1 Ko̱ri̱nto̱ 7 - Tennet

Zoz ci obod ki rucenet

¹ I̱yo̱ko̱ zin, korongi ku̱du̱wa̱u̱ng zoz bali obod ki waraga bali i̱tto̱na̱kka̱ng niga ke̱, a̱jji̱nna̱ng zoz ci rucento. Abunna ming iróng e̱e̱ti̱ ci maci aruce.

² Abarik zin anyak a̱li̱ya̱kze̱t ci a̱ppwe̱ oroot, anyik e̱e̱t kuruco kanyak ngaa cinne, anyik bo̱do̱k ngaa kanyak mac cinne.

³ Abunna e̱e̱ti̱ ci maci ming abak ki ngaa cinne ju̱rru̱m, okko bo̱do̱k ngaa abak baiz ci ireze nege e̱le̱tti̱, iróng etteddo ebere cabak.

⁴ Iróng ele ci ngaawo een cinne do̱, een ci e̱e̱t cinne bu̱k. Ogon bo̱do̱k ci maci niko, iróng ele ci e̱e̱t ci maci een ele cinne do̱, een ci ngaa cinne bu̱k.

⁵ Ma aburnnu e̱le̱tti̱ ngati ooginu nga̱to̱de̱, abunna ming a̱ju̱ra̱nu̱ e̱le̱tti̱ ming ngen alayu Ta̱mu̱ta̱dde̱n arrak do̱yo̱i̱t. Kar zin vu̱rrta̱, urumte ki ngaa cunne, gerza ming okko sitani atimanin, eci iróng e̱e̱ti̱ ci diiri anyak komiz ci azunne ele cinne.

⁶ Een necu zoz ci ka̱du̱wa̱ anna bu̱k, iróng kadangekkung.

⁷ Korongi wo̱ye̱ anna ol do̱o̱k ku̱tu̱gu̱zzo̱ ki anna. Abarik anyak gon e̱e̱ti̱ arizet ci aanyik Ta̱mu̱ta̱dde̱n nonno; anyak e̱e̱ti̱ imma arizet cu, okko imma anyak arizet ci aave do̱.

⁸ I̱yo̱ko̱ zin, ki̱lo̱tu̱ng ol wak iróng anyak ngaai ki ngaai cik boyek, ka̱nne̱kku̱ng ne: Abunna ming abak nege buwarun ki i̱yo̱ko̱ anna ko̱.

⁹ Ma̱i̱je̱ ming iróng nege azunne e̱le̱tti̱ cigge̱k zo̱ze̱ ci ngaanu, anyik nogo kurucco, abunna ming aruce e̱e̱ti̱ kar kabak baiz ci abunna, gerza ming abak e̱e̱ti̱ baiz ci amanik enne ngaai.

¹⁰ Ka̱nne̱k zin ol wak uruco ko̱ ne, iróng een zoz cinanni, abarik zoz ci Manyi, azi ne: Akaka ming engero ngaa ki mac cinne.

¹¹ Ming engerto ngaa ki e̱e̱t cinne, anyik nonno kabak buwarun, icima abunna ming agano ki e̱e̱t cinne. Ma anyikku e̱e̱t ci maci koog ngaa cinne.

¹² Imma ol wak iróng a̱gga̱ zoz ci Manyi zo̱ze̱ ci rucento ko̱, ka̱nne̱k nogo ne: Ming anyak gotoneti ngaa ci iróng a̱tu̱we̱, kar enne orong kabaito ki e̱e̱t ci a̱tu̱we̱ ko̱ labak, ma oogi ngaa neci.

¹³ Imma ming anyak ngaa mac ci iróng a̱tu̱we̱, kar enne orong kabaito ki ngaa neci labak, ma engeronnu ki e̱e̱t neci.

¹⁴ Eci mac ci iróng a̱tu̱we̱, a̱ma̱yu̱we̱ baizi cinne zo̱ze̱ ci ngaa cinne a̱tu̱we̱ ko̱, okko ngaa ci iróng a̱tu̱we̱ ko̱, a̱ma̱yu̱we̱ baizi cinne zo̱ze̱ ci mac ci a̱tu̱we̱ ko̱. Ovvo dooli cuggo̱k ngoronye, imma zin zo̱ze̱ necu, e̱e̱ggi̱n caale ne paz.

¹⁵ Ming orong e̱e̱ti̱ icima ngaa ci iróng a̱tu̱we̱ ko̱ koog gooni, anyik koog labak. Eci go̱o̱le̱ ci edemezet lo̱ti̱nno̱wa̱ cik Ta̱mu̱ta̱dde̱no̱, iróng ol wak a̱tu̱we̱ odoknonik rucenet ci ogon niko. Orongnyet Ta̱mu̱ta̱dde̱n abunna kabak yahe.

¹⁶ Niga ngaai wak a̱tu̱we̱nu̱, abunna ming a̱gga̱yyu̱ a̱ti̱ri̱z atin Ta̱mu̱ta̱dde̱n macwa cuggo̱k zo̱ze̱ ci tu̱we̱ne̱t cunno̱ng. Ogon bo̱do̱k niko, niga macwana cik a̱tu̱we̱nu̱ ko̱, a̱ti̱ri̱z atin Ta̱mu̱ta̱dde̱n ngaai cuggo̱k zo̱ze̱ ci tu̱we̱ne̱t cunno̱ng.

O̱to̱ngo̱o̱ltte̱ Manyi odohize

¹⁷ Abunna e̱e̱ti̱ ci diiri ming elema baiz ci aanyik Manyi nonno kabahe, go̱o̱le̱ ci orong Ta̱mu̱ta̱dde̱n nonno ki̱li̱ngli̱ng. Een necu ti̱lo̱wi̱ne̱t ci karike anna ke̱le̱ci̱a̱nya̱ veelek.

¹⁸ Ming etteda e̱e̱ti̱ wucic vi̱ca̱vi̱ca̱ baling okko enne elema Manyi, iróng wo̱ye̱ ol obodane vi̱ca̱vi̱ca̱ cinne. Ming iróng e̱e̱ti̱ etted vi̱ca̱vi̱ca̱ baling elema enne Manyi, ma ngen etteddu wucic vi̱ca̱vi̱ca̱ cinne.

¹⁹ Eci zo̱ze̱ ci ettede ol vi̱ca̱vi̱ca̱ icima iróng etted ko̱, i̱llo̱i̱ zoz imma ci gerze. Riil zoz ci azunne e̱e̱ti̱ zoz ci Ta̱mu̱ta̱dde̱no̱ do̱ niko.

²⁰ Abunna ming aave e̱e̱ti̱ a̱vvu̱ze̱t cinne bali la̱du̱n aave enne i̱i̱te̱ne̱ bali awenne Ta̱mu̱ta̱dde̱n nonno kar ki̱ki̱ya̱ ku̱tu̱ zoz ci Manyi Ye̱su̱.

²¹ Baling awuyi Ta̱mu̱ta̱dde̱n ke̱, e̱e̱ni̱ da̱ i̱nna̱ du̱ca̱i̱t? Ma anyike zoz necu ku̱u̱c zinina, ming aanyi enne i̱nne̱t bak labak, bak zin go̱o̱le̱ ci orongi i̱nna̱ ke̱.

²² Eci e̱e̱ti̱ bali awu Manyi baling ngen enne een du̱ca̱i̱t ko̱, ize e̱e̱t ci abak labak i̱llo̱i̱ mu̱nye̱n; ogon bo̱do̱k niko, okko e̱e̱ti̱ ci iróng een du̱ca̱i̱t ko̱ baling awu Manyi nonno, ize enne du̱ca̱i̱t ci Ki̱ri̱sto̱.

²³ Utuwaung bali Ta̱mu̱ta̱dde̱n i̱ge̱t bi̱ye̱te̱ cik Ye̱su̱; iróng ngen e̱e̱ggi̱nnu̱ du̱cca̱k cik ol cik diirik.

²⁴ Gotonogga ki ngonogga tu̱we̱nta̱, anyik ol do̱o̱k cik elemtta Ta̱mu̱ta̱dde̱n kabaito ki bali ming abak nege ke̱ baling awu Ta̱mu̱ta̱dde̱n nogo.

Zoz ci obod ki ol wak ngen kurucco

²⁵ Okko zo̱ze̱ ci e̱e̱t ki ngaa ci ngen kuruco, i̱llo̱i̱ zoz imma ci a̱du̱wa̱ Manyi zo̱ze̱ necu, abarik anna ka̱a̱nyu̱ng zoz ci kettede lo̱ki̱ko̱ eci anna ke̱e̱ni̱ e̱e̱t ci kanyai deten ci Manyi.

²⁶ Eci i̱yo̱ko̱ u̱la̱le̱ looci, abunna zin abarik ming abakku niko.

²⁷ Ming uruco da̱ e̱e̱ti̱ la̱du̱n, gerza zin ming oog e̱e̱ti̱ ngaa cinne. Imma ming ngen da̱ e̱e̱ti̱ een buwarenit la̱du̱n, ma ngen orongi ngaa.

²⁸ Abarik ming orong e̱e̱ti̱ kuruco, abunna bu̱k labak, i̱llo̱i̱ mu̱nye̱n. Ming orong do̱le̱c ci nga̱a̱ye̱ ngen ka̱ta̱gu̱zzo̱ ki e̱e̱t imma ki̱ti̱ye̱, abunna a̱ti̱ye̱ labak, iróng enne ogon zoz ci gerze. Abarik ol cik aruce ko̱ amuda atin no̱ngi̱tto̱n cik meelek baize necu, korongi anna kalamung zo̱ze̱ necu.

²⁹ Gotonogga ki ngonogga tu̱we̱nta̱, ka̱du̱wa̱kku̱ng zoz cu, eci izeto idice i̱i̱nya̱ oroot cik kar looci kuṯurei. Imma zin i̱yo̱ko̱, anyik ol wak anyak ngaai kabaito ki ci iróng nege anyak ngaai, ci iróng nege arike zi̱nze̱tti̱ cigge̱k nogo do̱ oroot.

³⁰ Imma ol cik anyak u̱lu̱wa̱, gerza ming arike nege zi̱nze̱tti̱ cigge̱k u̱lu̱wa̱ do̱ niko. Ovvo ol cik anyak talninet, gerza ming arike nege zi̱nze̱tti̱ cigge̱k talninet do̱ niko. Imma ol cik utene kaal, gerza ming arike nege zi̱nze̱tti̱ do̱o̱k kaal cik utene nege ko̱ do̱.

³¹ Ovvo ol wak anyak kaal cik meelek kaale cik lo̱o̱tu̱ ko̱, abunna ming abak nege ki i̱yo̱ko̱ iróng nege anyak kaal ne̱ko̱, eci looci ize ojon ngati okko aṯurneke.

³² Korongnyung anna i̱ge̱t a̱vvu̱t labak ki̱zze̱c rok kaal cik i̱no̱nnu̱ niga zi̱nze̱tti̱nne̱ cuggo̱k. Imma e̱e̱ti̱ ci ngen kuruco, arik zinin li̱ngli̱ngo̱n ci Manyi, eci ogon enne li̱ngli̱ngo̱n lo̱o̱ta̱ ngatu aanyik Manyi katalo zo̱ze̱ cinne.

³³ Ma̱i̱je̱ e̱e̱ti̱ ci uruco, i̱no̱n enne kaal cik lo̱o̱tu̱ ko̱ oroot, eci orong enne kaanyik ngaa cinne katalo.

³⁴ Aanyik zin zoz necu e̱e̱t necu kengerto go̱o̱le̱ ci ogone enne kaal. Imma ngaa ci i̱llo̱i̱ mac, icima ngaa ci ngen ka̱ta̱gu̱zzo̱ ki e̱e̱t ci maci, arike nege zi̱nze̱tti̱ li̱ngli̱ngo̱n ci Manyi oroot. Ma̱i̱je̱ ngaa ci i̱ti̱ye̱, aave zinin cinne kaale cik lo̱o̱tu̱ ko̱ do̱ niko, orong bo̱do̱k ku̱tu̱gu̱we̱k e̱e̱t cinne kaal cik aanyik nonno katalo.

³⁵ Ka̱du̱wa̱kku̱ng zin anna i̱ge̱t kaal ne̱ko̱, eci korongi kar keelaung. Iróng korongi kar keceba o̱o̱tti̱ cuggo̱k zo̱zzo̱we̱ ne̱ko̱. Abarik korongnyung abait labak kar bo̱do̱k u̱tu̱gu̱z kaal cik abunna, kar aartik zi̱nze̱tti̱ cuggo̱k do̱o̱k li̱ngli̱ngo̱n ci Manyi.

³⁶ I̱yo̱ko̱ korongi kozoz zoz ci e̱e̱t ci amiciz do̱le̱c ci orong enne ki̱ti̱k. Ming orong enne do̱le̱c ci owo enne ko̱ oroot, abunna ming a̱ti̱k enne nonno ming ngen kurumte kize ngaa ki mac, iróng nege anyak mu̱nye̱n, eci rucenet ci ogon niko abunna oroot.

³⁷ Ma̱i̱je̱ e̱e̱ti̱ ci orong ki̱ti̱k do̱le̱c odola enne zinina, imma bo̱do̱k vu̱rrta̱ i̱no̱n enne o̱o̱we̱ cinne do̱ zoz ci abunna rucente necu, abunna ming uunge ci iróng a̱ti̱k do̱le̱c neci. Ming ogon enne niko, u̱tu̱gu̱ enne zoz ci abunna.

³⁸ Imma zin e̱e̱ti̱ ci a̱ti̱k do̱le̱c ci ngen e̱e̱ti̱ imma ki̱ti̱k, abunna. Ma̱i̱je̱ e̱e̱ti̱ ci iróng a̱ti̱k do̱le̱c ci ngen ki̱ti̱ye̱, iróng a̱gga̱ e̱e̱t ci maci, abunna oroot.

³⁹ Imma ngaa ci i̱ti̱ye̱, abunna ming aave e̱e̱te̱ cinne ming ngen enne aruge. Ming a̱da̱k e̱e̱ti̱ cinne, kar enne bo̱do̱k orong ki̱ti̱ye̱ ngati e̱e̱t imma, abunna a̱ti̱ye̱ labak. Abunna zin e̱e̱ti̱ neci ming a̱tu̱ Manyi Ye̱su̱.

⁴⁰ Ma̱i̱je̱ i̱no̱ni̱nte̱ cinanni, atalne ngaa neci oroot ngati weda iróng a̱ti̱ye̱ bo̱do̱k. Imma zin zoz necu ka̱du̱wa̱ anna ko̱, ka̱du̱wa̱ ngati kanyahe Vongiz ci Ta̱mu̱ta̱dde̱no̱.