2 Ko̱ri̱nto̱ 6 - Tennet

¹ Imma gi̱i̱ye̱ wa ka̱li̱ngli̱ngo̱ni̱kka̱ naga Ta̱mu̱ta̱dde̱n, kilalekkung zin zo̱ze̱ cu: Abunna ming a̱li̱ngli̱ngnyu̱ bunnate ci Ta̱mu̱ta̱dde̱no̱ ju̱rru̱m.

² Azi Ta̱mu̱ta̱dde̱n ba̱li̱ye̱ Warage cinne ne, “Baling i̱ki̱ya̱ i̱i̱te̱ni̱ ci keelannung, kiziwung de̱de̱, imma i̱i̱te̱ne̱ ci ti̱ri̱ze̱nto̱, keelaung.” Ka̱du̱wa̱kku̱ng, i̱yo̱ko̱ een i̱i̱te̱n ci eelanne Ta̱mu̱ta̱dde̱n ol, een i̱i̱te̱ni̱ necu i̱yo̱ko̱ ci ti̱ri̱ze̱nto̱.

Pirnanet ci Pa̱u̱lo̱

³ Iróng naga kalamnyya ol ngati a̱tu̱we̱ zoz ci Ye̱su̱, abunna iróng ol atin ibbez li̱ngli̱ngo̱n cinna ngati ka̱li̱ngli̱nge̱k Ta̱mu̱ta̱dde̱n.

⁴ Abarik ke̱e̱ggi̱n naga du̱cca̱k cik Ta̱mu̱ta̱dde̱no̱ kaale cik ka̱du̱wa̱ kar bo̱do̱k kogon naga ko̱, kanimnya kaal cik i̱i̱na̱kke̱t baiza do̱o̱k. Anyahakket ol no̱ngi̱tto̱n, kanimnya naga dee niko,

⁵ i̱i̱te̱n imma a̱ru̱kke̱t ol, kokoltet lagam, kar koole ki̱gi̱dde̱tta̱, ka̱li̱ngli̱ngnya̱ naga oroot, i̱llo̱i̱ rok da̱i̱ne̱t ki ungnyak bu̱k.

⁶ Ma̱i̱je̱ ngatu, ki̱ye̱la̱nna̱ gon naga gi̱i̱ ci kanyakka doize ci Vongiz ci A̱li̱le̱ Ta̱mu̱ta̱dde̱no̱ ki rezinet cinne wa een de̱de̱ go̱o̱le̱ ci kabaka baiz wa abunna, ki genyiz ki i̱rrke̱ne̱t, ki bo̱do̱k kanyakka zi̱nze̱tti̱ cik alali.

⁷ Kar go̱o̱le̱ ci kozoze zoz ci een de̱de̱ ki doiz ci Ta̱mu̱ta̱dde̱no̱; ki doiz ci bunnat ci Ta̱mu̱ta̱dde̱no̱ baize cinna.

⁸ Ma̱i̱je̱ go̱o̱le̱ ci a̱di̱ngdi̱nga̱ne̱tta̱ icima otoryyetta, a̱du̱wa̱ ol uggak kogonna naga zoz ci abunna kar uggak ku̱du̱kta̱ zoz ci gerze; kogon zoz ci abunna, ming nu̱nu̱n azi ol uggak ne ke̱e̱ggi̱nna̱ naga volongnyok.

⁹ Iróng ol uggak a̱gga̱yye̱tta̱, abarik a̱gga̱yye̱ttu̱ niga agit oroot. Ogon ki ci ka̱da̱kta̱, abarik ngen karugna, ming edezet ol nu̱nu̱n, ngen ku̱ru̱ktte̱t ka̱da̱kta̱.

¹⁰ Ming kapirna naga nu̱nu̱n, kaavtte naga talninta. Ming kamati niko, izeto ol bo̱to̱ro̱ ngati kuwaheka kaviyak cik Ye̱su̱. Ming nu̱nu̱n, iróng kanyak kaal, e̱e̱ggi̱n kaala ne̱ko̱ do̱o̱k cigga̱c.

¹¹ Eehi, olli Ko̱ri̱nto̱ wak a̱tu̱we̱, ka̱du̱wa̱kku̱ng zoz ci een de̱de̱. Ku̱du̱ktta̱u̱ng de̱de̱ zoz ci kanyakka zi̱nze̱tti̱nne̱, katalnnung oroot.

¹² Iróng naga kabaka ki ci iróng kirezzung, abarik i̱ge̱t cik iróng irezettu.

¹³ Kozozikkung ki ming ozozik e̱e̱ti̱ dooli ciginnek. Abunna ming anyakku zi̱nze̱tti̱ cik voorik ngatinna̱ng.

Ma owowonu ki ol cik iróng a̱tu̱ Ye̱su̱

¹⁴ Ma owowonu oroot ki e̱e̱t ci iróng a̱tu̱ zoz ci Ye̱su̱. Ka̱du̱wa̱ niko eci naga ol cik a̱tu̱ zoz ci Ye̱su̱ ko̱ ogon kaal cik abunna, iróng korong ku̱tu̱gu̱zzo̱ kaal cik ogon olli mu̱nye̱nu̱. Iróng ol ne̱k a̱tu̱ Ye̱su̱ ko̱ arume ki ol wak lo̱rye̱nta̱k.

¹⁵ Iróng Ki̱ri̱sto̱ een gooni lo̱rye̱ni̱t wa een zara Belial. Iróng zin ol ne̱k a̱tu̱ Ye̱su̱ ko̱ baizi cinne̱ng atubo ki ol wak iróng a̱tu̱ nonno.

¹⁶ Iróng to̱do̱yo̱wa̱ ne̱k ala ol ko̱ e̱e̱ggi̱n cik Ce̱e̱z wa Ta̱mu̱ta̱dde̱no̱. Ke̱e̱ggi̱n naga e̱le̱tti̱ne̱ Ce̱e̱z wa Ta̱mu̱ta̱dde̱no̱, ki ming a̱du̱wa̱ Ta̱mu̱ta̱dde̱n eliya, “Kabaka atin anna ki ol ne̱ko̱ kar koto orgene cinne̱ng. Ke̱e̱ni̱ atin Ta̱mu̱ta̱dde̱n cinne̱ng, ovvo nege een ol cigannik.”

¹⁷ Azi bo̱do̱k Manyi ne, “Engertta zin e̱le̱tti̱ ngati ol ne̱k iróng a̱tu̱we̱ ko̱. Ma u̱u̱mnyu̱ kaal cik anyak mu̱nye̱n gon ngoronyik ko̱. Kar zin atin anna kelemaung.

¹⁸ Kiize anna be̱e̱ti̱nno̱ng, kar zin niga e̱e̱ggi̱nnu̱ atin dooli cigannik, ka̱du̱wa̱ anna Manyi Ta̱mu̱ta̱dde̱n wa anyak Komiz do̱o̱k.”