1 Te̱se̱lo̱ni̱ka̱ 5 - Tennet

Kereyya i̱i̱ ci a̱kku̱nne̱ Manyi

¹ Gotonogga ki ngonogga tu̱we̱nta̱, a̱zze̱ gi̱i̱ ci riili oroot ci kar keteheraung i̱i̱ ele ci atin okko a̱kku̱nne̱ Manyi to.

² Eci niga a̱gga̱yyu̱ niko obokket atin wazini ci a̱kku̱nne̱ Manyi ki ta̱mu̱ ci tagizo.

³ I̱nna̱ atin wazini neci ngati aniwe ol ne, “Aave looci labak, i̱llo̱i̱ jo̱o̱re̱.” Kar zin li̱be̱ne̱t ci edeze Ta̱mu̱ta̱dde̱n lo̱o̱c ki̱tta̱ niko! Obokket ki u̱u̱ce̱zi̱ ci obok ngaa ci orong uukcai ki̱zze̱c rok ol cik a̱vi̱ri̱.

⁴ Imma niga ol wak a̱tu̱yyu̱ zoz ci Ye̱su̱ ko̱, ma anyikku zoz ci lo̱o̱c ci gerze ko̱ kecebaung o̱o̱tti̱, koboung wazini neci. Obokkung atin wazini ci a̱kku̱nne̱ Ye̱su̱ ke̱ ki ta̱mu̱ ci tagizo.

⁵ Kazi niko eci naga do̱o̱k ke̱e̱ggi̱n ol cik ka̱gga̱ zoz ci Ta̱mu̱ta̱dde̱no̱ abakku zin baiz ci abunna ogone kaala waz.

⁶ Ku̱zu̱tte̱ e̱le̱tti̱, gerza ming keceba o̱o̱tti̱ ki ol cik iróng a̱tu̱we̱, iróng ka̱gga̱ ming okko atin Ye̱su̱ obodak lo̱o̱c.

⁷ Eci ol adunge ba̱a̱l, kar bo̱do̱k kibbakte ba̱a̱l.

⁸ Imma naga ke̱e̱ggi̱n ol cik kogon kaal waz, abunna zin kanyak urutoit baiza, kar ki̱ti̱me̱t zoz ci tu̱we̱nto̱ ki rezinet, ogon ki i̱li̱b ci abil zi̱nze̱tti̱, ki zoz ci karike naga zi̱nze̱tti̱ aanyet ti̱ri̱ze̱ne̱t ki luluk ci abil oo illawa.

⁹ Eelannet atin Ta̱mu̱ta̱dde̱n, iróng orongnyet kar kedezzeta. Abarik ahalanet kar ki̱tto̱nna̱e̱t Manyitinna Ye̱su̱ Ki̱ri̱sto̱ ki̱ti̱ri̱ze̱ta̱.

¹⁰ A̱da̱i̱ Ye̱su̱ zo̱ze̱ cinna kar kuruget ki nonno, ming karuge icima ka̱da̱i̱, karuge atin kar kabait bu̱k ming okko Ye̱su̱ oboda.

¹¹ I̱yo̱ko̱ zin i̱ti̱lo̱zzo̱ e̱le̱tti̱ kar i̱ti̱lo̱z ol do̱o̱k tu̱we̱nte̱ ci Ye̱su̱ bu̱k ki i̱yo̱ko̱ ming abakku ko̱.

Ti̱lo̱wi̱ne̱t ci Pa̱u̱lo̱

¹² Kilalekkung gotonogga, o̱to̱ngo̱o̱ltte̱ ol cik a̱li̱ngli̱ngngo̱ni̱kku̱ng oroot, ki ming abal ol cik a̱ddi̱ki̱re̱ ol cik a̱tu̱ Manyi, kar kedemezung abunna ming ogonnu kaal cik abunna.

¹³ Eci ogonekku̱ng kaal cik abunna, o̱to̱ngo̱o̱ltte̱ nogo kar irezzit nogo oroot. Abait bo̱do̱k labak.

¹⁴ Gotonogga ki ngonogga tu̱we̱nta̱, kilalekkung egerenycek ol cik e̱e̱ggi̱n gu̱u̱rwa̱. I̱ti̱lo̱z ol cik o̱ngo̱o̱le̱ zoz kokkomit zi̱nze̱tti̱. Eelta icima u̱zu̱tte̱ ol cik apirna kar bo̱do̱k inimet ol do̱o̱k.

¹⁵ Ma acacannu kaal cik gerzek ogonekku̱ng ol, abarik u̱tu̱gu̱zze̱k ol do̱o̱k kaal cik abunna.

¹⁶ Abait kize voori zi̱nze̱tti̱ odohize,

¹⁷ alac Ta̱mu̱ta̱dde̱n odohize,

¹⁸ aanycik Ta̱mu̱ta̱dde̱n odohize zany kaale do̱o̱k, eci een necu zoz ci odola Manyi kize cunno̱ng ngati a̱tu̱yyu̱ Ye̱su̱ Ki̱ri̱sto̱ wa atahalai.

¹⁹ Ma alamnyu zi̱nze̱tti̱ ngati elemnannu zoz ci a̱du̱wa̱ Vongizi ci A̱li̱le̱.

²⁰ Ma ibbezzu zoz ci Ta̱mu̱ta̱dde̱no̱ u̱du̱wa̱ a̱ri̱to̱i̱ti̱ ci zoz cinne.

²¹ Abarik erenyyit no̱ngi̱tto̱n ne̱ke̱ ju̱rru̱m kar atahaltta wak abunna a̱vvu̱ Ta̱mu̱ta̱dde̱na̱.

²² Utuburet kaal cik gerzek ogon lo̱rye̱nti̱ ko̱ udut.

²³ Kala Ta̱mu̱ta̱dde̱n manyi gano ka̱a̱nyu̱ng abait labak, kidimanung izet caale udut. Ka̱a̱nyu̱ng baiz ki vongiz cunno̱ng do̱o̱k ki̱zze̱c ba̱ci̱no̱wa̱ zee kobodak Manyitinna Ye̱su̱ Ki̱ri̱sto̱ lo̱o̱c.

²⁴ Eci Ta̱mu̱ta̱dde̱n atahalaung, azunnu atin kaal balik u̱du̱wa̱ enne ke̱.

²⁵ Gotonogget tu̱we̱nta̱, alayettu Ta̱mu̱ta̱dde̱n.

²⁶ Izayettu oroot ol wak a̱tu̱ zoz ci Ta̱mu̱ta̱dde̱no̱.

²⁷ Kilalekkung zare cik Manyi, ikebtek waraga cu ol wak a̱tu̱ zoz ci Ta̱mu̱ta̱dde̱no̱.

²⁸ Abait eezete wa Manyi Ye̱su̱ Ki̱ri̱sto̱. Amin.