2 Ko̱ri̱nto̱ 10 - Tennet

Ikeb Pa̱u̱lo̱ li̱ngli̱ngo̱n cinne

¹ I̱yo̱ko̱, kilalekkung anna Pa̱u̱lo̱ eliya i̱ge̱t go̱o̱le̱ ci kozoze muluwe ci alali abunna kiwagon Ki̱ri̱sto̱. Ming kaave anna ki i̱ge̱ta̱, kozozi “dalanzeta” ma̱i̱je̱ ming kaave reena ngatinno̱ng kozozi iróng “ko̱ngo̱o̱le̱” zoz!

² Anyak ol u̱gge̱ cik azi ne ku̱tu̱gu̱zza̱ naga ki ol cik iróng a̱tu̱we̱. Korongi zin kinim zoz kar kovocak atin ol zoz. I̱yo̱ko̱ ming kokko anna koboda, kokko kovocak nogo zoz, ma aanyyang kozoziung go̱o̱le̱ necu.

³ Eci ming kabak naga lo̱o̱ta̱ ngatu, iróng zin naga kooro kiwagon olli lo̱o̱tu̱.

⁴ Iróng koyoi ol kiwagon aciiri ming oor illa turete lo̱o̱ta̱ ngatu. Abarik, kooryya ol wak adang zoz ci Ta̱mu̱ta̱dde̱no̱ go̱o̱le̱ ci aave do̱, iróng ne̱ke̱ e̱e̱ggi̱n turet cik lo̱o̱tu̱. Abarik kanyak komiz ci zoz ci Ta̱mu̱ta̱dde̱no̱ ci ommog modden do̱o̱k, kidita zin zoz ci adawanet nege agita,

⁵ bak aditai zoz ci odonge nege e̱le̱tti̱ gon go̱o̱le̱ ci alame ol abunna iróng a̱gga̱ Ta̱mu̱ta̱dde̱n. Kommogta ol wak adangnyyet zo̱ze̱ ci Ta̱mu̱ta̱dde̱no̱ ko̱, kar zin ko̱to̱ngo̱o̱ltte̱ Ki̱ri̱sto̱.

⁶ Ming iziyu i̱nna̱ zoz ci ka̱du̱wa̱nna̱ naga ko̱, kedezza zin atin ol wak iróng o̱ngo̱o̱le̱.

⁷ Acinnu niga kaal ta̱dde̱n, aniyyu ne ke̱e̱ni̱ anna e̱e̱t ci diiri niko. Ming i̱no̱nnu̱, i̱ge̱t do̱ cik e̱e̱ggi̱nnu̱ olli Ki̱ri̱sto̱? Abunna ming a̱gga̱yyu̱ ke̱e̱ggi̱nna̱ naga bu̱k olli Ki̱ri̱sto̱ ki i̱yo̱ko̱ niga ko̱.

⁸ Egerebo, kodonga i̱yo̱ko̱ gon anna ele idic komize bali aanya Manyi ke̱, abunna ming keelannung kar kidiman tu̱we̱ne̱t cunno̱ng kuk oowa, iróng kegerezani tu̱we̱ne̱t cunno̱ng, iróng zin adaka a̱li̱ya̱ni̱ ngati ka̱li̱ngli̱nge̱ komize cinanni.

⁹ Iróng anna korongnyung izet ne eherakket Pa̱u̱lo̱ waraga necu ko̱ orong kar ko̱to̱ngo̱o̱ltte̱ naga nonno.

¹⁰ Ovvo uggak ngatinno̱ng azi ne, “Egernyeket Pa̱u̱lo̱ waraga cinne ko̱ ozoz zoz ci okkomi. Abarik ming okko enne arume ki agit ngatu, acin ol een tarbal, iróng a̱gga̱ zoz.”

¹¹ Imma ol ne̱k azi ne ming a̱gga̱ zoz cinanni ko̱, ming kobodaung, kogonni atin zoz ci e̱he̱rye̱ waraga bali ki̱tto̱na̱kku̱ng ke̱ ele.

¹² Imma ol ne̱k adangnya annit a̱du̱wa̱k ol u̱gge̱ azi ne kabunanna nege. Ming ommogja nege annit de̱de̱, iróng wo̱ye̱ anna kovocak nogo zoz kar kize ne katubonna ki nogo. Abarik iróng nege egenyi.

¹³ Iróng atin kodognyya e̱le̱tti̱ gi̱i̱ye̱ ci amire ki agit cik kogonna. Kodongnyya atin e̱le̱tti̱ li̱ngli̱ngo̱nte̱ ci i̱tto̱nne̱t Ta̱mu̱ta̱dde̱n kar ku̱tu̱gu̱zza̱ ko̱, een li̱ngli̱ngo̱ni̱ necu bu̱k ci ka̱li̱ngli̱ng naga orgene cunno̱ng.

¹⁴ Iróng kodongnyya e̱le̱tti̱ oroot. Ogon zin niko, kanyaktaung naga i̱ge̱t zoz ci obod ki Ki̱ri̱sto̱.

¹⁵ Iróng naga kodongnyya e̱le̱tti̱ kaale cik idimanit ol uggak, ki ci een agit cik kadimanna kaal ne̱ke̱. Abarik karikka zi̱nze̱tti̱ cigga̱c kar tu̱we̱ne̱t cunno̱ng kotore, kar li̱ngli̱ngo̱ni̱ cinna̱ng ki̱ddi̱ki̱r orgene cunno̱ng oroot.

¹⁶ Kar atin anna kuk kuwahek ol kaviyak cik Ki̱ri̱sto̱ wak abunna lo̱o̱cco̱k u̱gge̱ cik ngen e̱e̱ti̱ imma kuwe kaviyak ne̱k abunna ko̱. Kar atin anna kozoz li̱ngli̱ngo̱n ci lo̱o̱c neci, ngati abarik kodong e̱le̱tti̱ gi̱i̱ye̱ ci u̱tu̱gu̱ e̱e̱ti̱ imma.

¹⁷ Azi zoz ci Ta̱mu̱ta̱dde̱no̱ ne, “Ming odong e̱e̱ti̱ ele, anyik kodong ele zo̱ze̱ ci Manyi.”

¹⁸ Iróng een ol ne̱ke̱ cik odong e̱le̱tti̱ azi ne kabunanna, iróng een nogo cik elemi Manyi azi ne abunna, abarik ol cik elemi Manyi abunna, nogo do̱ niko cik abunna.