1 Ti̱mo̱te̱yo̱ 6 - Tennet

Li̱ngli̱ngo̱n ci e̱e̱t ci een du̱ca̱i̱t

¹ Anyik du̱cca̱k wak a̱tu̱ zoz ci Ta̱mu̱ta̱dde̱no̱ ko̱to̱ngo̱o̱ltte̱ ddi̱ki̱ryyo̱k wagge̱k, kar iróng e̱e̱ti̱ imma ozoz gerzet zare cik Ta̱mu̱ta̱dde̱no̱ ki de̱mzi̱ne̱t cinne.

² Ma̱i̱je̱ du̱cca̱ha̱ cik a̱li̱ngli̱ng ki ol cik a̱tu̱ zoz ci Ta̱mu̱ta̱dde̱no̱, ma ibbezzu nogo, eci nege e̱e̱ggi̱n ol cik a̱tu̱ zoz ci Ta̱mu̱ta̱dde̱no̱ bu̱k. Abarik i̱ti̱ri̱zze̱t nogo ju̱rru̱m, eci ol wak atin amuda mediz li̱ngli̱ngo̱ne̱ cinne̱ng, ol wak a̱tu̱ zoz ci Ta̱mu̱ta̱dde̱n wa irez nege ko̱. Demez ol kar bo̱do̱k du̱wa̱k ku̱tu̱gu̱zzo̱ zoz necu,

De̱mzi̱ne̱t wa gerze

³ ming edemez e̱e̱ti̱ lo̱ti̱nno̱k wak aavtte do̱ ngati lo̱ti̱nno̱k wak Manyitinna Ye̱su̱ Ki̱ri̱sto̱ een de̱de̱ ki gool ci kanu ko̱,

⁴ een enne e̱e̱t ci odong ele. Iróng enne a̱gga̱ gi̱i̱ imma. Abarik orong kadang ol gaganiko kar zin kanyaha jo̱o̱re̱. Anyaha zin dangonet neci meder, ki zoz ci irawone ol, ki to̱ri̱ne̱t, ki i̱no̱ni̱ ci gerze,

⁵ anyaha ol wak e̱e̱ggi̱n giilcak dango ki̱zzi̱ zoz ci een de̱de̱. I̱no̱n ol ne̱ke̱ azi ne, okko e̱e̱ti̱ een bo̱to̱ro̱c go̱o̱le̱ ci annuwe enne Ta̱mu̱ta̱dde̱n.

⁶ Ming kabak baiz ci ko̱ngo̱o̱li̱ne̱ Ta̱mu̱ta̱dde̱n kar bo̱do̱k kalalit zi̱nze̱tti̱, aanyyet Ta̱mu̱ta̱dde̱n kaal kizet bo̱to̱ro̱.

⁷ Ka̱ri̱ta̱i̱ naga lo̱o̱c cu ollin, i̱llo̱i̱ gi̱i̱ ci kanyaha. Ka̱da̱i̱ atin bo̱do̱k ollin, i̱llo̱i̱ gi̱i̱ ci kovvoye bu̱k.

⁸ I̱yo̱ko̱ zin, ke̱le̱zzo̱ ki kaal cik kanyak lo̱o̱ta̱ ngatu ko̱.

⁹ Ma̱i̱je̱ ol wak orong kizeto bo̱to̱ro̱, ovvo i̱i̱na̱k zoz ci gerze atimane lo̱rye̱nti̱ kar atin kidita nogo pit.

¹⁰ Eci ming irez e̱e̱ti̱ kaal oroot, anyak no̱ngi̱tto̱n cik gerzek do̱o̱k. Abarik ol uggak utuburet tu̱we̱ne̱t zoz ci Ta̱mu̱ta̱dde̱no̱ aartik zi̱nze̱tti̱ kaal, kar kanyaktak e̱le̱tti̱ u̱u̱ce̱z.

I̱lo̱t Pa̱u̱lo̱ Ti̱mo̱te̱yo̱ kuzute zoz ci Ta̱mu̱ta̱dde̱no̱

¹¹ Imma i̱nna̱ e̱e̱ti̱ ci Ta̱mu̱ta̱dde̱no̱, liit no̱ngi̱tto̱n ne̱ko̱ do̱o̱k. Abarik tu̱gu̱ kaal cik abunna, zuute zoz ci Ta̱mu̱ta̱dde̱no̱, nyak tu̱we̱ne̱t zo̱ze̱ ci Ta̱mu̱ta̱dde̱no̱, irez ol, ize gunun kar zin niim pirnanet.

¹² Zuute zoz ci a̱tu̱we̱ Ye̱su̱. Abunna ming a̱gga̱mi̱ zoz ci baiz wa aave udut bali aanyi Ta̱mu̱ta̱dde̱n. I̱ye̱la̱ i̱nna̱ tu̱we̱ne̱t zoz ci Ta̱mu̱ta̱dde̱no̱ kicinnet icima kiziyet ol cik meelek ke̱.

¹³ Ki̱lo̱ti̱ anna i̱nne̱ta̱ kar kicin Ta̱mu̱ta̱dde̱n wa aanyik kaal do̱o̱k ruget ko̱, kar bo̱do̱k kicin Ye̱su̱ Ki̱ri̱sto̱ bu̱k bali a̱du̱wa̱k alaan Pontius Pilato tu̱we̱ne̱t cinne ke̱,

¹⁴ abunna ming azunne ti̱lo̱wi̱ne̱t cu zee ki̱zzi̱ rok zoz ci anganyi ol kobodak Manyitinna Ye̱su̱ Ki̱ri̱sto̱ lo̱o̱c.

¹⁵ Aanyik atin Ta̱mu̱ta̱dde̱n zoz neci ki̱tta̱ i̱i̱te̱ne̱ ci a̱gga̱ enne, a̱ma̱yu̱we̱ enne kar kize ba̱a̱lo̱i̱t co̱de̱ ṯok, Alaan ci alaatu, Manyi ci ta̱mu̱ta̱dde̱ne̱t do̱o̱k.

¹⁶ Ta̱mu̱ta̱dde̱n do̱ niko ci iróng a̱da̱i̱ udut. Abak enne vooritene ci ataltali, i̱llo̱i̱ rok e̱e̱t ci anime kuk ojonun, ngen e̱e̱ti̱ imma kicin nonno udut, i̱llo̱i̱ bo̱do̱k atin ol cik acin nonno. Anyak enne komiz, ki̱di̱ngdi̱nga̱ni̱t nonno udut. Anyik ku̱tu̱gu̱ niko (Amin).

¹⁷ Ti̱lo̱ ol wak e̱e̱ggi̱n bo̱to̱ro̱ lo̱o̱ta̱ ko̱, gerza ming aarik zi̱nze̱tti̱ kaal ne̱k anyak nege ke̱. Abarik du̱wa̱k nogo kartik zi̱nze̱tti̱ Ta̱mu̱ta̱dde̱n wa een bo̱to̱ro̱c aanyyet kaal do̱o̱k kar naga katalte baiz.

¹⁸ Du̱wa̱k nogo ku̱tu̱gu̱zzo̱ kaal cik abunna, kar kizeto itok zo̱ze̱ ci abunna kar kizeto ol cik i̱i̱rke̱ orong kar kozolit kaal ki ol.

¹⁹ Imma go̱o̱le̱ necu aarik atin nege i̱to̱kze̱t cinne̱ng kize ci een ja̱mi̱te̱n ci bu̱u̱llo̱k cik a̱vvu̱, kar nege ka̱gga̱mi̱t baiz wa een baiz de̱de̱.

²⁰ Ti̱mo̱te̱yo̱, zuute zoz bali aanyi Ta̱mu̱ta̱dde̱n ke̱, bek ju̱rru̱m. Ma edeconik ta̱mu̱ta̱dde̱ne̱t wak zozak ki zoz wa volongo awu ol kize genyiz,

²¹ wak gon ol uggak i̱ya̱kza̱ genyiz imma zin go̱o̱le̱ ci ogone nege niko a̱ma̱li̱ltte̱ nogo o̱o̱tti̱ zo̱ze̱ ci tu̱we̱ne̱t cinne̱ng, utungtek abarik tu̱we̱ne̱t zoz ci Ta̱mu̱ta̱dde̱no̱ lo̱o̱c. Kala Ta̱mu̱ta̱dde̱n ka̱a̱nyu̱ng eezet.