2 Ko̱ri̱nto̱ 7 - Tennet

¹ Gotonogga ki ngonogga wak kirezi anna ko̱, eci Ta̱mu̱ta̱dde̱n u̱du̱wa̱ zoz cinne kar kaanyyet kizet dooli ciginnek, abunna naga do̱o̱k kabiliz ba̱ci̱nno̱k vongize cinna. Gerza ming kogon kaal cik gerzek, gerza ming ki̱no̱n i̱no̱ni̱ ci gerze. Abunna ko̱ngo̱o̱le̱ Ta̱mu̱ta̱dde̱n, kabak baiz ci caale. Ming ku̱tu̱gu̱zzo̱ naga niko, irezet atin Manyi oroot.

Atali Pa̱u̱lo̱ zoz ci olli ke̱le̱ci̱o̱

² Abunna ming irezettu niga agit zi̱nze̱tti̱nne̱ cuggo̱k do̱o̱k, eci ngen naga ku̱tu̱gu̱zza̱ e̱e̱t imma gerzet. Ngen bo̱do̱k kalabta e̱e̱t imma gi̱i̱ cinne.

³ Iróng ka̱du̱wa̱ zoz necu kar kapahekung zoz ci gerze. Abarik ki baling ku̱du̱wa̱ arrak oowa ke̱, ki̱no̱nnu̱ng odohize ngati ka̱da̱kne̱ icima karugne nga̱to̱de̱.

⁴ Karikku̱ng anna i̱ge̱t zinin oroot. Ke̱e̱ni̱ bo̱to̱ro̱c zo̱ze̱ cunno̱ng, imma no̱ngi̱tto̱ne̱ cik karuba kar kinim ko̱, katalne oroot.

⁵ Baling kutungteya naga lo̱o̱c ci een Macedonia lo̱o̱c ke̱, ipirta e̱le̱tti̱ cigga̱c, i̱vi̱ta̱ zin bo̱do̱k ol a̱gi̱dde̱t agit oroot.

⁶ Ma̱i̱je̱ Ta̱mu̱ta̱dde̱n wagon eela ol ciginnek odohize ming anyak no̱ngi̱tto̱n, i̱tto̱na̱i̱t zin bo̱do̱k Ti̱to̱ kobodaitta, katalta zin.

⁷ Katala zin anna baling kicina Ti̱to̱, imma baling okko enne a̱du̱wa̱ka̱ gool ci a̱gga̱mnyu̱ niga nonno, katala oroot. U̱du̱wa̱ zoz ci orongnyu niga icintang annita. Bak a̱du̱wa̱kku̱ gi̱i̱ ci gerze ogonikkang niga annita, u̱du̱ktta̱ng orongnyang niga ming kodolna anna kar ki̱li̱ngli̱ng zoz ci Ta̱mu̱ta̱dde̱no̱.

⁸ Ming nu̱nu̱n, a̱a̱nyu̱ng zoz ci kehera anna waraga ko̱ i̱ge̱t utuburet nong, iróng zin anna kazi ne aanya weda iróng keheri waraga cu ko̱ neci. Ketehera de̱de̱ eci ka̱gga̱ ovvo atin niga aburnnu nong arrak do̱yo̱i̱t.

⁹ I̱yo̱ko̱ zin, katalne ketehera anna waraga neci. Iróng anna katalne eci utuburtu niga nong, abarik eci burnenet ci aburnnu nong ko̱ a̱a̱nyu̱ng gool ci a̱jji̱nnu̱ Ta̱mu̱ta̱dde̱n abunna ming alalekkung. Iróng zin zoz ci ka̱du̱wa̱ anna ko̱ egerzan e̱e̱t imma ngatinno̱ng.

¹⁰ A̱a̱nyu̱ng matizi ci Ta̱mu̱ta̱dde̱no̱ o̱bo̱dda̱i̱ zi̱nze̱tti̱ cuggo̱k gi̱i̱ye̱ ci gerze u̱tu̱gu̱zzu̱ niga, kar utungtek ba̱ci̱nno̱k ne̱ke̱ lo̱o̱c, a̱ti̱ri̱zu̱ng zin atin Ta̱mu̱ta̱dde̱n de̱de̱, iróng zin atin ngen ettedekkung zoz ci gerze bali u̱tu̱gu̱zzo̱ niga ke̱, ma̱i̱je̱ matizi ci lo̱o̱tu̱ anyaha daiz.

¹¹ Icinnet gi̱i̱ ci u̱tu̱gu̱ Ta̱mu̱ta̱dde̱n ngati a̱a̱nyu̱ng matiz! Orongnyu niga i̱ye̱lte̱k nonno iróng niga anyakku ba̱ci̱. Omozinnu abarik niga, a̱ma̱li̱ltte̱ o̱o̱tti̱ cuggo̱k, orongnyu niga lo̱ki̱ko̱ kettede ju̱rru̱m. I̱ye̱la̱nu̱ niga e̱le̱tti̱ cuggo̱k ilemnyyu niga zo̱ze̱ necu.

¹² Imma zin kaale ne̱k keherakkung anna ko̱ do̱o̱k, iróng anna keheri zoz ci e̱e̱t ci u̱tu̱gu̱ gi̱i̱ ci gerze ko̱ icima e̱e̱t ci u̱tu̱gu̱we̱k enne gi̱i̱ ci gerze, abarik zin ngu̱me̱ ci Ta̱mu̱ta̱dde̱no̱ acinnu niga e̱le̱tti̱ne̱ gool ci irezzu niga agita.

¹³ Katalninna zin naga zo̱ze̱ necu. Kar talninte cinna̱ng, katalna zin naga oroot ngati zo̱ze̱ ci a̱du̱wa̱ Ti̱to̱ eci niga anyakku zinin cinne katalo.

¹⁴ Ku̱du̱wa̱ anna Ti̱to̱ zoz ci katalne anna ngatinno̱ng. Iróng korongi kadakta a̱li̱ya̱ni̱, eci kodongi ele zo̱ze̱ ci ogonnu niga, eci u̱tu̱gu̱zzu̱ kaal cik ka̱gga̱ ovvo niga ogonnu. U̱tu̱gu̱zzo̱ de̱de̱ ki bali ming kedemzekung anna ke̱, kar bo̱do̱k ketehereung zoz ci een de̱de̱, ogon ki kaala cik abunna bali ka̱du̱wa̱k Ti̱to̱ zoz ci een de̱de̱.

¹⁵ I̱yo̱ko̱, atalne Ti̱to̱ oroot eci u̱tu̱gu̱zzu̱ gi̱i̱ ci orongnyung enne abunna ming ogonnu. Atalne bo̱do̱k eci i̱ti̱ri̱zttu̱ niga nonno ba̱li̱ye̱ ju̱rru̱m. Ming okko enne i̱no̱n zoz neci, irezzung oroot.

¹⁶ Imma ngatinanni, katalne anna ngatinno̱ng oroot, aave zinin cinanne ngatinno̱ng oroot, eci anna ka̱gga̱ ngen niga ogonnu kaal cik abunna.