1 Peturu 1 - Tennet

Zawinet ci Peturu

¹ Ke̱e̱ni̱ anna Peturu wa een to̱ni̱a̱t ci Ye̱su̱ Ki̱ri̱sto̱, keherakkung waraga cu ol wak atahala Ta̱mu̱ta̱dde̱n azanonnik lo̱o̱cco̱k u̱tu̱gu̱zzo̱ kiwagon ol cik een i̱do̱ngi̱, aavtte nege Pontacakte, Ga̱la̱ti̱a̱, Cappadociakte, Asia ki Bithynia.

² E̱e̱ggi̱n ne̱ko̱ ol balik atahaltai ngati odola Ta̱mu̱ta̱dde̱n Be̱e̱ti̱nna̱, ahalai li̱ngli̱ngo̱ne̱ ci Vongiz ci A̱li̱le̱, ngati o̱ngo̱o̱li̱nne̱ nege Ye̱su̱ Ki̱ri̱sto̱ ki bi̱ye̱ balik azaconik ol ke̱. Anyik deten ki gano ka̱vvu̱ ngatinno̱ng oroot.

Kinnatit Ta̱mu̱ta̱dde̱n zo̱ze̱ ci ruget ci een jor

³ Kinnatit Ta̱mu̱ta̱dde̱n wa een Be̱e̱ti̱ Manyitinna Ye̱su̱ Ki̱ri̱sto̱. Aanyyet enne agit ti̱ra̱ne̱t ci een jor detente cinne a̱ppwe̱ ci karike naga zi̱nze̱tti̱ go̱o̱le̱ ci ingane Ye̱su̱ Ki̱ri̱sto̱ daiza.

⁴ Aanyyet kaal cik karagiz naga abak aavtte udut, aavtte ta̱mu̱-kenga kize cuggo̱k,

⁵ eci tu̱we̱nte̱ cunno̱ng azunnung atin doizi ci Ta̱mu̱ta̱dde̱no̱ ki̱ki̱ya̱ ti̱ri̱ze̱ne̱t ci okko i̱ye̱la̱ ming okko looci aṯurneke.

⁶ Imma zin zo̱ze̱ necu, atalninnu niga oroot, kar zin i̱yo̱ko̱ ovvo niga apirnannu do̱yo̱i̱t kaale do̱o̱k cik atimannung ol.

⁷ A̱vvu̱ kaala ne̱k gerzek ko̱ kar tu̱we̱ne̱t cunno̱ng kize de̱de̱ kommog zu̱rte̱ni̱t ci een dhahab, ci gon ozolo ming aartik ol gwo̱o̱. I̱ye̱la̱ wo̱ye̱ zoz ci een de̱de̱ kar ol kinnatit, anyaha di̱ngdi̱nga̱ni̱ne̱t ki to̱ngo̱o̱li̱ne̱t ming okko Ye̱su̱ Ki̱ri̱sto̱ obodak lo̱o̱c.

⁸ Ming ngen niga icinnet nonno nu̱nu̱n, irezzu niga nonno; ming iróng niga nu̱nu̱n acinnu nonno i̱yo̱ko̱, a̱tu̱yyu̱ niga nonno kar ngatu anyakku talninet ci a̱ppwe̱ ngatinne,

⁹ eci niga urubtau gi̱i̱ ci orongnyu niga tu̱we̱nte̱ cunno̱ng, ti̱ri̱ze̱ne̱t ci zi̱nze̱tti̱ cuggo̱k.

¹⁰ Imma zo̱ze̱ ci ti̱ri̱ze̱ne̱t necu, ozozit a̱ri̱tto̱wa̱ uggak zoz ci de̱ti̱ne̱t ci atin anyonikkung, orong zi̱nze̱tti̱ ecito idic.

¹¹ Aave Vongizi ci Ki̱ri̱sto̱ ngatinne̱ng, oobek nogo gool ci atin apirnane Ki̱ri̱sto̱ kar atin kaanyozik nonno nginti di̱ngdi̱nga̱nto̱ ci a̱ddi̱ki̱re̱ oroot.

¹² I̱ye̱lto̱zi̱k nogo iróng nege a̱li̱ngli̱nge̱k e̱le̱tti̱ cigge̱k abarik a̱li̱ngli̱ngngo̱ni̱kku̱ng. Uwakteung nege kaviyak cik abunna Ta̱mu̱ta̱dde̱no̱ i̱ge̱ta̱ komize ci Vongiz ci A̱li̱le̱ bali i̱tto̱na̱i̱ ta̱mu̱-kenga. Orongit anjilonya bu̱k kicinnet kaal ne̱ke̱.

Abait baiz ci a̱li̱le̱ ngu̱me̱ ci Ta̱mu̱ta̱dde̱no̱

¹³ I̱yo̱ko̱ zin, abunna ming anyakku i̱no̱ni̱ne̱t cunno̱ng kar i̱li̱ngli̱ngte̱ zoz ci Ta̱mu̱ta̱dde̱no̱. Anyait urutoit baiza; aartik zi̱nze̱tti̱ deten ci a̱a̱nyu̱ng atin Ta̱mu̱ta̱dde̱n ming okko Ye̱su̱ Ki̱ri̱sto̱ a̱kku̱.

¹⁴ Ki i̱yo̱ko̱ dooli cik aziye zoz ko̱, ma ngen ogonnu bo̱do̱k kaal cik gerzek balik ogonnu niga baling ngen a̱gga̱c zoz ci een de̱de̱.

¹⁵ Ma̱i̱je̱ i̱yo̱ko̱ ming a̱li̱le̱ e̱e̱ti̱ wa awuyyung ko̱, izet ol cik a̱li̱le̱ kaale cik ogonnu niga;

¹⁶ eci e̱he̱rye̱ Warage ci Ta̱mu̱ta̱dde̱no̱ azi ne: “Izet ol cik a̱li̱le̱, eci anna ke̱e̱ni̱ Ta̱mu̱ta̱dde̱n ci ka̱li̱li̱.”

¹⁷ Eci niga awuyyu nonno kize Be̱e̱ti̱nno̱ng, iróng zin Ta̱mu̱ta̱dde̱n ahal ol, abait baiz ci ogon ki ci abakku i̱do̱ngi̱ne̱ lo̱o̱ta̱ ngatu, kar o̱to̱ngo̱o̱ltte̱ Ta̱mu̱ta̱dde̱n.

¹⁸ Eci a̱gga̱yyu̱ niga iróng Ta̱mu̱ta̱dde̱n eelanung ba̱li̱ye̱ baize ci gerze ji̱ji̱tu̱ggo̱k ke̱ kaale cik aditai ki i̱yo̱ko̱ o̱ro̱bi̱ya̱na̱ icima zu̱rte̱ne̱n cik een dhahab ko̱,

¹⁹ abarik a̱ti̱ri̱zu̱ng bi̱ye̱te̱ cik Ki̱ri̱sto̱, ogon enne ki nyoon ci iróng anyak gi̱i̱ ci gerze eliya.

²⁰ Atahala bali Ta̱mu̱ta̱dde̱n nonno baling ngen looci keteehenyai ke̱, abarik i̱ye̱la̱i̱ atin Ye̱su̱ ngati aṯurneke looci zo̱ze̱ cunno̱ng.

²¹ A̱tu̱yyu̱ zin niga Ta̱mu̱ta̱dde̱n zo̱ze̱ cinne, Ta̱mu̱ta̱dde̱n ci ba̱li̱ye̱ ingane nonno daiza kar ki̱di̱ngdi̱nga̱n nonno, aave zin tu̱we̱ne̱t cunno̱ng ki zoz ci arikku niga zi̱nze̱tti̱ Ta̱mu̱ta̱dde̱n.

²² I̱yo̱ko̱ i̱ti̱vi̱ltu̱ niga zi̱nze̱tti̱ cuggo̱k kizeto caale ngati elemnyyu zoz ci een de̱de̱, kar anyait rezinet ci een de̱de̱ ki gotonogget wak a̱tu̱we̱, irezit e̱le̱tti̱ cuggo̱k oroot, rezinet ci a̱kku̱ zinina.

²³ Eci Ta̱mu̱ta̱dde̱n a̱a̱nyu̱ng i̱ti̱rrtta̱i̱ bo̱do̱k, iróng een kaale cik aditai, abarik iróng aditai udut, go̱o̱le̱ ci kabahe kar kinimet zoz ci Ta̱mu̱ta̱dde̱no̱.

²⁴ Azi Waraga ci Ta̱mu̱ta̱dde̱no̱ ne, “Ogon ol cik diirik do̱o̱k ki arte, kar di̱ngdi̱ngo̱ni̱ cinne̱ng do̱o̱k ogon ki vu̱rre̱na̱ zara; odoi artenti kar vu̱rre̱na̱ ki̱ta̱zzo̱.

²⁵ Imma zoz ci Manyi aalna udut.” Een necu zoz ci uwakteung ol i̱ge̱ta̱ kize kaviyak cik abunna.