2 Ko̱ri̱nto̱ 12 - Tennet

Kaal cik i̱ye̱le̱k Manyi Ye̱su̱ Pa̱u̱lo̱

¹ Anycang kodong ele. I̱llo̱i̱ gi̱i̱ imma ci kar kuruba ngatu, kodongi ele kaale cik kicina i̱ye̱le̱ka̱ Manyi o̱no̱zo̱we̱.

² Anyak e̱e̱t imma ci a̱tu̱ Ye̱su̱ Ki̱ri̱sto̱, ja ku̱du̱wa̱u̱ng zoz cinne, okkoye Manyi Ye̱su̱ nonno rok ta̱mu̱-keng, ngati aave Ta̱mu̱ta̱dde̱n, edeca zoz necu e̱rki̱nya̱ omoto ki we̱c. Iróng ka̱gga̱ ming okkoye ele cinne icima vongiz. Ta̱mu̱ta̱dde̱n do̱ niko ci a̱gga̱.

³ Ki ming ku̱du̱wa̱ anna ko̱, Ta̱mu̱ta̱dde̱n do̱ niko ci a̱gga̱ ming okkoye ba̱li̱ye̱ enne ele ci e̱e̱t neci.

⁴ Uwe zin ba̱li̱ye̱ nonno Ta̱mu̱ta̱dde̱n rok ma̱na̱ wa aave ta̱mu̱-kenga orgena, nginti acine enne kaal cik a̱zi̱ze̱ iróng wo̱ye̱ e̱e̱ti̱ ci diiri ikebi.

⁵ Kodongi atin anna ele zo̱ze̱ ci e̱e̱t neci, iróng een zo̱ze̱ ci ele cinanni. Abarik kodongi ele kaale cik i̱ye̱la̱ pirnanet cinanni do̱ niko.

⁶ Iróng abarik korongi kodong ele, gerza ming ke̱e̱ni̱ tarbal. Korongi kozoz zoz ci een de̱de̱. Iróng zin atin kozozi zoz ci a̱ppwe̱. Zoz zin ci iróng e̱e̱ti̱ imma ngatinno̱ng i̱no̱n zoz cinanni ko̱ nenen necu, eci acinnu kaal cik kogonni anna ki cik ka̱du̱wa̱.

⁷ I̱yo̱ko̱ zin, kozozi anna zoz ci obod ki kaal cik a̱zi̱ze̱ balik kicina anna ke̱. I̱tto̱na̱i̱ anjilo ci Sitano kar ki̱ki̱ya̱ kaanya piryanzet, kar atin anna iróng kodongi ele.

⁸ Ka̱jji̱nni̱ Manyi lak i̱i̱yo̱ abunna ming aara piryanzet eliye cinanni.

⁹ Ma̱i̱je̱ enne a̱nne̱ka̱ ne, “Elenonu i̱nna̱ ki deten cinanni do̱ niko. I̱llo̱i̱ gi̱i̱ imma ci orongi i̱nna̱, aanyi komizi cinanni i̱nne̱t doiz ming i̱llo̱i̱ i̱nne̱t komiz.” Kar zin ming aave Ki̱ri̱sto̱ aanya komiz cinne, katalne kodongi ele ming i̱llo̱i̱ annit komiz.

¹⁰ Zoz zin ci katalne ko̱ nenen necu ming i̱llo̱i̱ annit komiz nu̱nu̱n, odomnya ol, icima kanyai no̱ngi̱tto̱n cik meelek kar kipira zo̱ze̱ ci Ki̱ri̱sto̱. Eci ming ke̱e̱ni̱ e̱e̱t ci kamuji, aanya atin Ki̱ri̱sto̱ doiz.

I̱no̱n Pa̱u̱lo̱ ol wak a̱tu̱we̱ o̱rge̱ ci een Ko̱ri̱nto̱

¹¹ Ke̱e̱ni̱ anna tarbal ming kozozi zoz ci ele cinanni niko, abarik i̱ge̱t e̱le̱tti̱ cik aanyang kozoz niko. Ozozu weete niga e̱le̱tti̱ne̱ zoz cinanni. Kiize i̱yo̱ko̱ anna gi̱i̱tareng, iróng zin anna ke̱e̱ni̱ gerza, kize vu̱rru̱t ci to̱ni̱a̱k wak volongak, ming iróng anna ke̱e̱ni̱ e̱e̱t imma nu̱nu̱n.

¹² Baling ngen kaavtte bu̱k, ku̱tu̱gu̱ kaal cik i̱ye̱la̱ ke̱e̱ni̱ anna to̱ni̱a̱t ci Ki̱ri̱sto̱ de̱de̱, go̱o̱le̱ ci ku̱tu̱gu̱ kaal cik meelek giir a̱vu̱la̱.

¹³ Obodanu ba̱li̱ye̱ niga e̱le̱tti̱ ke̱le̱ci̱a̱nya̱i̱, eci iróng anna karikku̱ng baiz cinanni i̱ge̱ta̱? Alalteyyang zo̱ze̱ ci kabaca!

¹⁴ Imma bali arrak oowa kicinnung lak rama, i̱yo̱ko̱ zin korongi ki̱ki̱ya̱ kicinnung bo̱do̱k. I̱llo̱i̱ zin atin gi̱i̱ ci ka̱jji̱nnu̱ng, ka̱gga̱ elem cinanni manyi. Iróng korongi kaal cuggo̱k, korongnyung i̱ge̱t e̱le̱tti̱. Ogonnu niga ki dooli cigannik, iróng wo̱ye̱ dooli cikidik atam be̱e̱ti̱nne̱ng, abarik be̱e̱ti̱nne̱ng ci atam dooli.

¹⁵ Korongi zin ka̱a̱nyu̱ng i̱ge̱t kaal ne̱k kanyai anna ke̱ do̱o̱k rok ele cinanni bu̱k. Ming kirezzung anna i̱ge̱t oroot ke̱, iróng wo̱ye̱ niga irezang annit bu̱k?

¹⁶ A̱gga̱ ol uggak ngatinno̱ng iróng anna ke̱de̱zi̱ ol ngati aanyya da̱i̱ne̱t. Iróng anna kegenyi go̱o̱le̱ ci kalabanne ol o̱ro̱bi̱ya̱ volonga.

¹⁷ Ku̱tu̱gu̱ anna zoz necu de̱de̱? I̱llo̱i̱! Iróng anna ba̱li̱ye̱ ki̱tto̱na̱kku̱ng ol balik ke̱ kar ki̱vi̱ta̱ kalabtaung o̱ro̱bi̱ya̱.

¹⁸ Kilalek ba̱li̱ye̱ Ti̱to̱ ki gotonet imma tu̱we̱nta̱ kar ki̱vi̱ta̱ ki̱vo̱nttu̱ng. Ma baling ki̱tto̱nna̱ nogo ke̱, alabaung Ti̱to̱ o̱ro̱bi̱ya̱ u̱gge̱? I̱llo̱i̱, eci kogonna naga do̱o̱k kaal ki i̱yo̱ko̱ vongizi ci Ti̱to̱.

¹⁹ Iróng ka̱gga̱ ming ikebu waraga cu ko̱, i̱no̱nnu̱ keheri anna kaal ne̱ko̱ abunna kacazi no̱ngi̱tto̱n ngati ol wak ovolongnya annit ko̱, abaccu zin niga. Azikna Ta̱mu̱ta̱dde̱n bu̱k, kozozi niko ke̱e̱ni̱ e̱e̱t ci ka̱tu̱ Ki̱ri̱sto̱. Gonogga, abarik kogonni niko kar ubunntta niga.

²⁰ Abile zinin je̱e̱na̱, ming kokko anna keronakkung, kamudannung iróng ol uggak abak baiz ci korongi anna. Ko̱ngo̱o̱le̱ anyak ol u̱gge̱ ngatinno̱ng cik adang e̱le̱tti̱, icima een mederyok, icima adunye zi̱nze̱tti̱, icima irez e̱le̱tti̱ cigge̱k do̱, icima ozoz ol, icima odom ol u̱gge̱. Odong uggak e̱le̱tti̱, ovvo uggak ogon kaal cabak.

²¹ Ko̱ngo̱o̱le̱ ming kokko atin anna ki̱vo̱nnu̱ng, aanya atin Ta̱mu̱ta̱dde̱n a̱li̱ya̱n. Acirit atin zinin eci ol cik meelek ngatinno̱ng ngen kutungget baiz bali reeni mu̱nye̱nu̱ ke̱. Ngen niga ogonnu kaal cik gerzek.