̱gga̱ zoz ci Ta̱mu̱ta̱dde̱no̱ ju̱rru̱m, ovvo nege edemezek zo̱zzo̱k cik Pa̱u̱lo̱ ol volonga. Edemez nege ol bu̱k waraganyai cik Ta̱mu̱ta̱dde̱no̱ ko̱ volonga. A̱li̱b atin Ta̱mu̱ta̱dde̱n nogo zo̱ze̱ necu.

¹⁷ Gotonogga ki ngonogga tu̱we̱nta̱, i̱yo̱ko̱ zin, eci niga a̱gga̱yyu̱ de̱mzi̱ne̱t ci ol wak e̱e̱ggi̱n volongnyok ko̱ la̱du̱n, abunna ming ebekku e̱le̱tti̱ ju̱rru̱m kar iróng nege alabanung i̱ge̱t kar urubta mu̱nye̱n cik ol wak abure Ta̱mu̱ta̱dde̱n bak kacin utuburtu tu̱we̱ne̱t cunno̱ng.

¹⁸ Abarik e̱me̱dda̱ niga abait baiz ci abunna gi̱i̱ye̱ wa a̱a̱nyu̱ng Manyitinna Ti̱ri̱zo̱i̱t Ye̱su̱ Ki̱ri̱sto̱ i̱ge̱t deten cinne ki zoz ci a̱gga̱yyu̱ nonno. Abunna ka̱di̱ngdi̱nga̱n zar cik Manyi udut. Nonno nenen.